ගෝටාභය ගැන ජනතාවගේ බලාපොරොත්තුවක් තිබෙනවා.. මීලග අගමැති කරු ජයසුරිය විය හැකියි..- මහින්ද හෙලි කරයි..

July 8, 2018 at 10:00 am | lanka C news
ගෝටාභය ගැන ජනතාවගේ බලාපොරොත්තුවක් තිබෙනවා.. මීලග අගමැති කරු ජයසුරිය විය හැකියි..- මහින්ද හෙලි කරයි..

උදෑසනම අවදිවී ව්‍යායාම සිදු කරන අතරේ ඔහු අප සමඟ කතා බහ ආරම්භ කළේය. වරක හතිලමින් අප අසන ප්‍රශ්නවලට පිළිතුරු ලබා දෙන ඔහු, ඉන් පසුව දොඩම් වීදුරුවක්‌ බොමින් සිය ව්‍යායාම කිස නිමවා අප සමඟ සාකච්ඡා කළේය. හිටපු ජනාධිපති මහින්ද රාජපක්‌ෂ මහතා සමඟ අප කතා බහ කරන විට, ඔහුට එරෙහිව නිව්යෝර්ක්‌ ටයිම්ස්‌ පුවත් පත චෝදනාවක්‌ ගොනු කර තිබුණේය. ඒ අතරම ගෝඨාභය රාජපක්‌ෂ මහතා නෙළුම් මාවතේ පිහිටි, ශ්‍රී ලංකා පොදුජන පෙරමුණේ කාර්යාලයට ගොස්‌ තිබුණේය. මේ සංසිද්ධි මූලික කර ගනිමින් අප විසින් අසන ලද ප්‍රශ්න සඳහා මහින්ද රාජපක්‌ෂ මහතා ලබා දුන් පිළිතුරු මෙසේය.

ප්‍රශ්නය – අවුරුදු නවයක්‌ මේ රටේ ජනාධිපති ලෙස කටයුතු කරලා, දැන් වසර තුනහමාරක්‌ තිස්‌සේ ඔබ ඉන්නේ එම බලතල, වරප්‍රසාද නොමැති තත්ත්වයක… මේ ජීවිතය අත්විඳන විට, යළිත් ජනාධිපති වෙන්න හිතෙන්නේ නැද්ද…?

පිළිතුර – මම ඉපදුනේ දේශපාලන පවුලක… මම පාර්ලිමේන්තුවට ආවේ 1970 මහ මැතිවරණයෙන්. එදා පාර්ලිමේන්තුවේ හිටපු ලාබාලම මන්ත්‍රීවරයා මමයි. මට එතකොට වයස අවුරුදු 27 යි. එදා පාර්ලිමේන්තුවට ආපු මම, ඊට පස්‌සේ මැතිවරණයෙන් පරාජය වෙනවා. ආයෙත් දිනනවා. එහෙම තමයි මගේ දේශපාලන ගමන. මම ජය පරාජය දෙකම හොඳට දන්න කෙනෙක්‌. 2015 මම පරාජය වුණාම, එදා පාන්දරම අවසන් ප්‍රතිඵල එන්නත් ඉස්‌සෙල්ලා, මම ඒ සියල්ල අතහැරලා දාලා යන්න ගියා. මේ සියල්ලම අපි දවසක දාලා යන්න ඕනේ නම්, ඔය තනතුරු අත්හරින්න බැරි ඇයි…? තමන් නියම බෞද්ධයෙක්‌ නම්, මේ දේවල් ජීවිතය පුරා රඳවා ගන්න ඕනේ. එදා මම මේ රටේ ජනතාව විසින් තමන්ගේ ජනාධිපතිවරයා ලෙස පත්කර ගත්තේ, මා කෙරෙහි ලොකු විශ්වාසයක්‌ තියලා. එදා මුළු රටම මගෙන් ඉල්ලා සිටියේ, අපි නොකා නොබී හරි ඉන්නම්, ත්‍රස්‌තවාදය මේ රටෙන් අතුගා දෙන්න කියලා. අවුරුදු තුනහමාරකින් මම ඒ යුද්ධය ඉවර කළා. ඒක හමුදාව සහ එල්ටීටීඊ එක කරපු යුද්ධයක්‌ විතරක්‌ නෙමෙයි. රටේ ගොඩක්‌ දෙනෙක්‌ යුද්ධය කියලා දැක්‌කේ, ඒක විතරයි. අපිට යුද්ධය නැති පළාත් ආරක්‌ෂා කර ගන්න වෙනම වැඩපිළිවෙළක්‌ දියත් කරන්න වුණා. ප්‍රභාකරන්ගේ අවසානය කිට්‌ටු වේගෙන එනකොට, තමිල්නාඩුවේ ඉඳලා, ඇමරිකාව, ප්‍රංශය, බ්‍රිතාන්‍ය, නොර්වේ ආදී රටවල් මේ යුද්ධය නවත්වන්න විවිධ බලපෑම් කළා. අපිට ඒවාත් ජය ගන්න සිද්ධ වුණා. ඒ ඔක්‌කොටම වඩා අමාරු වුණේ අපේ රටේ විපක්‌ෂය කරපු, කියපු දේවල්. සමහරු කිව්වේ අපි මේ යුද්ධය අතර මගින් නවත්වනවා කියලා. සමහරු අයවැය පරාජයට පත් කරලා, ප්‍රභාකරන් බේරා ගන්න හැදුවා. එජාපය ජවිපෙ ඒ වෙලාවේ අයවැයට විරුද්ධව ඡන්දය දුන්නා. දෙමළ සන්ධානය අයවැයට විරුද්ධ වුණාට අපිට දුකක්‌ නැහැ. මේ දෙගොල්ලෝ ඒ වෙලාවේ හැසිරිච්චි හැටි රටේ ජනතාවට හිතා ගන්නවත් බැරි වුණා. එහෙම කරලා ඒ යුතුකමත් මම මේ රටට ඉටුකළා. එය දැන් ඉතිහාසයේ ලියවෙලා හමාරයි… මට ජීවිත කාලයටම ඒ සතුට ඇති. මේ රටේ සංවර්ධනය වෙනුවෙන් අපි කරපු දේවල් මම කියන්න යන්නේ නැහැ. මම පරාජයට පත්වෙලා ගමට ගියහම මේ රටේ ජනතාව නඩ පිටින් බස්‌ අරගෙන මාස ගණනක්‌ මාව බලන්න අපේ ගමට ආවා. ටික කාලයක්‌ යනකොට යහපාලන ආණ්‌ඩුව අපෙන් පළිගන්න ගත්තා. ඒ එක්‌කම ජනතාව ඒ අයට හොඳ පිළිතුරක්‌ පෙබරවාරි දහවැනිදා ලබා දුන්නා. අපි ආයෙත් දින්නා… මේක තමයි ලෝක ස්‌වභාවය, මම ආයෙත් පුටුවකට එන්න අරගල කරන්නේ නැහැ. මේ මව්බිමට අපි දිනා දුන්න ජයග්‍රහණ අපේ ඇස්‌ ඉදිරිපිටම උදුරාගෙන යනවා අපිට බලාගෙන ඉන්න බැහැ… ඒකීය රාජ්‍ය වේවා, සංවර්ධනය වේවා, ආර්ථිකය වේවා… අපි කරපු සියල්ලම දැන් කණ පිට හරවලා, මේ රට ආයෙත් පනහේ දශකයට මේ අය විසින් අරගෙන ගිහිල්ලා තියෙනවා. රට ලබපු ඒ පරාජය නම් මට ඉවස ගන්න බැහැ… එහෙම රට පරාජය කරන්න අපි තවදුරටත් ඉඩ දෙන්නෙත් නැහැ…

ප්‍රශ්නය – පසුගියදා ගෝඨාභය රාජපක්‌ෂ මහතා, ශ්‍රී ලංකා පොදුජන පෙරමුණේ කාර්යාලයට ඔබ විසින් කැඳවාගෙන ගියා, මේ කැඳවාගෙන යැම තුළ තිබෙන්නේ, ඊළඟ ජනාධිපතිවරණය සඳහා අපේක්‌ෂකයා ලෙස ගෝඨාභය රාජපක්‌ෂ මහතාව නම් කිරීමද…?

පිළිතුර – 2005 ජනාධිපති ලෙස පත්වෙලා කරපු පළවැනි පත් කිරීම තමයි, ගෝඨාභයව ආරක්‌ෂක ලේකම් තනතුරට නම් කිරීම. ඔහු ලංකාවට පැමිණියේ කිසිම තනතුරක්‌ ලබා ගන්න බලාගෙන නෙමෙයි. මගේ මැතිවරණ ව්‍යාපාරයට උදව් කරලා, එයා ආපහු ඇමරිකාවට යන්න ලැහැස්‌තිවෙලයි හිටියේ. ඔහුට මම වගකීමක්‌ භාර දුන්නා ඔහු ඒ වගකීම හරියටම ඉටු කළා. ඒ අතර වාරයේ නාගරික සංවර්ධන අමාත්‍යංශයේ ලේකම් ලෙසත් මම ඔහුව පත් කළා. ඒ වගකීමත් ඔහු නිවැරදිව ඉටුකරමින් ලෝකයේ සුන්දරම නගරය බවට කොළඹ පත් කළා. ඔහු කිසිම දවසක ක්‍රියාකාරී දේශපාලනයේ නිරත වුණේ නැහැ. ඒකෙන් කියන්නේ නැහැ ගෝඨාභය දේශපාලනය නොදන්නා චරිතයක්‌ බව. එහෙම තියෙද්දී මේ ආණ්‌ඩුව ඇවිල්ලා ගෝඨාභයගෙන් පළිගන්න ගත්තා. ඔහුව උසාවි ගානේ, කොමිෂන් ගානේ එක්‌ක ගෙන ගියා. ඒ පළිගැනීම් එක්‌ක මේ රටේ ජනතාව දැන් ගෝඨාභය ගැන බලාපොරොත්තුවක්‌ තිබෙන බව පෙනෙනවා. ඒක ඇත්ත… ඒත් එදා ගෝඨාභයව මම එක්‌ක ගෙන ගියේ නැහැ. ඔහුට එන්න කියලා ආරාධනය කළේ, ශ්‍රී ලංකා පොදුජන පෙරමුණේ සභාපති මහාචාර්ය ජී.එල්. පීරිස්‌ මැතිතුමා විසින්. ඒ ආරාධනය අනුව තමයි, එදා ගෝඨාභය එහෙ ගියේ.

ප්‍රශ්නය – ඇයි තවම මේ සැලසුම රටට කියන්නේ නැත්තේ… සැලසුමේ සියලුදේ එළිපිට වෙනවා. එදා ගෝඨාභය මහතා පොහොට්‌ටුවේ කාර්යාලයට ගියේ ඔහුගේ දේශපාලන ආගමනයේ එක්‌ සැලසුමක්‌ සඳහා බව මුළු රටම දන්නවා. එසේ තිබියදී ඔබ ඒ බව වසං කරන්නේ ඇයි…?

පිළිතුර – කිසිම වසං කිරීමක්‌ නැහැ… එදා ඒවගේ දේකට එක්‌ක ගෙන ගියා නම් අපි ඒක ප්‍රසිද්ධියේ කියනවා… පසුගිය කාලය පුරාම රටේ අමුතු අමුතු කතා පතුරුවන්න පිරිසක්‌ උත්සහා කළා. සහෝදරයෝ අතර ගැටුම් ඇතිවුණා කියලා කිව්වා. මේ වගේ බොරුවලට ආයෙත් ඉඩ දෙන්න බැහැ… ජනවාරි කියන්නේ ඒ වගේ බොරු කන්දක්‌ මත කරපු දෙයක්‌… ඒ අය ආයෙත් මේ වගේ බොරු කියන්න ගියහම, අපි ඒවට උත්තර නොදුන්නොත් මොකද වෙන්නේ… ඒවා ඇත්ත කියලා සමාජයේ එක පිරිසක්‌ පිළිගන්නවා. මේ වගේ බොරු වලට දැන් කියන්නේ ‘යහපාලන බයිලා’ කියලා… ඒ මේ වගේ යහපාලන බයිලාවලට දේශපාලන වශයෙන් විතරක්‌ නෙමෙයි, පවුලක්‌ වශයෙනුත් අපි පිළිතුරු දෙන්න ඕනේ…

ප්‍රශ්නය – දැන් ඒකාබද්ධ විපක්‌ෂයේ කණ්‌ඩායම හැත්තෑවක්‌ වෙලා තියෙනවා. දහසය දෙනාගේ කණ්‌ඩායමත් දැන් ඒකාබද්ධයේ මන්ත්‍රීවරුන්ගේ රැස්‌වීමට සහභාගී වෙනවා. ඒ අතර දහසය දෙනාගේ කණ්‌ඩායමේ සිටින ඩිලාන් පෙරේරා මන්ත්‍රීවරයා පවසන්නේ ළඟදීම ඔබව අග්‍රාමාත්‍ය තනතුරට පත් කරන බවයි. ඔබේ දැන් ඉලක්‌කය අගමැති තනතුර ලබා ගැනීමද…?

පිළිතුර – දේශපාලනයෙත් කෙටි කාලීන, මැද කාලීන සහ දිගු කාලීන කියලා සැලසුම් තියෙනවා. අපිට දැන් තියෙන ආසන්නම ඉලක්‌කය වන්නේ පළාත් සභා මැතිවරණය ලබා ගැනීම සහ යහපාලන ආණ්‌ඩුව විසින් මේ රටට කර තිබෙන හානි ආපස්‌සට හැරවීම යන ඉලක්‌ක දෙකයි. ඒ අපේ කෙටි කාලීන සැලැස්‌ම… ඒ සඳහා අපි මේ මොහොතේ පූර්ණ ශක්‌තිය යොදවනවා. ඊට අමතරව මේ ආණ්‌ඩුව විසින් රටට වින කරන්නේ, අපේ මහ මැතිවරණ ජයග්‍රහණයෙන් ලබා ගත් මන්ත්‍රී ආසන උදුරාගෙන, වංචනිකව සාදාගත් තුනෙන් දෙකේ, ඡන්දයෙන්… මේ බලය අපි බිඳින්න ඕනේ… මේ දහසය දෙනා, මට ජනාධිපතිවරණයේදී වැඩ කරපු පිරිසක්‌.. ඒ පිරිස අපිත් එක්‌ක එකතු වුණහම, ආණ්‌ඩුවේ තුනෙන් දෙකේ මගඩි නාටකය ඉවර කරන්න අපිට හැකියාව ලැබෙනවා. හැබැයි එහෙම කියලා, එක පාරටම මට අගමැතිකමක්‌ ලැබෙයි කියලා මම හිතන්නේ නැහැ… ඒක තියෙන්නේ මගේ අතේ නෙමෙයිනේ… ඒ ගැන ජනාධිපතිතුමා තීරණයක්‌ ගනියි. එහෙම තීරණය කරලා අපිත් සමඟ සාකච්ඡා කළහම අපේ කණ්‌ඩායම සමඟ සාකච්ඡා කරලා අවසන් තීන්දුවක්‌ අපි ගන්නවා. හැබැයි, මට ලැබෙන ආරංචි අනුව නම් අගමැතිකම ලැබෙන්නේ යන්නේ කරූ ජයසූරියට…

ප්‍රශ්නය – ඔබේ දේශපාලන සැලසුමේ මැද කාලීන සහ දිගු කාලීන සැලසුම්වලට අනුව මේ ආණ්‌ඩුව ඇතුලේම අගමැතිකම ලබා ගන්න සැලසුමක්‌ තියෙනවාද…?

පිළිතුර – මුලින්ම අපි බලාපොරොත්තු වෙන්නේ, විපක්‌ෂ නායක තනතුර… එකත් අපි පිනට බලාපොරොත්තු වෙන්නේ නැහැ… ඒක අපිට ලැබිය යුතු දෙයක්‌… ඒක අපෙන් හංස පූට්‌ටුව උදුරා ගත්තා. මේ රටේ ඉන්න විපක්‌ෂ නායක කියන්නේ ආණ්‌ඩුවේ ඇමැති කෙනකුටත් වඩා කැබිනට්‌ සාමුහිකත්වයට ගරු කරන කෙනෙක්‌… අගමැතිට විරුද්ධව ආපු විශ්වාසභංගයේදී, විපක්‌ෂ නායක ඡන්දය දුන්නේ, අගමැතිව විශ්වාසයි කියලනේ… ඒ වගේ තමයි ජවිපෙත්… ඒ අය අද කරන්නේ ආණ්‌ඩුවට කෙලින් කරන්න බැරි දේවල් කරලා දෙන එකයි… 20 වැනි සංශෝධනය ගේන්නේ ඒකටනේ… මමත් මුලින් හිතුවේ, මේ අය තමන්ගේ පරණ ස්‌ථාවරය අනුව, විධායක ජනාධිපති ක්‍රමය ඉවත් කරන්න හදනවා කියලා… බැලින්නම් ඒ අයට ඕනේ, විධායක ජනාධිපතිව පත් කරන්න, ජනතාවට තියෙන අයිතිය නැති කරලා දාන්න… ජනාධිපතිවරණයක්‌ තියෙනවට බයේ ගැහි ගැහි ඉන්න රනිල්ට, ඇලෝසියස්‌ගේ මන්ත්‍රීවරුන් ලව්වා ජනාධිපති වෙන්න පොට පාදන කොන්ත්‍රාත් එක අරගෙන තියෙන්නේ, ජවිපෙ… මේ අය තමයි මේ රටේ විපක්‌ෂය… මන්ත්‍රීවරු 70 ක්‌ ඉන්න සැබෑ විපක්‌ෂය වන අපිට විපක්‌ෂ නායක කම නැහැ… ඒකාබද්ධය විදිහට අපේ ඊළඟ සැලසුම ඒක…

ප්‍රශ්නය – යම් හෙයකින් එළඹෙන අයවැයේදී ආණ්‌ඩුව පරද්දලා, අගමැතිට ඉවත් වෙන්න වුණොත්, ඒ සඳහා ඔබට අවස්‌ථාවක්‌ ලැබුණොත් අගමැතිකම භාර ගන්නවාද…?

පිළිතුර – ඒක අපේ අතේ තියෙන වැඩක්‌ නම් ඔය ප්‍රශ්නයට පිළිතුරක්‌ දෙන්න තිබ්බා. අනුන්ගේ අතේ තියෙන වැඩ ගැන මම කොහොමද උත්තරයක්‌ දෙන්නේ… පාර්ලිමේන්තුවේ ආසන 47 ක්‌ තිබ්බ රනිල්ට අගමැතිකම දුන්න කෙනා තමයි, ඒ ගැන තීන්දුවක්‌ ගන්න ඕනේ… එහෙම තීන්දුවක්‌ අරගත්තට පස්‌සේ, අපේ ස්‌ථාවරය අපි කියන්නම්.

ප්‍රශ්නය – ‘චීනය ලංකාවෙන් වරායක්‌ ලබා ගත් හැටි’ යන මාතෘකාව යටතේ, ඇමරිකාවේ නිව්යෝර්ක්‌ ටයිම්ස්‌ පුවත්පතේ පළවී තිබුණු ලිපියේ ප්‍රධාන චෝදනාව වූයේ 2015 ජනවාරි ජනාධිපතිවරණයේ වියදම් සඳහා චයිනා හාබර් සමාගම විසින් ඔබට ඇමරිකානු ඩොලර් මිලියන 7.6 ක මුදලක්‌ ලබාදුන් බවයි. මේ චෝදනාව ඔබ ප්‍රතික්‌ෂේප කර තිබුණාට, නිව්යෝර්ක්‌ ටයිම්ස්‌ පුවත්පතට එරෙහිව ඔබ විසින් තවමත් නෛතික පියවරක්‌ අරගෙන නැහැ…

පිළිතුර – ඉරාකයේ ජනසංහාරක අවි තියෙන බවට, ගවේෂන ලිපි පළ කළේ ඔය කියන පත්තරේ… සදාම්ව මරලා දැම්මට පස්‌සේ, ඒ කියන ජනසංහාරක අවි එකක්‌වත් හම්බු වුණාද…? ඔය වගේ බොරු ගහන පත්තරේකට මම මොකටද නඩු දම දමා ඉන්නේ… අපිට කියන දේවල්වලට නඩු දානවා නම්, වෙන වැඩක්‌ කරන්න වෙන්නේ නැහැ… මේ ආණ්‌ඩුව වගේ නඩු දදා, තමයි අපිටත් ඉන්න වෙන්නේ… අනිත් එක මට ඡන්ද තියෙන්නේ ඇමරිකාවේ නෙමෙයිනේ… ලංකාවෙනේ… මම නඩු දාන්නේ ඒ පුවත මෙහෙ ප්‍රචාරය කරපු අයට විරුද්ධවයි. ඇමරිකාවේ ජනාධිපති ඩොනල්ඩ් ට්‍රම්ප් ඔය පත්තරේ ගැන කිව්ව හැටි දන්නවනේ… ඒ පත්‍රය බොරු ෆeක්‌ටරියක්‌ කියලා තමයි ඔහු විසින් හඳුන්වා දුන්නේ… එහෙම තත්ත්වයක තියෙන පත්තරයක්‌ එක්‌ක නඩු කියන්න ගියහම මට වෙන්නේ, කාලයයි, සල්ලියි දෙකම නාස්‌ති කරගන්න විතරයි.

දැන් මේ අය කියන්නේ හම්බන්තොට වරාය හදන්න අපි සල්ලි ගත්තා කියලනේ… එහෙම වාරයක්‌ හදන්න මිට ඉස්‌සෙල්ලා හිටපු ආණ්‌ඩුත් උත්සාහ කළා. ඒත් ඒ අයට ඒ වැඩේ කර ගන්න බැරි වුණා. අපි ඒ වැඩේ කරහම දැන් අපිට මඩ ගහනවා… මෙතැන සොයා බැලිය යුතු ගනුදෙනුව තියෙන්නේ, මේ වරාය කිසිම විනිවිදභාවයකින් තොරව විකිණුවේ කොහොමද කියන එකයි.

ප්‍රශ්නය – නිව්යෝර්ක්‌ ටයිම්ස්‌ පුවත්පතට නඩු දාන්නේ නැති ඔබ, ලංකාවේ මාධ්‍යයට නඩු දමන්නට උත්සාහ දරනවා. මේ සඳහා කොමිසමක්‌ පත් කරන්න කියලා, එජාපයේ මන්ත්‍රීවරු ජනාධිපතිවරයාගෙන් ඉල්ලා තිබෙනවා…

පිළිතුර – ඔය නඩු දැමිලි, කොමිෂන් දැමිලි දැන් අපිට හොඳට හුරුයි… දැන් අවුරුදු හතරකට ආසන්න කාලයක්‌ මේ අය ඕවමනේ කළේ… මතකනේ ආණ්‌ඩුව පෙරලිච්ච් මුල්ම වෙලාවේ, ජවිපෙ ගිහිල්ලා, රුසියන් තානාපති කාර්යාලය වට කරලා, ඒක රාජපක්‌ෂලාගේ ගෙයක්‌ කියලා, කෑගහන්න ගිහිල්ලා වෙච්ච් දේ… තව කොච්චර දේවල් හෙව්වද…? සමහරු තමන්ගේ හේන් කොටා ගන්න ඕනේ වුනහමත්, ඒ කාලේ කිව්වේ අපේ ඉඩමේ රාජපක්‌ෂලාගේ සල්ලිවල දාලා තියෙනවා කියලා කෝල් එකක්‌ දෙන එකයි… මෙන්න, ටික වෙලාවකින් පොලිසියෙන් බැකෝ අරගෙන ඇවිල්ලා මුළු ඉඩමම හාරනවා… පස්‌සේ ඉතින් ආවා වගේම යන්න යනවා… මේකත් මගේ ඩුබායි සල්ලි ඇහින් දැක්‌කා වගේ වැඩක්‌නේ… මේ ඊයේ පෙරේදා බන්දුල ගුණවර්ධන හොඳ යෝජනාවක්‌ කරලා තිබ්බා… ආණ්‌ඩුව කියන ගණන් හිලව් අනුව මෙරටේ සියලුම ජනතාව සතුව ඇති මුදල මෙන් පස්‌ ගුණයක්‌ මහින්ද රාජපක්‍ෂගේ ගිණුම්වල තියෙන බව පෙනී යන නිසා, රටේ සියලු දෙනාම එකතුවෙලා, ඒ මුදල හොයා ගමුයි කියලා බන්දුල යෝජනා කළා.

මේවට දැන් මිනිස්‌සු කියන්නේ යහපාලන බයිලා කියලා… අපිට කරපු එක චෝදනාවක්‌ වත් මේ ආණ්‌ඩුව ඔප්පු කළාද…? නිව්යෝර්ක්‌ ටයිම්ස්‌ පත්තරේ යන්න ඉස්‌සෙල්ලා මේ ලිපිය පළවුණේ 2015 ජුලි 22 වැනිදා ඩේලි නිව්ස්‌ පත්තරේ… ඒකේ කොපියක්‌ තමයි මේ දාලා තියෙන්නේ… ඒ නිසා අපි මුලින්ම බොරුව වපුරපු අයටයි නඩු දාන්නේ… ඡන්දයක්‌ ළඟ එනකොට, තමන්ගේ හොරකමක්‌ වසා ගන්න ඕනේ වුණහම, බඩු මිල වැඩි වෙනකොට, බදු බර වැඩි වෙනකොට, ආණ්‌ඩුව ඇතුලේ කචල් යනකොට තියෙන එකම විසඳුම තමයි මහින්දගේ සල්ලි, මහින්දගේ ගිණුම්’ කිය කියා සතියක්‌ දෙකක්‌ කෑ ගහන එක… ඒ වැඩේ ජනතාවට අමතක වුණහම, ආයෙත් සද්ද නැතුව ඉන්නවා… නිව්යෝර්ක්‌ ටයිම්ස්‌ එකට නඩු නොදා මෙහෙ අයට නඩු දාන්නේ හඬ ජෝශප්ගේ වුණත් අත යාකොබ්ගේ’ බව අපි දන්න නිසයි. නාමල් මේ ගැන ඇත්ත ලියලා නිව්යෝර්ක්‌ ටයිම්ස්‌ පත්තරේට ලිපියක්‌ යෑව්වා…. ඒකවත් පළකෙළේ නැහැ…ඒකේ ලින්ක්‌ එක විතරක්‌ පේන නොපෙනෙන ගානට ඒ අය දැම්මා… සදාචාරයක්‌ දන්නේ නැති මෙහෙම අය එක්‌ක මොන කතාද…? දැන් බලන්න අපි එදා මේ රටේ ආර්ථිකය, සංවර්ධනය වෙනුවෙන් ගොඩනගපු මත්තල ගුවන් තොටුපළ ඉන්දියාවට විකුණන්න හදනවා. මේවා අසාර්ථක දේවල් නම් වෙන කෙනෙක්‌ ලොකු ලන්සුවකට ගනියිද…? අපි හදපු දේවල් විකුණලා තමයි, අද මේ අය රට කරගෙන යන්නේ… එහෙම කරන ගමන්ම අපි ඒ හදපු දේවල්වලට දොස්‌ කියනවා… ඒවායෙන් අපි ගසා කෑවා කියනවා… මේ මෝස්‌තරේ දැන් යල් පැනලා, කියන එක විතරයි මට කියන්න තියෙන්නේ… මහ බැංකුව මහ දවාලේ මංකොල්ල කෑව අර්ජුන මහේන්ද්‍රන්ව අල්ල ගන්න කිසිම දෙයක්‌ මේ ආණ්‌ඩුව කළාද…? ඇයි නීතිය, එතැනට නැත්තේ… අර්ජුනව කවුද රටින් පිටමං කළේ…? ඒ හොරකම වසං කරන්න අපිට මඩ ගහලා හරි යන්නේ නැහැ…

ප්‍රශ්නය – විජයකලා මහේෂ්වරන් අමාත්‍යතුමිය විසින් යළිත් එල්ටීටීඊය පණගැස්‌සිය යුතු බවට ප්‍රකාශයක්‌ කළා… මේ ප්‍රකාශය පිටුපස සිටින්නේ ඔබ බව, කාවින්ද ජයවර්ධන මන්ත්‍රීතුමා විසින් ප්‍රකාශ කළා… ඔබ විසින් මෙවැනි කටයුතු කරන පහත් තත්ත්වයකට ඇද වැටෙන්නේ ඇයි…?

පිළිතුර – ඔය ප්‍රශ්නය අහන ඔබ වගේම, ඔය කතාව කියපු කෙනාත් දන්නවා, ඇත්තටම වුණේ මොකක්‌ද කියලා… ඔය වගේ කතා කියන තැනට ඒ අයව දිරිගැන්නුවේ මේ ආණ්‌ඩුව… අපේ රණවිරුවන් තමන්ගේ ජීවිතය, අතපය, මහන්සිය පුජා කළේ මේ වගේ කතා ආයෙත් රටේ නෑහෙන්නයි. ඒත් අද රට හැම තැනින්ම ඇහෙන්නේ මේ වගේ කතාමයි. මේ සඳහා වහාම නෛතික ක්‍රියා මාර්ගයක්‌ ආණ්‌ඩුව විසින් අර ගත යුතුයි. ඇමතිකම් වලින් අස්‌වෙන්න කියලා, රටට එකක්‌ පෙන්වලා මේ අයට බේරෙන දෙන්න බැහැ. මේ කතාවේ වැඩිම හානිය ඒකීය ශ්‍රී ලංකාවට… ඊළඟට වැඩිම හානිය අහිංසක දෙමළ ජනතාවට. ඒ ජනතාව අද ශීඝ්‍ර දියුණුවක්‌ ලබා තිබෙනවා. තමන්ගේ දරුවන් පාසල් යවනවා. විශ්වවිද්‍යාලයට යවනවා.., එදා කොටි සංවිධානය සයිනයිඩ් කරලක්‌ බලෙන් බෙල්ලේ එල්ලපු දරුවන්, අද තමන්ගේ ජීවිතය ජය ගන්න නිවැරදි මාවතේ ගමන් කරන කොට, ඒ දරුවන්ට ආයෙත් සොහොන් කොත් ඉදිකරන්නයි, මේ හදන්නේ… මමයි ඒ ජනතාව කොටි රැලෙන් බේරගත්තේ… ඒ දරුවන්ගේ අනාගතය, ඒ ජනතාවගේ ජීවත් වීමේ අයිතිය ආයෙත් වරක්‌ නැති කරන්න අපි ඉඩ දෙන්නේ නැහැ…. තමන්ගේ දරුවන්ගේ තාත්තාට වෙඩි තියලා, මරලා දාපු මෘගයෝ, ආයෙත් නැගිට්‌ටවන්න විජයකලාට ඕනේ වුණාට, උතුරේ ජනතාවට ඒ දේවල් ආයෙත් ඕනේ වෙන්නේ නැහැ. එයාගේ දරුවෝ මේ දේවල්වලට යන්නේ නැහැනේ… එයා අද කරන්න හදන්නේ හැත්තෑ හතේදී අමිර්තලිංගම් කරපු දේමයි. මේ ප්‍රකාශයෙන් ගම්‍ය වන අනිත් දේ තමයි, මේ ආණ්‌ඩුව උතුරට මොන මොන පොරොන්දු දීලා තියෙනවා ද කියන එක…

– divaina

47,030 Viewers

11 Comments to “ගෝටාභය ගැන ජනතාවගේ බලාපොරොත්තුවක් තිබෙනවා.. මීලග අගමැති කරු ජයසුරිය විය හැකියි..- මහින්ද හෙලි කරයි..”

  1. Point Blank says:

    කතාවක් තියෙනවා ” නංගි පෙන්නලා අක්කා දෙනවා කියලා “…..
    මේ මොකාටද එන්නේ ? අයියා පෙන්නලා මල්ලි දෙන්නද

    • දේශාභිමානී දේශ හිතෛශියා says:

      නෑ උඹේ ගෑනි පෙන්නල අම්ම දෙන්න හදන්නෙ…

    • ගන්ජ බන්ඩි says:

      උඹ ග‌ොන් උපමා ගනෙනෙ ග‌ොනකේ

  2. Gayantha says:

    2020 niyatha janapathi. Agamathi mahinda. Karu waidak nai

  3. LION says:

    මින් මතුවට සුළුජාතීන්ගේ ලනු කන්න එපා

  4. rex says:

    This guy is a rogue who should be in jail. Full stop.

  5. Point Blank says:

    අයියලා සෙට් එකට වයර් වගේ..
    මේ අයියලා සෙට් එකේ කවුද බෝයි? කියලා රටම බලන් ඉන්නවා…අයියලා සෙට් එක විකාර කර කර ඉන්නවා.
    ඇත්තට කවුද බෝයි ඈ ?

  6. Gadol says:

    කරුජයසුරිය කියන්නේ රනිල්ගේ අවතාරේ

    • ගන්ජ බන්ඩා says:

      නෑ නෑ ස‌ෙ‌වල ප්ප්පකේ. ජනාව මු කරුව වග‌ේ හ‌ොර දටෙු රනිලට අඩ තියන බ‌ොරු ද‌ේස ප්‍ර‌ේමියන්ට චන්දය න‌ො දිය යුතුය්.

  7. Toyyo says:

    Karu.. Kohoma unath ..Aru.. Apita Epa

Main News