පළාත් 09ට පොලීසි 09ක්.. අලුත් ව්‍යවස්ථාවෙන් මධ්‍යම ආණ්ඩුවේ සියළු බලය පළාත් සභාවලට..

January 10, 2019 at 10:40 am | lanka C news
පළාත් 09ට පොලීසි 09ක්.. අලුත් ව්‍යවස්ථාවෙන් මධ්‍යම ආණ්ඩුවේ සියළු බලය පළාත් සභාවලට..

හිටපු ජනාධිපති වත්මන් විපක්‍ෂ නායක මහින්ද රාජපක්‍ෂ මහතා විසින් නිකුත් කරන ලද මාධ්‍ය නිවේදනයක් මෙහි දැක්වෙයි.

සිව් වසරක අවපාලනය හා මතු පරපුරට රටක් අහිමි වීමේ අවදානම 

2015 ජනවාරි 9 වනදා ආණ්ඩු වෙනසින් පසු අවුරුදු හතරක් ගතවෙන මේ මොහොතේ ශ්‍රී  ලංකාව රටක් හැටියට තුන් බියකට ගොදුරු වී සිටී. ඉන් පළමුවැන්න ආර්ථිකය කුමණ මොහොතක හෝ දරුණු බිඳවැටීමකට ලක් වීමේ අවදානමයි. මේ රට නිදහස ලැබූ 1948 පෙබරවාරි මස සිට 2014 දෙසැම්බර් මස අවසානය දක්වා ගතවුණු අවුරුදු 60 කට වැඩි කාලය තුළ විවිධ ආණ්ඩු ලබාගෙන ගෙවීමට ඉතිරි වී තිබුණු මුලු ණය ප්‍රමාණය මෙන් 50%කට වඩා මුදලක් වත්මන් එක්සත් ජාතික පක්‍ෂ  ආණ්ඩුව ගතවුණු අවුරුදු හතර ඇතුළත පමණක් ලබාගෙන ඇත. එජාප ආණ්ඩුව ණය ගන්නෙ අපේ ආණ්ඩුව ගත් ණය ගෙවීමට යැයි කීවද,  ගත් ණය ගෙවීමට පමණක් ණය ගත්තේ නම්, 2015න් පසු සමස්ථ ණය ප්‍රමාණය වැඩි වීමට නොහැක. නමුත් කලින් ආණ්ඩු ගත් ණය එලෙසම තිබියදී ලංකාවේ මුලු ණය ප්‍රමාණය පසුගිය අවුරුදු හතර ඇතුළත 50%කින් වැඩි වී තිබේ.

2006-2014 අතර අපි රට පාලනය කළ සමයේ මුල් අවුරුදු කිහිපය තුළ රටේ දරුණු යුද්ධයක් පැවතුනි. එයත් සමඟ 2007 ලෝක ආහාර අර්බුදය ඇති විය. 2008-2009 කාලයේ දී 1930 ගණන් වලින් පසු ලෝකයේ ඇති වූ දරුණුම ආර්ථීක අවපාතය අපිට අත් විදීමට සිදුවිය. එපමණක්ද නොව 2006 – 2014 කාලයේදී ඉතිහාසයේ පෙර නොවු විරූ ආකාරයට බැරලය ඩොලර් 140 දක්වා එකදිගටම දරුණු ලෙස තෙල් මිලද ඉහල ගියේය. ඒ සියලුම කලබැගෑනි මැදින් වුවත් 2006 – 2014 අතර මුලු අවුරුදු නවය පුරාම රුපියල ඩොලරයට සාපේක්‍ෂව අවප්‍රමාණය වූයේ රුපියල් 28 කින් පමණි. නමුත් පසුගිය අවුරුදු හතර ඇතුළත පෙර කී ආකාරයේ කිසිම අර්බුදයක් නැතුවත් අපේ මුදල් ඒකකය රුපියල් 53කින් අවප්‍රමාණය වී ඇත. අපේ කාලේ තිබුණු 7.4% ක සාමාන්‍ය වර්ධන වේගය අද 3% ටත් පහල තැනකට වැටී ඇත. ජනාධිපතිතුමා තත්වය අවබෝධ කරගෙන මහ මැතිවරණයක් පවත්වා නැවත රට අපට භාරදීමට උත්සාහයක් දැරුවද ඒ උත්සාහය සාර්ථක වුයේ නැත.  අපි අද සිටින්නේ ඊළඟ සතියේ, ඊළඟ මාසයේ, ආර්ථිකයට කුමක් වේදැයි නොදන්නා තත්වයකය.

අපි මුහුණ දී සිටින  ඊළඟ බිය වන්නේ, 19 වෙනි ව්‍යවස්ථා සංශෝධනය නිසා මුලු පාලන තන්ත්‍රයම බිඳ වැටීමේ අවදානමයි. 19 වන සංශෝධනය නිසා, ආණ්ඩුවක් අයවැය හෝ රාජාසන කතාව පැරදුනත්, විශ්වාස භංග යෝජනාවකින් පැරදුනත් මොනම හේතුවකටවත් අවුරුදු හතරහමාරක් යන තෙක් පාර්ලිමේන්තුව විසුරුවා හැරීමට නොහැක.  පාර්ලිමේන්තුවක්  යනු විවිධ මතිමතාන්තර, පුද්ගලික උවමනා එපාකම් සහිත සංවිධාන හා පුද්ගලයන් සමූහයකි. පාර්ලිමේන්තු ක්‍රමය ශතවර්ෂ ගණනාවක් තිස්සෙ පරිණාමය වූයේ එවන් පිරිසක් යම්කිසි රාමුවක් තුළ රඳවාගෙන පාලනයක් ගෙන යෑමට හැකි වෙන ආකාරයටය. රටේ පාලනයට බලපෑමක් ඇති වෙන තැනට පාර්ලිමේන්තු ආණ්ඩු පක්‍ෂයක් තුළ මත ගැටුම් ඇති වුවහොත් මැතිවරණයක් කැඳවා ජනතා අභිමතය පරිදි නව පාලනයක් පත් කරගැනීමට ඉඩ හැරීම පාර්ලිමේන්තු ක්‍රමයේ ප්‍රධානම අංගයක් විය. අවශ්‍ය අවස්ථාවල ජනතාව ඉදිරියට යෑමේ ක්‍රමවේදය දැන් අහුරා තිබෙන නිසා ආණ්ඩු පක්‍ෂයට තමන්ගෙම මන්ත්‍රීවරුන් හා සභාග දේශපාලන පක්‍ෂ යම් රාමුවක් තුළ රඳවාගෙන කටයුතු කිරීමේ හැකියාව හීන වී ඇත.

අපේ රටේ 1952, 1959, 1964, 2001 පාර්ලිමේන්තු විසුරුවීම් සිද්ධ වූයේ පාලක පක්‍ෂය තුළ ඇතිවූ ගැටුම් විසඳීමටය. අවශ්‍ය අවස්ථාවක පාර්ලිමේන්තු මැතිවරණයක් කැඳවා ජනවරම උරගා බැලීමට ඇති අවකාශය ඇහිරීම රටකට කෙතරම් අහිතකර දැයි ඉදිරියේදී කාටත් පෙනෙනු ඇත. 1978 ව්‍යවස්ථාව ගැන මූලාරම්භයේ සිටම තිබුණු ප්‍රධානම විවේචනය වූයේ, ජනාධිපතිවරයා එක් දේශපාලන පක්‍ෂයකින් පත් වි සිටින අතර පාර්ලිමේන්තු බහුතරය තවත් පක්‍ෂයකට ගියහොත්, රටේ පාලනය අවුල් වෙන බවයි. මේ තත්වය මඟහැරීමට 1994 දීත්, 2001 දීත් ඇතිවූ පූර්වාදර්ශය වූයේ, බලයේ සිටින ජනාධිපතිවරයෙක් මහ මැතිවරණයක් කැඳවා, යම් හෙයකින් ඔහුට විරුද්ධ දේශපාලන පක්‍ෂයක් පාර්ලිමේන්තුවේ බලය දිනාගතහොත්, ඒ ආසන්න ජනමතයට ගරු කර රටේ පාලන බලය සම්පූර්ණයෙන්ම පාර්ලිමේන්තුවෙන් පත්වෙන අගමැතිවරයාට හා කැබිනට් මණ්ඩලයට භාර දී ජනාධිපතිවරයා පසෙකට වී සිටීමයි. අද එවැන්නක් කළ නොහැක.

මහ මැතිවරණයක් කැඳවා ජනවරම උරගා බැලීම ජනාධිපතිවරයාට තහනම් වුවත්, පාර්ලිමේන්තුවේ මන්ත්‍රීවරුන් සමඟ ආණ්ඩු පිහිටුවමින් රට ඉදිරියට ගෙන යෑමේ සම්පූර්ණ වගකීම 19 වන සංශෝධනය විසින්ම පවරා ඇත්තේ එම ජනාධිපතිවරයාටමය. ආණ්ඩුවේ ප්‍රධානියාත්, කැබිනට් මණ්ඩලයේ ප්‍රධානියාත්, වන්නේ ජනාධිපතිවරයාමය. එවන් ආණ්ඩුවක් කරන සෑම දේකටම ජනාධිපතිවරයාටද වගකීමට සිදුවේ. කලින් මෙන් ජනවරම ඇත්තේ කාටදැයි උරගා බැලීමට නොහැකි නිසා ආසන්න ජනවරමට ගරුකොට ජනාධිපතිට පාලනයෙන් අයින් වී සිටීමටද දැන් නොහැක. 2018 පලාත් පාලන ඡන්දයෙන් පසු, එජාපයට ජනවරමක් නොමැති බවත්, ඔවුන් දිගින් දිගටම මැතිවරණ පැවැත්වීම මඟහරිමින් සිටින්නේ ඒ නිසාම බවත් මුලු රටම දනී. එවන් තත්වයක් යටතේ, ජනාධිපතිතුමාට එජාපයට රට භාරදී පසෙකට වී සිටීමට කොහෙත්තම නොහැක. 19 වෙනි සංශෝධනයෙන් ඇතිකර තිබෙන මේ විකෘතිය නිසා රටේ පාලන තන්ත්‍රය සම්පූර්ණයෙන්ම අවුල් වීමේ අවදානමක් ඇත.

අපේ රට ඉදිරියේ ඇති තුන්වෙනි බිය වන්නේ ව්‍යවස්ථා සම්පාදක මණ්ඩලයට ඉදිරිපත්කිරීමට නියමිත රට බෙදන ව්‍යවස්ථාවයි. ආණ්ඩුව එමඟින් බලාපොරොත්තු වෙන්නේ ස්වාධීන රාජ්‍යයන් වලට සමාන බලතල සහිත ෆෙඩරල් ඒකක නවයකට ලංකාව කැඩිමය. අද මධ්‍යයම ආණ්ඩුව සතු සියලුම බලතල ඒ ඒ පලාත් වලට බෙදා දීමට නියමිතය. මේ හැම පලාතකටම වෙනම පොලීසියකුත් ඇති කිරීමට නියමිතය. හදිසි අවස්ථාවකදීවත්, මධ්‍යම ආණ්ඩුවට රටේ සාමය හා ඒකාග්‍රතාවය පවත්වාගෙන යෑමට ක්‍රියාමාර්ග ගැනීමට නොහැකි වෙන තරමට මධ්‍යම පාර්ලිමේන්තුවත්, නීති පද්ධතියත් බෙලහීන කිරීමට එමඟින් ප්‍රතිපාදන කෙටුම්පත් කර ඇත. මෙම නව ව්‍යවස්ථාව කෙටුම්පත් කර ඇත්තේද 19 වෙනි සංශෝධනය කෙටුම්පත් කර මුලු රටම අවුල් ජාලාවක් බවට පත් කළ අයමය.

මේ නව ව්‍යවස්ථා කෙටුම්පත සකස් කළ පාර්ශවයම 2017දී පලාත් පාලන හා පලාත් සභා වලට අලුත් මැතිවරණ ක්‍රමයක් හඳුන්වා දුන්නේය. ඒ අලුත් මැතිවරණ ක්‍රමය ගෙන ඒමට උඩ පැනගෙන කටයුතු කරපු අයම දැන් කියන්නේ ඒ ක්‍රමයට නම් ඉදිරියේ මොනම ඡන්දයක්වත් පවත්වන්න එපා කියලාය. මේ පිරිසම හැඳු අලුත් ව්‍යවස්ථාව සම්මත වුවහොත් රටක් හැටියට ශ්‍රී ලංකාවේ පැවැත්ම අවසන් වෙනු ඇත.  අපට ආරංචි වෙන ආකාරයට, මේ ව්‍යවස්ථා කෙටුම්පත සම්මත කර ගැනීමට  මන්ත්‍රීවරුන් මිලදී ගැනීමේ ව්‍යාපෘතියක් නැවත ආරම්භ වී ඇත. ඒ අනුව ශ්‍රී ලංකාව අද මරණ තුනකට මැදි වී සිටි. මෙම තුන් බියෙන් රට ගලවා ගැනීමට හැකියාව ඇත්තේ මීට කලින්ද ජයගත නොහැකි යැයි කියූ අභියෝග ජයගෙන ප්‍රත්‍යක්‍ෂ  ප්‍රතිඵල පෙන්වා ඇති මගේ නායකත්වය යටතේ ඇති විපක්‍ෂයේ දේශපාලන සන්ධානයට පමණක් බව මේ අවස්ථාවේදී සිහිපත් කර සිටීමට කැමැත්තෙමි.

මහින්ද රාජපක්‍ෂ
විපක්‍ෂ නායක 

20,030 Viewers

7 Comments to “පළාත් 09ට පොලීසි 09ක්.. අලුත් ව්‍යවස්ථාවෙන් මධ්‍යම ආණ්ඩුවේ සියළු බලය පළාත් සභාවලට..”

  1. මාතර සුනිල් says:

    රනිල්ගේ විශේෂ ප්‍රකාශයක් පාර්ලිමේන්තුවේදී.
    ගෙවන්න තියෙන ණය ගැන කියවනවා. @@####
    ගොනා වලිගෙ උස්සන්නේ ගොම දාන්න නෙවෙයි. අනින්නයි හදන්නේ. පාරිභෝගිකයාට දෙවියන්ගේ පිහිටයි. පෙට්‍රල්, විදුලිය, අදායම් බදු, තව කොහෙන් නවතීද දන්නේ නැහැ. කොහොම වුනත් අපේ බඩට කෙලලා, යන්න ඉස්සෙල්ල තව පාරක් මහ බැංකුව සුද්ද කරාවි.

  2. LION says:

    අපි දැක්කා 1988 දෙසැම්බර් මාසේ වර්ධරාජා පෙරුමාල් මහ ඇමතිවරයා පොලිස් බලතලවලට මුවා වෙලා ස්වේච්ඡා පුරවැසි බලකාය නමින් නිල නොවන හමුදාවක් හැදුවා. ඒ බලය පාවිච්චි කරලා 1990 මාර්තු මාසේ ඒක පාර්ශව ස්වාධීනත්වය දෙමළ ඊළම වෙනුවෙන් ප්‍රසිද්ධ කළා. දෙමළ ඊළමක් ප්‍රකාශයට පත් කළා. ඒ මතකය අපට තියෙනවා. ඒක වෙලා බොහොම කෙටි කාලයයි. ඒ නිසයි අපි කියන්නේ උතුරට පොලිස් බලතල දෙන්න එපා, උතුරට නෙවෙයි කොහෙටවත් පොලිස් බලතල දෙන්න එපා කියලා

  3. Nuwan says:

    ලැබුණු අවස්ථාවේ රට හරියට කලේ නැහැ, හරි දේ නොකරපු නිසා යුද්දෙන් වැඩකුත් නැහැ අද. ඔක්කොම සතුරෝ දිනුම්. කිසිම දැක්මත් නැති නායකයෝ බලයට ආපුවහම ඔහොමයි. රට විනාස කරලා තොපි ඔක්කොම.

  4. kAROLIS says:

    අර 150 අවොත් නේ 2/3 එන්නේ. එහෙම නැතුව පනත සම්මත වෙන්නේ නැහැනේ.දැන් පනින්න හදන එවුන් කෝටි 200 ට ලු යන්නේ.දැන් තියෙන්නේ කොටස් වෙළද පලට මොවුන් දාල ඊට වැඩි ගානකට විකුණලා බේරා ගන්න,

  5. Deshapremiya says:

    Madyama aanduwe siyalu balathala palath sabha walatanam parlimenthuwak wedak naha. Mema hora guhawa wahama wasaa /wisuruwa damiya yuthui.

    • Vasana says:

      ෆෙඩරල් ඉල්ලා කෑ ගහන දෙමළ සන්ධාන ක්‍රියාදාමය හෙළා දකිනවා”ෆෙඩරල් ක්‍රමය” අවශ්‍ය යැයි යන මතය ගොඩනඟන්නවුන්ගේ ක්‍රියාදාමයන් අප හෙළා දකිමු නව ආණ්ඩුක්‍රම ව්‍යවස්ථා කෙටුම්පතක් හෝ ආණ්ඩුක්‍රම ව්‍යවස්ථා සංශෝධනයක් මේ අවස්ථාවේදී ශ්‍රී ලංකාවට අවශ්‍ය නොවේ
      20 වෙනි අලුත් ව්‍යවස්ථාව හකුලා ගනු එයට අපේ සම්පුර්ණ විරුධත්වය පළකරමු බෙදුම්වාදී අන්තවාදී ජන කොටස්වල ක්‍රියාකාරකම් නතර කොට සාමකාමී වාතාවරණයක් රට තුළ නිර්මාණය කිරීමටත් පවතින සාමකාමී වාතාවරණය තවදුරටත් ආරක්ෂා කරගැනීමට රජයත් ලක්වැසි සැමත් එක්වියයුතුයි
      අන්තවාදී ෆෙඩරල්වාදීන් ට ,බෙදුම්වාදීන් ට මහ පුටු දී රට බෙදන ෆෙඩරල් ව්‍යාවස්ථාව පැරදවිය හැකි ද? මේ ආණ්ඩුව මොකද්ද මේ රටට සිදු කිරීමට හදන විනාශය මේ බෙදුම්වාදී නව ආණ්ඩුක්‍රම ව්‍යවස්ථා කෙටුම්පතට විරුද් ධව හෙලයනි පාරට බසිව්
      අපේ රට අනතුරේ

  6. Buddhist says:

    Ai ehema karoth mun wage evunta thawa horakam karanna bari wei ne, ekai akamathi.

Leave a Comment

Main News