මිග් ගණුදෙනුවේ අලගිය වැලගිය මුලගිය සියළු තැන් මෙන්න.. රුසියාවේ හිටපු තානාපති හෙලි කරයි..

January 22, 2018 at 1:20 pm | lanka C news
මිග් ගණුදෙනුවේ අලගිය වැලගිය මුලගිය සියළු තැන් මෙන්න.. රුසියාවේ හිටපු තානාපති හෙලි කරයි..

මිග් ගනුදෙනුවට අදාළ මුදල් තම ගිණුම් වලට බැර වී ඇති බවට සත්‍ය සාක්ෂි ලිඛිතව
අධිකරණයට ඉදිරිපත්කර නිතිය ක්‍රියාත්මක කරන ලෙස ආණ්ඩුවට අභියෝග කරන බව රුසියාවේ හිටපු ශ‍්‍රී ලංකා තානාපති උදයංග වීරතුංග මහතා සදහන් කරයි.

මේ බව සදහන් කරමින් ඔහු විසින් නිකුත් කර ඇති නිවේදනය මෙසේය.

මිග් ගනුදෙනුවට අදාළ මුදල් මාගේ ගිණුම් වලට බැර වී ඇති බවට සත්‍ය සාක්ෂි ලිඛිතව  අධිකරණයට ඉදිරිපත්කර නිතිය ක්‍රියාත්මක කරන ලෙස ආණ්ඩුවට අභියෝග කරමි

මා විසින් අයුතු ලෙස උපයාගත් දේපල ඇති බව හුවා දැක්වීමට යහපාලන ආණ්ඩුව අලුත්ම උත්සාහයක නිරතව ඇත. එතෙර ජිවත් වූ වසර 32 තුල නීත්‍යනුකූලව පිටරට දී උපයන ලද විදේශ විනිමය, ශ්‍රී ලංකාවේ අනේවාසික විදේශ ගිණුම් වල (NRFC) තැන්පත් කර ඇති අතර එම විදේශ විනිමය ආයෝජනය කර මෙම දේපල මිලදීගෙන ඇති බව කිව යුතුය. යහපාලනය වසර තුනකට ආසන්න කාලයක්‌ මගේ සියලු ගිණුම් සක්‍රීය කර ඇති අතර සියලු ගිණුම් පරික්ෂා කරන ලදී. මා විසින් නිත්‍යානුකූලව මිලදී ගෙන ඇති වත්කම් බැරකම් ප්‍රකාශය මගීන් වාර්ෂිකව රජයට ඉදිරිපත් කර ඇති දේපල විකිණීම හෝ පැවරීම අත්හිටු වීම හුදෙක් දේශපාලන පළිගැනීමකි. 2006 වර්ෂයේ සිට වත්කම් බැරකම් ප්‍රකාශය මගීන් රජයට ඉදිරිපත්කර ඇති මෙම දේපල සැගවීමට අවශ්‍ය නැත.

මිග් ගනුදෙනුවට අදාළ ගිවිසුම අත්සන් කල කාලය තුල මා, ශ්‍රී ලංකාවට පැමිණ නැති බව ආගමනය විගමන දත්ත අනුව සරලව ඔප්පුවන නමුත්, මා එම ගිවිසුම ලංකාවට රැගෙනවිත් ගුවන් හමුදාපතිගේ අත්සන් ලබාගෙන නැවත රැගෙන ගිය බවට පොලිසිය සාවද්‍ය තොරතුරු ඉදිරිපත් කර අධිකරණය හරහා මා සැකකරුවනකු ලෙස නම් කරන ලදී. මෙවරත් කිසිදු සාක්ෂියක් ඉදිරිපත් නොකර මිග් ගනුදෙනුවේ මුදල් මගේ ගිණුම්වලට ලැබී ඇති බවට අසත්‍ය තොරතුරු අධිකරණයට ඉදිරිපත් කර ඇත. එසේ ගිවිසුමට අදාළ මුදල් මගේ ගිණුම්වලට බැරවී ඇති බවට සාක්ෂි ඇත්නම්, ඒවා වහාම අධිකරණයට ඉදිරිපත් කර නිතිය ක්‍රියාත්මක කරන ලෙස ආණ්ඩුවට මා අභියෝග කරමි.

ඒ අතර මිග් ගිවිසුම යුක්රේන්මාෂ් අත්සන් නොකළ බව මුල්‍ය අපරාධ විමර්ශන ආයතනය චෝදනා කරන අතර එම ගිවිසුමට අමතරව වෙනත් ගිවිසුමක් ඇති බව යහපාලන ඇමතිවරුන් චෝදනා කරයි. එසේ නම් ගුවන් හමුදාවේ ඇති මිග් ගුවන්යානා 8 අප රටට ලබා දී ඇත්තේ කුමන ගිවිසුමක් යටතේද යන්න යුක්රේනියානු රජයෙන් දැනගත යුතු අතර දෙවන ගිවිසුමකට ගුවන්හමුදාව විසින් අත්සන් කර ඇතිනම් ඊට වගකිව යුතු සැකකරුවන් වහාම අධිකරණයට ඉදිරිපත් කල යුතුය.

ගුවන්යානා තත්ව පරික්ෂාකිරීමේන් පසු “Factory Acceptance Certificate” සහතික දෙපාර්ශවය විසින් අත්සන් කර ඇත. ගුවන්හමුදාවේ නිර්දේශ මත එම සහතිකය අදාළ විදේශ බැංකුවට ඉදිරිපත්කර විකුණුම් පාර්ශවය විසින් අදාළ මුදල් වසර 3ක් තුල ලබාගෙන ඇත. එම මුදල් මගේ ගිණුම්වලට බැරවී ඇති බව පොලිසිය විසින් ජනවාරි 18 දින උසාවියට දැනුම් දී ඇත. එසේ නම් එම චෝදනා සනාථ කිරීමට සත්‍ය සාක්ෂි අධිකරණයට වහාම ඉදිරිපත්කර දේශපාලන බලපෑමකින් තොරව නිතිය ක්‍රියාත්මක කරන ලෙස යහපාලනය ආණ්ඩුවට මා අභියෝග කරමි. වසර තුනකට ආසන්න කාලයක්‌ ඊට අදාළ කිසිදු සත්‍යය සාක්ෂියක් පොලිස් මුල්‍ය අපරාධ විමර්ශන ආයතනය අධිකරණයට ඉදිරිපත් කර නැති නමුත්, බැංකු ගිණුම් අක්‍රීය කිරීම මෙන්ම දේපල විකිණීමට තහනම් නියෝගයක් පැනවීමට කටයුතු කිරීම වනාහි පොලිස් රාජ්‍යයේ උපරිම ලක්ෂණ පෙන්නුම් කිරීමකි.

ආණ්ඩුවේ බොරු සියල්ලම අතේ පත්තු වී හමාර නිසා දැන් ජන්ද වාසි ලබා ගැනීමට වෙනත් බොරු ගොතමින් සිටී. ඔවුන් මට විරුද්ධව එල්ල කරන චෝදනා සියල්ල අමූලික බොරු බව ලාංකික ජනතාවට දැනගැනීම පිණිස ඉතා වගකීමෙන් මෙම ප්‍රකාශ කරමි. 

උදයාංග වීරතුංග
රුසියාවේ හිටපු ශ්‍රී ලංකා තානාපති.     

25,088 Viewers

One Comment to “මිග් ගණුදෙනුවේ අලගිය වැලගිය මුලගිය සියළු තැන් මෙන්න.. රුසියාවේ හිටපු තානාපති හෙලි කරයි..”

  1. Nandasoma says:

    යහපාලන බොරුව තවමත් නැවතී නැත…..

    පසුගිය රජයේ රාජපක්ෂලා ඇතුලු රාජ්‍ය නිලධාරීන් බොරු වැරදි මවා පෙන්වමින් අපහසුතාවයනට පත් කිරීම තව දුරටත් සිදුවන්නේ, මහ බැංකු මංකොල්ලය වසා ගෙන යහපාලන හොරුන් ආරක්ෂා කිරීමේ එක් පියවරක් ලෙසය!

Main News