යහපාලන රජය මාසයකට ගෙන ඇති ණය රාජපක්‍ෂ රජය වර්ෂයකට ගත් ණයට වඩා වැඩියි…

June 14, 2018 at 4:40 pm | lanka C news
යහපාලන රජය මාසයකට ගෙන ඇති ණය රාජපක්‍ෂ රජය වර්ෂයකට ගත් ණයට වඩා වැඩියි…

යහ පාලන රජය එක්‌ මාසයක්‌ තුළ ගෙන ඇති ණය ප්‍රමාණය රාජපක්‍ෂ රජය 2014 මුළු වර්ෂය තුළම ලබාගත් ණයට වඩා වැඩි මුදලක්‌ බවත්, මේ අනුව ඉකුත් මැයි මාසයේදී පමණක්‌ ශ්‍රී ලංකාවේ රාජ්‍ය ණයට එකතු වූ මුළු මුදල රු. බිලියන 842 ක්‌ බවත් ශ්‍රී ලංකා මහ බැංකුවේ හිටපු අධිපති අජිත් නිවාඩ් කබ්රාල් මහතා පවසයි.

යහ පාලන රජය එක්‌ මාසයක්‌ තුළ ගෙන ඇති ණය ප්‍රමාණය රාජපක්‍ෂ රජය 2014 මුළු වර්ෂය තුළම ලබාගත් ණයට වඩා වැඩි මුදලක්‌ බවත්, මේ අනුව ඉකුත් මැයි මාසයේදී පමණක්‌ ශ්‍රී ලංකාවේ රාජ්‍ය ණයට එකතු වූ මුළු මුදල රු. බිලියන 842 ක්‌ බවත් ශ්‍රී ලංකා මහ බැංකුවේ හිටපු අධිපති අජිත් නිවාඩ් කබ්රාල් මහතා පවසයි.

මේ සම්බන්ධයෙන් හිටපු මහ බැංකු අධිපතිවරයා නිකුත් කළ ප්‍රකාශය මෙසේය.

රටක ආර්ථිකය තක්‌සේරු කරද්දී සලකා බලන එක්‌ වැදගත්ම සාර්ව ආර්ථික සාධකයක්‌ වන්නේ දළ දේශීය නිෂ්පාදිතයට සාපේක්‌ෂව ණය ප්‍රතිශතයයි. එම ප්‍රතිශතය, රටේ ණය ආපසු ගෙවීමේ හැකියාව මනින මිණුම් දණ්‌ඩක්‌ ලෙසද සැලකේ. තවද, මෙම ප්‍රතිශතයන් වසර ගණනාවක්‌ ඔස්‌සේ හැසිරෙන ආකාරය සලකා බැලීමෙන් අදාළ රටේ ණයබරතාවය වැඩි වන්නේද, අඩුවන්නේද යන්නද, පැහැදිළි කරගත හැක.

2005 දී මහින්ද රාජපක්‌ෂ රජය රටේ පාලනය භාරගන්නා අවස්‌ථාවේදී ශ්‍රී ලංකාවේ දළ දේශීය නිෂ්පාදිතයට සාපේක්‌ෂව ණය ප්‍රතිශතය වාර්තා වූයේ 91% ක්‌ ලෙසය. එතැන් සිට, තිරසාර ආර්ථික වර්ධනයක්‌ පවත්වාගෙන යමින්ද, රුපියල ස්‌ථාවරව පවත්වා ගනිමින්ද, දේශීය සහ විදේශීය ආයෝජන වර්ධනය කර ගනිමින්ද, සමස්‌ත පොලී අනුපාත අඩුකර ගනිමින්ද, අයවැය පරතරය සංකෝචනය කර ගනිමින්ද, උද්ධමනය පාලනය කර ගනිමින්ද, දළ දේශීය නිශ්පාදිතයට සාපේක්‌ෂව ණය ප්‍රතිශතය, 2015 ජනවාරි මාසයේදී රාජපක්‌ෂ පාලනය අවසන් වන අවස්‌ථාවේදී 71% ක්‌ දක්‌වා අඩු කර ගැනීමට, එම රජයේ ආර්ථික බලධාරීන්ට හැකි වුණි.

එතැන් පටන් යහපාලනය රජය විසින් දියත් කරන ලද දුර්වල ආර්ථික පාලනය හේතුකොට ගෙන, ඉතා ඉක්‌මනින් රටේ ණයබරතාවය භයානක මට්‌ටමකට පිවිසී ඇති බව දැන් පෙනී යයි. මෙම අයහපත් තත්ත්වය මතුවන්නට මූලිකවම හේතුවූ සාධක අතරට, දැවැන්ත රාජ්‍ය වියදම, සීග්‍රයෙන් අවප්‍රමාණය වන රුපියල, ඉහළ යන පොලී අනුපාතය, නාස්‌තිකාරී ව්‍යාපෘති සහ අසාර්ථක රාජ්‍ය ප්‍රතිපත්තිවලට ආයෝජකයන්ගේ උදාසීන ප්‍රතිචාර, ඇතුළත් වේ. මෙම හේතූන් නිසා, සමස්‌ත ණය ප්‍රමාණය ඉතා සීග්‍ර ලෙස වැඩි වූ අතර, දළ දේශීය නිෂ්පාදිතයට සාපේක්‌ෂව ණය ප්‍රතිශතයද ඉතා ඉක්‌මනින් ඉහළ යන ලදී.

2017 ශ්‍රී ලංකා මහ බැංකුවේ වාර්ෂික වාර්තාවට අනුව, රජයේ සමස්‌ත ණය තොගය 2014 අග වන විට වාර්තා වූ රුපියල් බිලියන 7,391 සිට 2017 අග වන විට රුපියල් බිලියන 10,313 දක්‌වා වැඩිවුණි. තවද, 2014 අග වන විට වාර්තා වී තිබූ දළ දේශීය නිෂ්aපාදිතයට සාපේක්‌ෂව ණය ප්‍රතිශතය 71.3% සිට, 2017 අග වන විට 77.6% දක්‌වා ඉහළ ගිය බවද වාර්තා වුණි.

එහෙත්, මීට වෙනස්‌ තත්ත්වයක්‌ 2017 සදහා මුදල් අමාත්‍යාංශය විසින් ඉදිරිපත් කොට තිබූ ගිණුම් විගණනය කළ ශ්‍රී ලංකා විගණකාධිපති පෙන්වා දී තිබේ. ඔහු පවසා ඇත්තේ 2017 අග වන විට රජයේ සමස්‌ත ණය රුපියල් බිලියන 10,313 නොව, රුපියල් බිලියන 10,702 බවයි. එනම්, රුපියල් බිලියන 389 ක දැවැන්ත අගයක්‌, හෝ ඇමරිකානු ඩොලර් බිලියන 2.5 ක්‌, රටේ ණය තොගයට තවදුරටත් එකතු විය යුතු බවය. රුපියල් බිලියන 389 ක්‌ යනු කොළඹ/කටුනායක අධිවේගී මාර්ගය, නොරොච්චෝලේ තාප බලාගාරය සහ හම්බන්තොට වරාය යන ව්‍යාපෘති සියල්ලම තැනීම සදහා වැය වූ මුදල හා සමාන මුදලකි. තවදුරටත් විගණකාධිපතිවරයා ප්‍රකාශ කොට ඇත්තේ, 2017 අග වන විට ශ්‍රී ලංකාවේ දළ දේශීය නිශ්පාදිතයට සාපේක්‌ෂව ණය ප්‍රතිශතය 77.6% ක්‌ නොව එය 81.0% ක්‌ බවය. ඒ අනුව ශ්‍රී ලංකාව zඅතිශයෙන් ණයබරතාවයෙන් පෙළෙනZ රාජ්‍යයක්‌ ලෙස ජාත්‍යන්තරව වර්ගීකරණය වන නිසා ඉදිරියේදී ශ්‍රී ලංකාවේ ණය ගැනීමේ හැකියාව දරුණු ලෙස දුර්වල වනු ඇත.

ශ්‍රී ලංකාවේ බලධාරීන්ගේ වාසනාවට මෙන්, මෙම අතිශයින් දුර්වල තත්ත්වය ප්‍රසිද්ධියට පත් කිරීමට දින කීපයකට පෙර, දැවැන්ත දිගු කාලීන ණය තොගයක්‌ එකතු කර ගැනීමට බලධාරීන් සමත් වුණි. 2018 මැයි මාසයේ ජාත්‍යන්තර ස්‌වෛරීය බැඳුම්කර හර හා ඇමරිකානු ඩොලර් බිලියන 2.5 ක්‌ද, ‘හවුල්’ ණයක්‌ හරහා ඇමරිකානු ඩොලර් බිලියන 1.0 ක්‌ ද, ලබාගත් බව බලධාරීන් ආඩම්බරයෙන් ප්‍රකාශ කළහ. ඒ අනුව, ඇමරිකානු ඩොලර් බිලියන 3.5 විදේශ විනිමය ණය හෙවත් රුපියල් බිලියන 556 ක ණය ලබා ගැනීමට ඔවුන්ට හැකිවුණි. ඒ අතරම, දිගු කාලීන දේශිය බැදුම්කර නිකුතු හරහා තවත් රුපියල් බිලියන 90 ක්‌ද ණයට ගැනීමට බලධාරීන් කටයුතු කළහ. ඊට අමතරව, 2018 ජනවාරි 1 වැනිදා සිට 2018 ජූනි 12 වැනිදා දක්‌වා කාලය තුළදී ශ්‍රී ලංකා රුපියලේ අවප්‍රමාණය වීම නිසා, තවත් රුපියල් බිලියන 196 ක්‌ රජයේ ණය තොගයට එකතු වුණි. මේ අනුව, 2018 මැයි මාසයේදී පමණක්‌ ශ්‍රී ලංකාවේ රාජ්‍ය ණයට එකතුවූ මුළු මුදල රුපියල් බිලියන 842 ක්‌ බව ගණනය කළ හැක. එම අගය, දළ දේශීය නිෂ්පාදිතයට සාපේක්‌ෂව ප්‍රකාශ කරන්නේ නම්, 6% ක්‌ වැනි දැවැන්ත අගයකි.

රාජපක්‌ෂ පාලන කාලයේ අවසන් වසරවූ 2014 වසරේදී, වසර තුළ වැඩිවූ ණය තොගය රුපියල් බිලියන 598 කි. එසේ නම්, මෙයින් පෙනී යන්නේ එක්‌ මාසයක්‌ තුළ යහපාලන රජය රැගෙන ඇති ණය ප්‍රමාණය රාජපක්‌ෂ රජය 2014 මුළු වසර තුළම ලබා ගත් ණයට වඩා බෙහෙවින් වැඩි මුදලක්‌ බවය. කිසිදු වගකීමකින් තොරව සහ මුළු ඉතිහාසයේම නොවු විරූ ආකාරයට, වර්තමාන රජය ණය ගන්නා ස්‌භාවය මේ නිදසුනෙන්ම තහවුරු වනු ඇත.

ඉහත පෙන්වා දී ඇති ආකාරයට දැවැන්ත ණය ගැනීමට අමතරව මෙම රජය විසින් සියලුම ව්‍යාපාර සහ ජනතාව මත ඉතා පීඩාකාරී බදු පැනවීමක්‌ද කෙරෙනු දැන් පෙනී යයි. ඒ සමගම රජයෙන් ලබා දෙන සෑම සේවයකටමද රජය විසින් අලෙවි කරනු ලබන සියලුම භාණ්‌ඩවලටද ඉතා ඉහළ මිල වැඩි කිරීම් කරන ආකාරයද පෙනේ. මෙම ද්විත්ව ප්‍රහාර හරහා වර්තමාන රජය ශ්‍රී ලංකා ආර්ථිකයේ සියලුම කොටස්‌කරුවන් දැවැන්ත පීඩනයකට මේ වන විටත් ලක්‌ කොට ඇත. එපමණක්‌ද නොව, දැනට දින කීපයකට පෙර අගමැතිවරයා ප්‍රකාශ කොට සිටියේ, නොබෝ දිනකින් තව දුරටත් බදු වැඩි කිරීමට සිදු වන බවය. ඔහු එසේ කියද්දීම, වෙනත් පැත්තකින් අසහනකාරී පාර්ලිමේන්තු මන්ත්‍රීන් තෘප්තිමත් කිරීම් සඳහා නව ඇමතිකම්ද බෙදනු පෙනේ. මෙම ලැඡ්ජාසහගත සහ අසංවේදී ක්‍රියා පටිපාටිවලින් පෙනී යන්නේ වර්තමාන වැඩ බැරි සහ දූෂිත රජය විසින්, ඉදිරියේදී දියත් කළ හැකි ක්‍රියාවලියන් වෙනුවෙන් මේ වන විට, විකල්ප සියල්ලම පාහේ ඇහිරී ඇති බවය. එපමණක්‌ නොව, කිසිදු දර්ශනයක්‌ හෝ දිශාවක්‌ නොමැති ඔවුන්ගේ ආර්ථික කළමනාකරණය නිසා, ආර්ථික පාලනයද ඔවුන් අතින් සම්පූර්ණයෙන්ම ගිලිහී ගොස්‌ ඇති බවය.

– divaina

8,558 Viewers

One Comment to “යහපාලන රජය මාසයකට ගෙන ඇති ණය රාජපක්‍ෂ රජය වර්ෂයකට ගත් ණයට වඩා වැඩියි…”

  1. Gayantha says:

    Ow ithin maha bankuwata kelapa haitiyata naya ona wai

Main News