2017 වසරේදී ඩෙංගු රෝගීන් එක්ලක්‍ෂ හැත්තෑහත්දහසයි.. ඩෙංගු මදුරුවන් මඩින්න අලූත් මදුරුවන් තොගයක් රටින් ගෙන්වා මුදා හරී..

December 14, 2017 at 8:02 am | lanka C news
2017 වසරේදී ඩෙංගු රෝගීන් එක්ලක්‍ෂ හැත්තෑහත්දහසයි.. ඩෙංගු මදුරුවන් මඩින්න අලූත් මදුරුවන් තොගයක් රටින් ගෙන්වා මුදා හරී..

ඔස්ට්‍රියාවේ මොනැෂ් විශ්ව විද්‍යාලයේ විද්‍යාඥයින් විසින් හදුන්වා දී ඇති “Wolbachia” බැක්ටීරියාව, ඩෙංගු වෛරසය සම්ප්‍රේෂණය වැළැක්වීම සදහා යොදා ගැනීමට සෞඛ්‍ය අමාත්‍යාංශයේ ජාතික ඩෙංගු මර්දන ඒකකයේ අවධානය යොමුව ඇති බව සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා පවසයි. ඒ සදහා අමාත්‍ය මණ්ඩලයේ අනුමැතිය ලබාගැනීම සදහා කැබිනට් පත්‍රිකාවක් ඉදිරිපත් කිරිමට නියමිතය.
ශ්‍රී ලංකාව තුල මදුරුවන් මගින් බෝවන රෝග අතුරින් ඩෙංගු රෝගය ප්‍රධාන මහජන සෞඛ්‍ය ගැටලුවක් බවට පත්ව ඇත.

ශ්‍රී ලංකාව තුල ඩෙංගු රෝගය පැතිරවීමේ ප්‍රධාන වාහකයා වන්නේ “Aedes aegypti” මදුරු විශේෂයයි. රෝග ව්‍යාප්තිය පාලනය සදහා පවතින ප්‍රධාන ක්‍රමෝපාය වන්නේ වාහක පාලනයයි. එහිදී වඩා කාර්යක්ෂම සහ පරිසර හිතකාමි වාහක පාලනය සිදු කළ හැකි ජෛව පාලන ක්‍රමෝපායන් ඉතා වැදගත් වෙයි. එම නිසා ඔස්ට්‍රේලියාවේ මොනෑෂ් විශ්ව විද්‍යාලයේ විද්‍යාඥයින් විසින් හදුන්වා දී ඇති නව බැක්ටීරියාව සමහර මදුරු විශේෂ ද ඇතුලුව ලෝකයේ කෘමි විශේෂ 60 කට වැඩි ප්‍රමාණයක ශරීර තුල හා ස්වභාවිකව ජීවත්වන බැක්ටීරියාවකි. එහෙත් මෙම බැක්ටීරියාව ප්‍රධාන ඩෙංගු වාහක මදුරු විශේෂය වන “Aedes aegypti” මදුරුවන්ගේ ශරීරිය තුල ස්වභාවිකව හමු නොවෙයි. “Wolbachia” බැක්ටීරියාව ආසාදනය වූ මදුරුවන්ගේ ශරීරය කුල ඩෙංගු වෛරස සම්ප්‍රේෂණ මට්ටම වර්ධනය නොවෙයි. එය මිනිස් ගහනය තුල ඩෙංගු වෛරසය පැතිරීම සැළකිය යුතු මට්ටමින් අඩු කිරිමට ප්‍රමාණවත් වෙයි.

ඩෙංගු රෝගය පැතිරීම වැළෑක්වීම සදහා “Wolbachia” බැක්ටීරියාව ආසාධිත “Aedes aegypti” මදුරුවන් නිදහස් කිරීම ඔස්ට්‍රේලියාව, වියට්නාමය, ඉන්දුනීසියාව, බ්‍රසීලය සහ කොළොම්බියාව යන රටවල සාර්ථකව සිදු කරයි. මෙම ව්‍යාපෘතිය ශ්‍රී ලංකාවේ තෝරා ගත් ප්‍රදේශවල ක්ෂේත්‍ර මට්ටමේ අධ්‍යයනයක් සිදු කිරීම සදහා අවශ්‍ය තාක්ෂණික සහයෝගය ලබාදිමට මොනෑෂ් විශ්ව විද්‍යාලය කැමැත්ත පළ කර ඇත. ඒ සදහා ඔස්ට්‍රිලියානු විදේශ කටයුතු අමාත්‍යාංශයේ ද කැමැත්ත හිමි වි තිබේ. ව්‍යාපෘතිය සදහා මුල්‍යාධාර ලබාදෙන්නේ ඔස්ට්‍රිලියානු රජය මගිනි. මෙම ව්‍යාපෘතිය අත්හදා බැලීමේ පර්යේෂණයක් ලෙස ක්‍රියාත්මක කිරීම සදහා මහවැලි සංවර්ධන සහ පරිසර අමාත්‍යාංශයේ ජෛව විවිධත්වය සදහා වන ජාතික, විශේෂඥ කමිටුවේ එකගතාවය ද ලැබී ඇත. ව්‍යාපෘතිය සදහා ඔස්ට්‍රිලියානු රජය ඩොලර් මිලියනයක මුදලක් ලබාදීමට නියමිතය.

බෝවන රෝග අතුරින් පාලන කර ගැනීමට අවශ්‍ය වී ඇති ඩෙංගු රෝගය පාලනය කිරීමට සුදුසු පියවර කඩිනමින් ගන්නා ලෙස සෞඛ්‍ය අමාත්‍ය රාජිත සේනාරත්න මහතා ජාතික ඩෙංගු මර්දන ඒකකයට දැනුම් දී ඇත.

2017 වසරේ ගත වූ කාලය තුල රෝගීන් 177000 ක් වාර්තා වී ඇත. ලබන 22 දා ජනාධිපති ඩෙංගු කාර්ය සාධන බලකාය ද රැස්වීමට නියමිතය. සෞඛ්‍ය අමාත්‍යවරයාගේ උපදෙස් මත නව පාසල්වාරය ආරම්භවීමට ප්‍රථමව ත්‍රිවිධ හමුදාව සහ දෙමාපියන් සහභාගි කරවා ගනිමින් මදුරු මර්දන වැඩසටහන් ක්‍රියාත්මක කිරීමට ද කටයුතු යොදා ඇත.

– ප‍්‍රසන්න අධිකාරි

3,638 Viewers

One Comment to “2017 වසරේදී ඩෙංගු රෝගීන් එක්ලක්‍ෂ හැත්තෑහත්දහසයි.. ඩෙංගු මදුරුවන් මඩින්න අලූත් මදුරුවන් තොගයක් රටින් ගෙන්වා මුදා හරී..”

  1. Upali says:

    මගෙ අම්මෝ…. මේකත් අර එක්කෙනෙකුගෙන් බේරෙන්න කියල තව එක්කෙනෙක් ගෙන්නගෙන …..කරපු 2015 ජනවාරි හෙනේ වගේ වේවිද.

Main News