හැකි නම් මට නඩු දමනු – පී‍්‍රමා සමාගම ගැන විමල්ගෙන් හෙළිදරවුවක්

ත්‍රිකුණාමලයේ පිහිටා ඇති ප්‍රීමා පිටි සමාගමට  අයත් කර්මාන්ත ශාලාවට ගෙන එන තිරිගු වලින් පොත්ත සමග පෝෂණය සහිත කොටස ඒ නැවේම නංවා යළි පිටරට යවා පෝෂණයෙන් තොර කොටස ශ්‍රී ලංකාවේ පරිභෝගිකයින්ට ලබා දෙන බව ඉදිකිරීම්, ඉංජිනේරු සේවා, නිවාස හා පොදු පහසුකම් අමාත්‍ය විමල් වීරවංශ මහතා පවසයි. අමාත්‍යවරයා මේ බව සඳහන් කළේ දහම් පාසල් දරුදැරියන්ට පෝෂණයෙන් පිරී දේශීය උදෑසන ආහාර වේලක් ලබාදීමේ වැඩසටහන් මාලාවේ සමාරම්භක උත්සවයට ප්‍රධාන ආරාධිතයා වශයෙන් සහභාගි වෙමිණි.

මෙහිදී වැඩිදුරටත් අදහස් දැක්වූ විමල් වීරවංශ අමාත්‍යවරයා “මේ ප්‍රවෘත්තිය මාධ්‍යවලින් ප්‍රචාරය වූවාට පසුව ප්‍රීමා සමාගමේ මහත්වරුන්ට අවශ්‍යනම් මට නඩු පවරන්න පුළුවන්. ප්‍රීමා පිටි කම්හල තියෙන්නේ ත්‍රිකුණාමලය වරාය අසල. මේ කර්මාන්ත ශාලාවට දවස් 5කට වතාවක් විතර විශාල නැවක් එනවා. ඒ නැවෙන් ගෙන එන තිරිගු ප්‍රීමා කම්හල ඇතුළට ගොඩබානවා. ඊට පස්සේ නැව  දවස් 5 ක් පමණ නිකන් නතරකර තබාගෙන ඉන්නවා. විශාල ලාභයක් නැත්නම් නෞකාවක් නිකරුණේ නැංගුරම්ලා වරායේ නතර නොකරන බව ඕනෑම කෙනෙකු දන්නවා. ඒ නැව එසේ දවස් 5 ක් නිකන් තියාගෙන ඉන්නේ අර ගෙනාපු තිරිගුවල ගුණය තිබෙන පොත්ත සහිත කොටස ඒ නැවටම දාගෙන යළි රැගෙන යන්නයි. ඒ අනුව පොත්ත සහිත පෝෂණය තියෙන කොටස යළි යුරෝපා ජාතියට ලබාදී අපිට ලබාදෙන්නේ ගුණයෙන් තොර රොඩ්ඩයි. ඒ කියන්නේ අපට දෙන්නේ සීනි තියෙන දියවැඩියා ප්ලස් තිරිගු පිටි ටිකයි.

යුද්ධයෙන් විනාශයට පත්වූ  ජපානය යළි නැගී සිටියේ කොහොමද?  ජපන් ජාතිකයාගේ මොළය මේ තරම් තාක්ෂණික නිෂ්පාදන  නිපදවන තත්ත්වයට  දියුණු වුණේ කොහොමද? ජපානය ඔවුන්ගේ ආහාර පරිභෝජන රටාව  හා අධ්‍යාපන රටාව වෙනස් කළා. අපි කෑවොත් උෂ්ණයි කියලා ඉවත දමන “බලයා” මාළුවා  ජපනා හැම තැනකින්ම අල්ලාගෙන යනවා. ඒ මාළුවා අපට  විශවෙන්නේ  අපි  ඒ මාළුවා  පැය ගණනක් නිකන් එළිමහනේ  තියලා ආහාරයට ගන්න නිසා.  ඒත් අල්ලාගත් අවස්ථාවේ ඉදන් අධිශීතකරණයෙන් අධිශීතකරණයට ගිහින් ඒ වගේම ශීතරකණයක තබා ජපන් ජාතිකයාගේ ආහාරවේලට එකතුවන  බලයා  තරම්  මොළය වර්ධනට වීමට උපකාරවන තවත් මාළු වර්ගයක් නැති තරම්. ජපන් ජාතිකයා ඒ නිසා අපේ බල මාළු ටිකත්  අල්ලගෙන ගිහින් ඔවුන්ගේ ආහාරයට ගනිද්දී අපි උෂ්ණයි කියලා අපේ දරුවන්ට  බල මාළු කවන්නේ නෑ.  ඒ අනුව ජපානයේ එතරම් ඥාණවන්ත දරුවන් නිර්මාණය වුණේ ඔවුන් මාළුන් ඉතා විශාල වශයෙන් ඔවුන්ගේ ආහාර පරිභෝජනයට එකතු කිරීම නිසයි. ඔබ දකින්නට ඇති පසුගිය ලෝක කුසලාන ක්‍රිකට් තරඟාවලිය විකාශය වන අවධියේ  ඉන්දියානු රජයෙන් පළ කළ එක්තරා වෙළඳ දැන්වීමක්. ඒකෙන්  කියවුණේ  බිත්තර  වැඩි වැඩියෙන් ආහාරයට ගන්න කියලා. ඒ ඇයි බිත්තර මොළය වර්ධනයට උපකාර වන නිසා. ඒ නිසා  ඉන්දියාව බිත්තර ආහාරයට ගැනීම ප්‍රචලිත කරනවා. ඒත් අපට කියලා තියෙන්නේ බිත්තර ආහාරයට ගත්තහම කොලෙස්ටරෝල් වගේ  ලෙඩ එනවා කියලා. ඒත් පාම්පිටි කෑමෙන් සීනි එනවා කියලා කවුරුත්  කියන්නේ නෑ. මොළයට මොනවාහරි ලැබෙන ආහාරයක් කෑවොත්  මොනවාහරි කියලා ඒක නවත්වන්න උත්සාහ කරනවා. ඒත් පොත්ත පිටරටට දීලා  රොඩ්ඩ අපි කන පාන් කෑවහම වෙන්නේ මොනවද කියලා කවුරුවත් කියන්නේ නෑ.මේ රටේ ජනමාධ්‍ය ආයතන බොහොමයක් මේ මහා සමාගම් ජාලය විසින් ඔවුන්ට නතුකරගෙන තියෙන්නේ. ඒ නිසා අපිට අද  සිදුවෙලා  තියෙනවා වෙනත් අරගලයක් මේ වෙනුවෙන් කිරීමට. ඒ අනුව මේ වගේ කුඩා ජන කණ්ඩායම්  අතර ගෙනයන කතිකාවක්  ඒ සඳහා  අවශ්‍යයි.

ඒ අනුව අපි අපේ දරුවන්ට අපේ අනන්‍ය ජීවන රටාව කියාදිය යුතුයි. ඒ පන්නරේ ඇති දරුවෙකුට පමණයි ලෝකය ජයගන්න පුළුවන්. චීන ජාතිකයා අද  ලෝකය ජයගන්නේ  ඔවුන් තුළ තියෙන  චීන අනන්‍යතාවය නිසයි.  ඔහු ලොව කොයි  රටට ගියත්  කන්නේ ඔවුන්ට  උරුම කෝටු කෑලි දෙකෙන්. අපි තමයි  කොහේ ගියත් අත පැත්තක දාලා ගෑරුප්පුවෙන්, හැන්දෙන් ඇණ ඇණ ඉන්නේ.

ඒ අනුව  අපට ඒ වෙනස අවශ්‍ය නම් ඒ වෙනස මේ දරුවන්  තුළින්  තමයි  ඇති කළ යුතු වන්නේ. ඒ නිසා  අපි ඔවුන්ගේ මනසට ලබාදිය යුතුයි,  අපේ අතීත මුතුන් මිත්තන් ආහාරයට ගත් ආහාර රටාව. සුදු ජාතිකයන් වෙල්ලස්ස අරගලය නතර කරන්න අපේ හේන්, කුඹුරු, ගෙවතු සියල්ල විනාශ කළේ මෙන්න මේ හේතුව නිසා. අද වන විට අපි ආහාර අතින් ස්වයංපෝෂිත නෑ. අපේ කඩ සාප්පුවල පිරිලා තියෙන්නේ විදේශ රටවලින් ආනයනය කරන භාණ්ඩ. අපේම  ජනතාව වෙළඳ පොළකින් දේශීය නිෂ්පාදනයක් මිලදී ගන්න දක්වන්නේ අකමැත්තක්. මෙන්න මේ වගේ පටු මනෝභාවයන්ගෙන් මිදුනු සමාජයක්  ගොඩනංවන්න බැරිනම්  රටක යහපත් පරිවර්තනයක් කරන්න  කොතෙක් අපි උත්සාහ කළත්  එය සාර්ථක ව්‍යායාමයක් වන්නේ නෑ”

මෙහිදී  අමාත්‍යවරයා  ශ්‍රී ලංකික ජනතාවට උරුම වූ අතීත අනන්‍යතාවය පිළිබඳව ද මෙසේ කරුණු දැක්වීය. “ අද  බොහෝ විට කොළඹ ආශ්‍රිතව  ජීවත්වන ජනතාවගෙන් ඇහුවොත් සිංහල බෞද්ධකම කියලා කියන්නේ මොකක්ද කියලා ඔවුන්ට ඒ  සම්බන්ධයෙන් දෙන්න උත්තරයක් නෑ. අපේ රට  අනන්‍යතාවයක් ඇතුව ගොඩනැගුනු රටක්. මේ රට ලෝක දැනුමට තමන්ගේම වූ දැනුම දායාද කළ රටක්. එහෙම නැති බොහොමයක් රටවල්  තියෙනවා. දැන් අපි කතාකරන මැදපෙරදිග රටවල් කියන ඒවා අතීතයේ විශාල කාන්තාර. මේවා  බොහොමයක් අතීතයේ මංකොල්ල කාරයින් විසින් අල්ලාගත් ප්‍රදේශ. තවත් සමහර  රටවල් තියෙනවා හිරකාරයින් ගෙනත්දාපු ප්‍රදේශ. ඕස්ට්‍රේලියාවත් එහෙම  රටක්. ලෝකේ සෑම රටක්ම ඉතා විශිෂ්ට ඉතිහාසයක්, ලෝකයට දායාද කළ රටවල් නෙවෙයි.

එහෙත් අපි අති ශ්‍රේෂ්ඨ ජාතියක්. අපි අක්ෂර මාලාවකුත් එක්ක භාෂාවක් නිර්මාණය කරගත් රටක්. ලෝකයේ බොහෝ භාෂාවල් තියෙනවා. එහෙත් අක්ෂර මාලාවක් නිර්මාණය වූ භාෂාවල්  ලෝකයේ  තියෙන්නේ ඉතා අඩුවෙන්. යුරෝපයේ  වුණත් බොහොමයක් භාෂා තිබුණට ඔවුන්ට අයත් අක්ෂර මාලාව වන්නේ ඉංග්‍රීසි අක්ෂර මාලාව. ඒත් සිංහලයා කියන්නේ  අපටම කියලා භාෂාවක් අපටම කියලා අක්ෂර මාලාවක් බිහිකරගත් ජාතියක්.

ඒ වගේම තමයි අපිට කාගෙවත් අනුන්ගේ කෑම කන්න ඕනෙ නෑ. අපි අපටම කියලා ආහාර පරිභෝජන රටාවක් ගොඩනගා ගත් ජාතියක්. අපේ පොළොවේ  වැවෙන ශාක එක්ක බැඳුනු, අපේ ජීවන රටාවට සරිලන, අපේ දේශගුණයට ගැළපුණු ආහාර රටාවක් අපිට තිබුණා. ඒ වගේම අති දියුණු වෛද්‍ය දැනුමක් අපි නිර්මාණය කරගෙන  තිබුණා. එය අපේ රටට  අනන්‍ය වෛද්‍ය දැනුමක්. ඒ නිසා තමයි  ලොකේ පළමුවන විධිමත් රෝහල අනුරාධපුර රාජධානියෙන් හමුවන්නේ. අපේ‍ මහා සංඝරත්නය කියන්නේ එක්තරා  යුගයක  ඒ  මා හැඟි වෛද්‍ය දැනුම පරපුරෙන් පරපුරට දායාද කළ පිරිසක්. ඔවුන් වෛද්‍යවරු වශයෙන් තමන්ගේ කාර්ය ඉටු කළා වගේම ඒ දැනුම පුස්කොළ පොත්වල ලියලා අනාගත පරපුරට දායාද කළෙත් උන්වහන්සේලා.

ඒ විතරක් නොවෙයි. කාලයාගේ ඇවෑමෙන් වුවත් විනාශයට නොයන අසිරිමත්ම මිනිස් නිර්මාණය කළ ජාතියත් අපි. ඒ තමයි වැව නිර්මාණය කිරීම. වෙන ඕනෑම නිර්මාණයක් අවුරුදු සිය දහස් ගණනක් ඇවෑමෙන් වැනසෙන්න පුළුවන්. ඒ සියල්ල විනාශ වුණත්  අන්තිමටම විනාශවෙන මානව නිර්මාණය විය යුත්තේ වැව. ඒකට හේතුව වැව කියන්නේ සොබාදහමට බලෙන් පටවන ලද නිර්මාණයක් නොවීමයි. සොබාදහම හා වැව අතර තියෙන්නේ  ඉතා සොදුරු මිතුදමක්. මේ වැව අපේ නිර්මාණයක්. අනුරාධපුර, පොළොන්නරු රාජධානි යුගවල තියෙන වාර්මාර්ග පරීක්ෂා කළහම  අපට පේනවා මොනතරම්  වාරි ඉංජිනේරු දැනුමත් අපේ මුතුන්මිත්තන්ට තිබුණද කියලා.

ඒ විතරක් නොවෙයි අපේ ආදිතම අගනුවර චෙව්ව අනුරාධපුර නගරයේ තිබූ බදු ක්‍රම, නීති රීති, පාලන රටා ආදිය අධ්‍යනය කළ විට අපට වැටහෙනවා කොයිතරම්  දේශපාලන දැනුමක් මේ රටට අතීතයේ  උරුමවෙලා තිබුණද කියලා. ඒ දැනුම තමයි එදා අධිරාජ්‍යවාදීන්  විශාල වශයෙන් විනාශ කළේ. මේ රටේ අපටම කියලා සටන් කලාවක් තිබුණා අංගම්පොර කියලා.

ඒ අනුව බලනකොට අපිටම කියලා භාෂාවක්, අක්ෂර මාලාවක්, ආහාර සංස්කෘතියක්, වෛද්‍ය දැනුමක්, සටන් කලාවක්. සෞන්දර්ය කලාවක් අපිට තියෙනවා.  වානේ නිපදවීමට ලොකයේ පැරණිම තාක්ෂණය තිබුණේ අපේ රටේ. සීගිරිය ආසන්නයේ අද  ඉන්නේ ඒ ක්‍රිස්තු පූර්ව යුගයේ අරාබි ජාතිකයාට “ ඩමෙස්කස් ”  කඩුව හදන්න පිරිසිදු වානේ නිපදවූ අපේ මුතුන් මිත්තන්ගේ පරපුර.

එහෙත් සුදු අධිරාජ්‍යවාදීන් කළේ ඔවුන් ගිය ගිය යටත් විජිතවල දැනුම කොල්ලකාපු එක. එහෙම කොල්ල කාගත් දැනුම පසුව ඔවුන් ඔවුන්ගේ දැනුම වශයෙන් ලෝකයට ඉදිරිපත් කළා.දැන් ඉස්කෝලේ නිවාසාන්තර ක්‍රීඩා උත්සවයකට ගියත්  ඒක නිවේදනය කරන ශිෂ්‍යයා හෝ ශිෂ්‍යයාව ඒ නිවේදන කාර්ය කරන්නේ ඉංග්‍රීසියෙන්. දහම් පාසලක උත්සවයකට ගියත්  ඒකෙන් ඉංග්‍රීසි කතාවක් තියෙනවා. එයින් පේන්නේ ඉංග්‍රීසිය පාචිච්චි කරන්න උගන්වනවට වඩා දැන් ඉංග්‍රීසි සංස්කෘතියට අපි අපේ දරුවන්ව රැගෙන යමින් ඉන්නවා කියන කාරණයයි. ලෝකයේ  ඉහළම කෝටිපතියන් කිහිපදෙනා අතරින් කෙනෙක් වූ මයික්‍රොසොෆ්ට් සමාගම් හිමිකරුවා කියන්නේ තමන් තමන්ගේ දරුවන් තිදෙනාගෙන් දියණියන්  දෙදෙනාට   අවුරුදු 13 වෙනකන් ජංගම දුරකථන භාවිතයට ඉඩ නොදෙන බවයි. 13 දී ජංගම දුරකථන භාවිතා කිරීමට ඉඩ දුන්නොත් 13 සිට 16 වන තෙක් ඔවුන් දුරකතනයෙන් කරණාදෙය පිළිබඳව තමා හා තම බිරිඳ නිරන්තරයෙන් අවධානයෙන් ඉන්න බවයි.  ඒ කියන්නේ  අවුරුදු 16 වෙනකන් ඔහු ඔහුගේ පාලනයට යටත්වයි  තම දියණියන්ට ජංගම දුරකතන ලබාදෙන්නේ. මේ දුරකථනය කියලා කියන්නේ ළමයින්ගේ  ළමා කාලය නැතිකරන මෙවලමක්. ළමයින්ට ළමා කාලයට අයත් ජීවිතයක් තිබිය යුතුයි. එහෙත් අද ළමයි බැළුවොත් ඔවුන් එක්කෝ ජංගම දුරකථනයෙන් මොනවාහරි ඔබනවා නැත්නම් කොම්පියුටරය ඉදිරියේ භාවන කරනවා” යනුවෙන්ද විමල් වීරවංශ අමාත්‍යවරයා මෙහිදී වැඩිදුරටත් පැවසීය.

දෙල්ගහවත්ත ශ්‍රී ජිනවංශාරාමය දහම් පාසල, හේනවවත්ත ශ්‍රී මහින්ද දහම් පාසල හා ශ්‍රි රාහුල මහා විද්‍යාලයේ ශ්‍රි රාහුල දහම් පාසල යන දහම් පාසල් වල දරු දැරියන් 600 කට අධික පිරිසකට පෝෂණයෙන් පිරි ගුණාත්මක ආහාර වේලක් ලබාදීමේ වැඩසටහන මෙදින ආරම්භවිය. ප්‍රදේශයේ ධානපතියන්ගේ හා දෙමාපියන්ගේද ආධාර උපකාර ඇතිව මෙම සමාජ සත්කාරය මෙහෙයවනු ලබන්නේ පංචායුධ පදනම විසින් වන අතර 2013 වර්ෂය පුරා මෙය අඛන්ඩව සිදු කිරීමට ඔවුන් බලාපොරොත්තු වේ.

w-prima

47,875 Viewers

——

cnewsgossip99_22_0gossoplanka8g

Add-here-new

contactus-n