හොර ලිහිසි තෙල්, කලවම් කළ ලිහිසි තෙල් ව්‍යාජ වෙළඳ නාම යටතේ මෙරට ජයටම විකුණන බවත් එවැනි ලිහිසි තෙල් යෙදීම මගින් වාහන එන්ජින් විනාශ වන බවත් කර්මාන්තයේ නියුතු නිළධාරීන් කියයි.

ලිහිස් තෙල් ආනයනය කිරීම, නිෂ්පාදනය හා බෙදාහැරීම ලංකාවේ බලපත්‍ර ලාභී කර්මාන්තයක් වන අතර ලිහිසි තෙල් මෙරටට නිදහසේ ආනයනය කිරීමට අවස්ථාවක් නොමැත.

කොළඹ පැවති ලිහිසි තෙල් කර්මාන්ත කරුවන් සහභාගී වූ සමුළුකදී අදහස් දක්වසමින් Chevron Lubricants Lanka සමාගමේ ප්‍රධානී කිෂූ ගෝමස් සඳහන් කළේ බලපත්‍ර ලාභී බෙදාහරින්නන් 13 ක් සිටින විට මෙම ව්‍යාපාර කටයුතු කරන තවත් 17 ක් පමණ මෙරට සිටින බවයි.

මෙම සමහර ව්‍යාපාරිකයින් බාල තෙල් යොදා ගනිමින් ලිහිසි තෙල් කලවම් කර විකුණන බවත් පවතින වෙළඳ නාම අනුකරණය කරමින් ව්‍යාජ ආකාරයෙන් වෙළඳ නාම සකසන බවත් ගෝමස් මහතා මෙහෙදී පෙන්වා දුන්නේය.

සමහරුන් මේවා තොග වශයෙන් බැරල්වල බහා කිසිදු වෙළඳ නාමයක් නොමැති විකුණන බවද හෙතෙම සඳහන් කළේය.

අඩුම ගණනේ එක් ව්‍යාපාරිකයෙකු හෝ ලිහිසි තෙල් බලපත්‍රයක් නොමැතිව මෙරටට ආනයනය කර බෙදා හරින බව හෙතෙම මෙහිදී කීය.

මීට අමතරව, තවත් කණ්ඩායමක් පිරවුම්හල් වලින් පාවිච්චි කළ එන්ජින් ඔයිල් ගෙන ඒවා පිරිපහදු කර විකුණන බවද ගෝමස් මහතා සඳහන් කළේය.

මෙවැනි ලිහිසි තෙල් යෙදීම මගින් වාහනවල එන්ජින් වලට හානි සිදුවන බව හෙතෙම පැවසූ අතර මෙරට ලිහිසි තෙල් වෙළඳ පොළේ වසරකට ලීටර් මිලියන 60 ක් පමණ අලෙවි වන බවට ඇස්තමේන්තු කර තිබේ.

මින් ලීටර් මිලියන තුනක් පමණ නීතියට පිටින් තිබෙන වෙළඳ පොළේ විකිණෙන බවට ඇස්තමේන්තු කර ඇත.

- vimasuma.com