අගවිනිසුරු විසින් නීතිපතිගේ ඉල්ලීමකින් ගතයුතු තීරණයක් කැබිනට් මණ්ඩලය ගනී.. අධිකරණයට බරපතල අතපෙවීමක්..

පිවිතුරු හෙල උරුමයේ නායක පාර්ලිමේන්තු මන්ත‍්‍රී උදය ගම්මන්පිල මහතා එම පක්‍ෂ මූලස්ථානයේ පැවති මාධ්‍ය හමුවක් අමතමින් මෙසේ අදහස් පල කලේය.

‘එජාපයේ ඉන්නා මන්ත්‍රිවරුන් සියළු දෙනා එක හඬින් කිව්වේ රාජපක්ෂවරුන්ට දඬුවම් කරන්න විශේෂ අධිකරණ පිහිටුවන්න කියා. ඒක කලේ නැති වුණාම රාජපක්ෂවරු රකිනවා කියලා විජේදාස ඇමතිතුමාට දොස් කියනවා. ඒකාබද්ධ විපක්ෂයත් එක්ක ඩීල් දාලා කියලා චෝදනා කරනවා. නමුත් විශේෂ අධිකරණ පිහිටුවීමට ව්‍යවස්ථාවේ ඉඩක් නැහැ. එසේ ඉඩක් නැති නම් විජේදාස ඇමතිතුමා මොනවා කරන්න ද? දැන් විශේෂ අධිකරණ පිහිටුවන්න බෑ කියන්නේ කවුද? හිටපු නීතිපති තිලක් මාරපන සහ ජනාධිපති නීතිඥ විජේදාස රාජපක්ෂ වගේ නීතිය මෙලෝ හසරක් නොදන්න අය. විශේෂ උසාවි පිහිටුවිය යුතුයි කියන්නේ කවුද? හිටපු අගවිනිසුරු රාජිත සේනාරත්න. ජනාධිපති නීතිඥ රන්ජන් රාමනායක. නීතිය පිළිබඳ මහචාර්ය පා ච රණවක. දැන් ඉතින් කාරණය පැහැදිලියිනේ.

අවසානයේ දී රාජිත ඇමතිතුමා තමන්ගේ ගැලවුනු රෙද්ද යලි ඇද ගැනීමේ අරමුනින් කියනවා විශේෂ අධිකරණයක් වෙනුවට ත්‍රිපුද්ගල විනිසුරු මඩුල්ලක් ඉදිරියේ රාජපක්ෂවරුන්ගේ නඩු ඇසීමට ඇමති මඩුල්ල තීරණය කළාලු. මුළු ඇමති මණ්ඩලයටම නීතිය දන්න එක් කෙනෙකුවත් හිටියේ නැද්ද? අපේ රටේ නීතියේ හැටියටනම් ත්‍රිපුද්ගල විනිසුරු මඩුල්ලක් නැතිනම් රජතුන්කට්ටුවක් නඩුවක් ඇසීමට පත් කරන්නේ නීතිපතිගේ ඉල්ලීම මත අගවිනිසුරුයි. ඒ මිස ඇමති මණ්ඩලයට නඩු ඇසීම් පිළිබඳ තීන්දු ගන්න බෑ. අගවිනිසුරුවරයා විසින් නීතිපතිගේ ඉල්ලීම මත ගතයුතු තීරණයක් අමාත්‍යමණ්ඩලය විසින් ගනු ලබන්නේ නම් එය සෘජුව අධිකරණයට අතපෙවීමක්. මෙතරම් අධිකරණයට ඇඟිලි ගැසූ යුගයක් ලංකා ඉතිහාසයේ කවදාවත්ම තිබුණේ නෑ’

– අරවින්ද අතුකෝරල