අධ්‍යාපන අමාත්‍යාංශයට අධි සැප වාහන 7ක්‌ කුලියට ගනී.. වසරක කුලිය කෝටි නමයහමාරයි..

December 9, 2016 at 7:06 am | lanka C news
අධ්‍යාපන අමාත්‍යාංශයට අධි සැප වාහන 7ක්‌ කුලියට ගනී.. වසරක කුලිය කෝටි නමයහමාරයි..

අවශ්‍ය තරම් වාහන තිබියදීත් වසර පහකට රුපියල් නව කෝටි හතළිස්‌ පන්ලක්‍ෂයක බදු පදනම මත අති සුඛෝපභෝගී වාහන හතක්‌ කුලියට ගැනීමට අධ්‍යාපන අමාත්‍යාංශය තීරණය කර ඇත.

අමාත්‍යාංශ ලේකම් සුනිල් හෙට්‌ටිආරච්චි මහතා සහ අතිරේක ලේකම්වරුන් හයදෙනා සඳහා මෙම වාහන කුලියට ගැනෙන අතර ලේකම්වරයාගේ වාහනය සඳහා පමණක්‌ වසරක කුලිය රුපියල් පනස්‌ ලක්‍ෂ හැත්තෑහය දහස ඉක්‌මවයි. එතරම් අධික කුලියකට ගැනෙන්නේ අති නවීන බී.එම්.ඩබ්ලිව්. රථයකි.

අමාත්‍යාංශ ලේකම්වරයකුට වාහනයක්‌ බදු කුලියකට ලබාගත හැකි උපරිම මුදල මෙම වාහනය වෙනුවෙන් වැය කෙරේ. හිටපු ලේකම් ඩබ්ලිව්. එම්. බන්දුසේන මහතා විසින් පාවිච්චි කරන ලද නිල රථය තිබියදී මෙම නව රිය ලබා ගැනීමට තීරණය කිරීම විශේෂත්වයකි.

මීට අමතරව අතිරේක ලේකම් තනතුරු හය සඳහා ගැනීමට නියමිත වාහන වෙනුවෙන් වසරක කුලිය රුපියල් එක්‌කෝටි තිස්‌අට ලක්‍ෂයකි. ලේකම්වරයා ඇතුළු හත් දෙනාට මෙම වාහන කුලියට ගැනෙන්නේ වසර පහක කාලයක්‌ වෙනුවෙනි. එම කාලය සඳහා වාහන කුලියට ගන්නා පෞද්ගලික ආයතනවලට අමාත්‍යාංශය ගෙවිය යුතු මුදල රුපියල් නවකෝටි හතලිස්‌ පන්ලක්‍ෂයකි. එතරම් මුදලක්‌ ගෙවීමෙන් පසුවද කිසිදු වාහනයක්‌ අමාත්‍යාංශයට හිමි නොවේ.

මෙලෙස වාහන කුලියට ගැනෙන්නේ මුදල් අමාත්‍යාංශය විසින් නිකුත් කරනු ලැබ ඇති චක්‍රලේඛය ප්‍රකාරව යෑයි මේ සම්බන්ධයෙන් අප කළ විමසුමකට පිළිතුරු දුන් අමාත්‍යාංශ ප්‍රකාශකයෙක්‌ පැවැසීය.

කෙසේ වුවද නව වාහන කුලියට ගත හැක්‌කේ අදාළ නිලධාරීන් පාවිච්චි කරන වාහන දසවසරක්‌ ඉක්‌මවා ඇත්නම් පමණක්‌ වන අතර දැනට අමාත්‍යාංශයේ ඉහත නිලධාරීන් පාවිච්චි කරන වාහන අතරින් දස වසර ඉක්‌මවා ඇත්තේ එක්‌ වාහනයක්‌ පමණි.

– දිවයින

26 views

One Comment to “අධ්‍යාපන අමාත්‍යාංශයට අධි සැප වාහන 7ක්‌ කුලියට ගනී.. වසරක කුලිය කෝටි නමයහමාරයි..”

  1. sudu says:

    මේ මොන අපරාධයක්ද?

    මේ කතාව ඇත්තක් නම් හෙණ ගහන්න ඕන මුන් ඔක්කෝටම.

    පාසලක්, ගුරුවරයෙක්, ළමයෙක් නැති පාසල් අනන්තවත් තිබියදී මෙවැනි සැප ගන්නා නිලධාරීන් වැදූ මව්පියන්ටද මොවුන් කරන්නේ අපි ලවා අම්මා තාත්තා මතක් කර ගැනීමකි. මේ රටේ හැම සම්පතක්ම පිරිසක් එක්වී මේ ආකාරයට කබාසීනියා කරමින් සිදුකරන මේ විනාශය දෙස කෙසේ නම් බලා ඉන්නදැයි මේ ප්‍රවෘත්ති කියවන විට අපිට අසන්න තියෙන එකම ප්‍රශ්නයයි.

    රටම කනවා මේ රටේ දේශපාලන පක්ෂ හැම දේශපාලනඥයාම ඔක්කෝම එකයි. හොඳයි කියලා එකෙක් නෑ. රටක් ජාතියක් ගැන තියා දරුවෙක්ගේ අනාගතයක් හිතන්න පුළුවන් විශිෂ්ට සමාජ සේවකයින් අදත් නැත හෙටත් නැත අතීතයේ සිටි ඔවුන් නැවත නැඟිටින්නේ ද නැත.

Main News