අවුරුදු දොළහට වැඩි දරුවන්ට කොරෝනා එන්නත්…- අගමැති

August 15, 2021 at 6:47 pm | lanka C news
අවුරුදු දොළහට වැඩි දරුවන්ට කොරෝනා එන්නත්…- අගමැති

වයස අවුරුදු 12ට වැඩි ළමයින්ටත් පියවරෙන් පියවර කොවිඩ් ප්‍රතිශක්තීකරණ එන්නත් ලබා දීමේ වැඩපිළිවෙලක් රජය විසින් සැළසුම් කර ඇති බව ගරු අග්‍රාමාත්‍ය මහින්ද රාජපක්ෂ මහතා අද (15) දින පැවසීය.

හම්බන්තොට රෝහලේ ස්ථාපිත දකුණු පළාත් කොවිඩ්-19 ළමා ප්‍රතිකාර ඒකකය විවෘත කිරීමේ අවස්ථාවට තංගල්ල කාල්ටන් නිවසේ සිට වීඩියෝ තාක්ෂණය ඔස්සේ එක්වෙමින් අග්‍රාමාත්‍ය මහින්ද රාජපක්ෂ මහතා මේ බව අවධාරණය කළේය.

ළමයින්ට එන්නත් ලබා දීමේ දී විවිධ සංකූලතා තිබෙන දරුවන්ට එහි දී ප්‍රමුඛත්වය ලබා දෙන බව ද අග්‍රාමාත්‍යතුමා කියා සිටියේය.

අග්‍රාමාත්‍ය ආර්යා ශිරන්ති රාජපක්ෂ මහත්මිය චාරිත්‍රානුකූලව පොල්තෙල් පහන දල්වමින් හම්බන්තොට රෝහලේ ස්ථාපිත දකුණු පළාත් කොවිඩ්-19 ළමා ප්‍රතිකාර ඒකකය විවෘත කළාය. අනතුරුව ඇය එහි වෛද්‍යවරුන් ඇතුළු හෙද කාර්ය මණ්ඩලය සමඟ නිරීක්ෂණ චාරිකාවක ද නිරත වූවාය.

හම්බන්තොට රෝහලේ කොවිඩ් ප්‍රතිකාර කටයුතු පළමුව ආරම්භ වූයේ 2020 වසරේ මාර්තු මාසයේ දී ය. එතැන් පටන් මේ දක්වා රෝගීන් 6000කට පමණ එමගින් ප්‍රතිකාර කර තිබේ.

කොවිඩ් වැළඳෙන ළමයින් සඳහා මෙතෙක් ප්‍රතිකාර ක්‍රියාත්මක වී ඇත්තේ කාන්තා වාට්ටු සංකීර්ණයේය.

නව ඒකකය ස්ථාපිත වීමත් සමඟ ළමයින් වෙනුවෙන් විශේෂ අවධානයක් යොමු කිරීමට හැකිවනු ඇති බව වෛද්‍යවරු පවසති.

කොවිඩ්-19 ළමා ප්‍රතිකාර ඒකක සෑම පළාතකම ස්ථාපිත කිරීම ළමා රෝග විශේෂඥ වෛද්‍ය සංගමයේ සංකල්පය වී තිබේ.

දකුණු පළාත් කොවිඩ්-19 ළමා ප්‍රතිකාර ඒකකය විවෘත කිරීමේ අවස්ථාවට එක්වෙමින් වීඩියෝ තාක්ෂණය ඔස්සේ ගරු අග්‍රාමාත්‍ය මහින්ද රාජපක්ෂ මහතා කළ සම්පූර්ණ කතාව මෙසේය.

මිත්‍රවරුනි,

අපේ රටේ ළමා පරපුර ආරක්ෂා කර ගැනීම අප සියලු දෙනාම සතු වගකීමක්. ඔවුන් තමයි අපේ රටේ අනාගතය. අද දෙමාපියන් වගේම රජයක් විධියට අපිත් දරුවන් ගැන විශේෂ අවධානයක් යොමු කරන බව ඔබ තමුන්නාන්සෙලා දන්නවා.

ඉතිහාසය අරගෙන බැලුවම විවිධ වසංගත වලට  ලෝකය මුහුණ පාලා තියෙනවා. කොතරම් තාක්ෂණයෙන් දියුණු වුණත් මේ වගේ වසංගතවලට නිශ්චිත විසඳුම සොයා යෑම ඉතා දුෂ්කර කාරණයක් බවයි හැමෝම පිළිගන්නෙ.

ඒ නිසා අපි මේ වගේ කාලයක වෙනදාටත් වඩා ශක්තිමත්ව,එකමුතුකමින් මෙවැනි වසංගතයන්ට මුහුණ දෙන්න ඕනි.

වෛද්‍යවරුන් හෙදියන් ඇතුළු රෝහල් කාර්ය මණ්ඩල, ත්‍රිවිධ හමුදාව පොලීසිය ඇතුළු රාජ්‍ය සහ පෞද්ගලික අංශයේ විශාල පිරිසක් මේ වනවිටත් කොවිඩ් වසංගතයෙන් ජනතාව ආරක්ෂා කරගන්න දිවා රෑ වෙහෙසෙනවා.

ඒ වෙනුවෙන් ඔවුන් කරන කැපවීම රජයක් විධියට අපි හැමදාමත් අගය කළා.අගය කරනවා. ඒ විතරක් නෙමෙයි රටේ මුළු මහත් ජනතාවත් ඔවුන්ගේ මේ කැපවීම හදවතින්ම අගය කරනවා.

මිත්‍රවරුනි,

අපේ රටේ තියෙන්නෙ දරුවන්ට ආදරය කරන, ඔවුන්ට ප්‍රමුඛත්වය දෙන සංස්කෘතියක්. ඒ නිසා දරුවන් රැකගන්නෙ කොහොමද කියලා අපි නිතර කල්පනා කරනවා.

කොවිඩ් වසංගතය පැතිරිලා තමන්ගෙ දරුවන්ටත් මේ වසංගතයට මුහුණ දෙන්න වෙයිද කියලා දෙමව්පියන්ට බයක් තියෙනවා.

මමත් තාත්තා කෙනෙක් විධියට, මගේ බිරිඳ ශිරන්ති අම්මා කෙනෙක් විධියට දරුවන් ගැන හිතන විධිය, එතැනින් එහාට දරු මුණුපුරන් ගැන හිතන විධිය, ඔවුන්ට දක්වන ආදරය අපිට අමුතු දෙයක් නෙමයි. අපි හැමදාමත් මේ රටේ දරුවන් ගැන කල්පනා කළෙත් එහෙමයි.

ඒ නිසා අනෙකුත් ජනතාව මෙන්ම විශේෂයෙන් මේ  දරුවන්ව කොවිඩ්  වසංගතතයෙන් බේරා ගන්න අපි සෑම පියවරක්ම ගන්නා බව සිහිපත් කළ යුතු යි.

මිත්‍රවරුනි,

අපේ රටේ ළමා රෝග විශේෂඥ වෛද්‍ය සංගමය රට ගැන කල්පනා කරලා කවදත් අවශ්‍ය යුතුකම ඉටු කළ වෛද්‍ය සංගමයක්.

දරුවන් කොවිඩ් රෝගයෙන් ආරක්ෂා කරගන්න, ඔවුන්ගෙ ජීවිත රැකගන්න රජයට තිබෙන උනන්දුව දැකලා, ළමයින් වෙනුවෙන්ම හම්බන්තොට රෝහලේ කොවිඩ් ප්‍රතිකාර ඒකකයක් ආරම්භ කරන්න මේ අයට  හැකියාව ලැබුණෙ ඒ නිසයි.

අද මේ කාර්යය ඉටු කරපු විශේෂඥ වෛද්‍යවරුන් මා සමඟ කිව්වේ හැකි ඉක්මනින් අනෙකුත් පළාත්වලටත් මෙවැනි ප්‍රතිකාර ඒකකයක් ලබා දෙනවා කියලා. ඒ අනුව මේ කාර්යය අවසන්වනවිට හැම පළාතකටම ළමා  කොවිඩ් ප්‍රතිකාර ඒකකයකුත් ස්ථාපිත වෙනවා.

ඒ විතරක් නෙමෙයි, දරුවන්ගෙ අධ්‍යාපනය වෙනුවෙන් විශේෂ කැපවීම් කරන්නත් මේ වෛද්‍යවරුන් සූදානම්.

අරලියගහ මන්දිරයේ  තිබුණ පාසල් නැවත ආරම්භ කිරීම පිළිබඳ සාකච්ඡාවක දි මේ අය රටේ අධ්‍යාපන කලාප 99ටම විශේෂඥ වෛද්‍යවරයකු ගානේ පත්කරලා, දරුවන්ව බලාගන්නත් ඉදිරිපත් වුණා.

මිත්‍රවරුනි,

මුළු ලෝකයේම තිබෙන තත්ත්වය දැන දැනත් ඇතමුන් මේ වෙලාවෙත් ඉල්ලීම්වලටයි ප්‍රමුඛත්වය දෙන්නෙ. විසඳුමක් දෙන්න කාලයක් දෙන්න කියලා කිව්වත් මේ අය ඒවාට ඇහුම්කම් නොදී දරුවන්ට පාඩම් උගන්වන්නෙ නැතිව රජයට පාඩම් උගන්වන්න යනවා.

මේ වසංගතය ආපු වෙලාවේ අපි මුලින්ම පාසල් වහලා දැම්මේ දරුවන්ගේ ආරක්ෂාව වෙනුවෙන්.

ඔබට මතක නම් විටෙන් විට අවදානම පහව ගියත් අපි පාසල් නැවත විවෘත කළේ නැහැ.

එහෙත් මේ විධියට පාසල් වහලා තියන්න අපි කැමැතිත් නැහැ.

මොකද අපි දන්නවා අධ්‍යාපනය විතරක් නෙමෙයි විෂය බාහිර දැනුමත් පාසල තුළින් ලැබෙනවා. දරුවන්ට අනාගතයට මුහුණ දෙන්න අවශ්‍ය දැනුම තිබෙන්නෙ පත පොතේ විතරක් නෙමෙයි. පාසලේ දී ගුරුවරුන් අපට ජීවිතයත් කියා දෙනවා. ඒක අදට වඩා වටින්නෙ අනාගතයට.

ඒ නිසා ගුරු විදුහල්පති අනධ්‍යන කාර්ය මණ්ඩල එන්නත් කරලා අවසන් වූ වහාම වයස අවුරුදු 12ට වැඩි ළමයින්ටත් පියවරෙන් පියවර එන්නත් ලබා දීමේ වැඩපිළිවෙලක් ආරම්භ කරන්න රජය සැලසුම් සකස් කර අවසන්. එහිදිත් විවිධ සංකූලතා තිබෙන දරුවන්ට ප්‍රමුඛත්වය දෙන්නත් අප බලාපොරොත්තුවෙනවා.

මිත්‍රවරුනි,

අපිට විතරක් නෙමෙයි ලෝකයේ බොහෝ දියුණු රටවලටත් මේ වසංගතය පාලනය කර ගැනීම අද අභියෝගයක් වෙලා. දැනට තිබෙන එකම විසඳුම එන්නත්කරණය මගින් ජීවිත හානි මෙන්ම රෝගය පැතිරීම වළක්වා ගැනීම පමණයි.

අපි රටක් විධියට එන්නත්කරණය අතින් බොහෝ ඉදිරියෙන් ඉන්නවා. ඒත් මේ කටයුත්ත තව තවත් වේගවත් කරමින් ජනතාවගේ ජීවිත ආරක්ෂා කරගත යුතුයි.අපි  ප්‍රමුඛත්වය දෙන්නේ ඒ සඳහායි.

එහෙම තියෙද්දි අද ඇතමෙක් බොර දියේ මාලු බානවා. සමහරු ඒ අස්සෙ දේශපාලන කෝන්තරත් පිරිමහනවා. ඒක අලුත් දෙයක් නෙමෙයි. මේවා අපට හොඳට පුරුදුයි. ඒ නිසා මේවාට උත්තර දෙනවට වඩා වටින්නෙ ඒ කාලයත් තවත් ජීවිතයක් බේරාගැනීම වෙනුවෙන් යෙදවීම කියලයි අපි විශ්වාස කරන්නෙ.

මිත්‍රවරුනි,

රටේ සමස්ත ජනතාව ගැන කල්පනා කරලා ගන්න ඇතැම් තීන්දු ජනප්‍රිය නොවුනත් අපට එවැනි තීන්දු ගන්න වෙනවා. දැඩි සංචරණ සීමා පැනවීම වැනි තීන්දු ඔබේත් අපේත් සියලු දෙනාගේ ආරක්ෂාව වෙනුවෙන් ගත් ක්‍රියාමාර්ගයි.

ඔබ මෙවැනි අවස්ථාවක රජයේ වගකීම දෙස බලා සිටිනවා වගේම සෞඛ්‍ය මාර්ගෝපදේශ පිළිපදිමින් තම තමන්ට පැවරෙන යුතුකමත් ඉටුකරනවා නම් අපට මේ අභියෝගය ජය ගැනීම අපහසු නැහැ.

එවැනි වටපිටාවක අනාගත ළමා පරපුර ආරක්ෂා කරගැනීම වෙනුවෙන් රජයට සහයවන ළමා රෝග විශේෂඥ වෛද්‍යවරුන්ගේ සංගමයේ සියලුම වෛද්‍යවරුන්ටත්, අනෙකුත්  වෛද්‍යවරුන් ඇතුළු  රෝහල් කාර්ය මණ්ඩල සඳහාත් මාගේ ප්‍රණාමය නැවත වතාවක් පුද කරන්න කැමතියි.

ඔබ සැමට නිරෝගිමත් අනාගතයක් උදා වේවා! යැයි අග්‍රාමාත්‍යතුමා පැවසීය.

මෙම අවස්ථාවට තරුණ හා ක්‍රීඩා අමාත්‍ය නාමල් රාජපක්ෂ, රාජ්‍ය අමාත්‍ය ඩී.වී චානක,දකුණු පළාත් සභාවේ සභාපති සෝමවංශ කෝදාගොඩ, නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය ලාල් පනාපිටිය, ළමා රෝග විශේෂඥ වෛද්‍යවරුන්ගේ සංගමයේ සභාපති මහාචාර්ය ශාමන් රජීන්ද්‍රජිත්, ළමා රෝග විශේෂඥ වෛද්‍ය මහාචාර්ය සනත් ළමාබදුසූරිය, හම්බන්තොට රෝහල් අධ්‍යක්ෂ වෛද්‍ය සුරංග උඹේසේකර මහත්වරු ඇතුළු පිරිසක් එක්ව සිටියහ.

– රොහාන් වැලිවිට

26,999 views

11 Comments to “අවුරුදු දොළහට වැඩි දරුවන්ට කොරෝනා එන්නත්…- අගමැති”

  1. Asela Colombo says:

    ඔබතුමා කවදත් රට ජාතියට ආදරය කරපු නායකයෙක්. කොටින්ගේන් අපව බේරගත්තා වගේම කොරෝනා වලිනුත් අපව බේර ගන්න ජනාදිපතිතුමනි..!!

  2. Ishan Liyanage says:

    අපේ රටේ මාර්ග පද්ධති සංවර්ධනය කර, සංචාරක කර්මාන්තය දියුනු කර අපේ රටට විශාල සංවර්ධනයක් ගේන්න ඔබතුමන්ලාගේ විශාල දැක්මත් තිබුනා. මේ කොරෝනා වසංගතය සමඟ සංචාරකයන් පැමිනීම බොහෝ දුරට නැවතුනු නිසා ඒ දේවල් ප්‍රමාද වුනා.
    ඔබතුමන්ලාගේ එන්නත්කරන වැඩ පිළිවෙල අපිට විශ්වාසයි මහින්ද ජනාධිපතිතුමනි. විපක්ෂයේ කුහකකම් වලට නොසැලී ඉතිරියටත් අපව ආරක්ෂා කරන්න ජනපතිතුමනි.!

  3. Nalin says:

    අපේ අගමැති තුමත් දැන් සජිත්ට එකතුවෙලා වගේ .ඕව ගෙන්වන්ඩ ඩොලර් සංචිත උතුරන්ඩ තියෙනවනේ කොහොම උනත් විදේශ ණය අරගෙන හරි එන්නත් ගෙන්නුවොත් එක එන්නතකින් ඩොලර් 2ක් ලැබුනත් කීයක්ද .මීයක් කඩන්නේ අත ලෙව කන්ඩද.

  4. Saman Fernando says:

    Wairakkara jepi ballo Saha rajaka sjiyage ballo thopi maka bavila pals vesige puthala

  5. පාඨලී says:

    කපිතාන් එක්ක තරහට තමන්ගේ නැව ගිලෙනකන් බලන් ඉන්න මෝඩ රැළක් විපක්ශේ ඉන්නේ. මේ තරම් මාරන්තික ඩෙල්ටා ප්‍රභේදය පතිරෙද්දිත් පහු ගිය සතිය වෙනකන් රට පුරා උද්ඝෝශණ කරපු අනුරකුමාර සහ විපක්ෂයේ අනිත් කුහකයො දැන් කෑ ගහනවා රට වහපන් කියලා.

  6. මෝඩ බයියා says:

    සුනාමි සල්ලි ටික බැදුම්කර සල්ලි ටික සීනි බදු සල්ලි ටික එක්කහු කරා නම් ආසියාවටම කොවිඩ් ඉස්පිරිතාල අයි සී යූ හදල දෙන්න තිබ්බ.

  7. MD says:

    සර්වජන ඡන්ද බලය තියන අපි රටට හොඳ සංවර්ධනයක්,ආරක්ෂාවක්,නිදහසක් බලාපොරොත්තුවෙන් තමයි ඡන්දය පාවිච්චි කල යුතු වන්නේ.නමුත් දැන් මට වාසියක් ලැබෙනවනම් ඡන්දය දෙන්නම් කියලා තමයි කතිරය ගහන්නේ.ඵ් කියන්නේ දුන්නොත් දෙන්නම් මට්ටමින් තමයි කතිරය ගහන්නේ. රට දියුණු වෙයිද?

  8. Ravana parapura says:

    අපේ රටට සුද්දා එන්න කලින් වසංගත රෝග වලට දරුවන්ට දුන්නෙත් එන්නත් ද කනගාටුයි.

  9. කප්පම් රාල says:

    අවුරුදු දොලහට අඩු අය එක්කෙනෙක් වත් කොරෝනා වලින් මැරුන බව අසා නැහැ. එබැවින් මුලින්ම කර යුත්තේ වයස් ගත ජනතාවට එන්නත් දීමයි. ඔවුන් අතරත් මරණ ප්‍රතිශතය 2% ට අඩු බැවින් එන්නත් කරනය ව්‍යාපාරයක් බවට පත් වීමට පෙර මිනිසුන් හොඳ පුරුදු මගින් රෝගය පැතිරීම නවතා දැමිය යුතුය.

  10. කුඹුක්කණ් says:

    ගොං වැඩ කරන්න එපා බුරු වහන්සේ, ළමයි ටිකත් කන්න ද හදන්නෙ. නාකි උන් නෙවෙයි මේ රටේ අනාගතය. හදිසි භාවිතය යටතේ දුන්නෙ , දිගුකාලීන් අතුරු ආබාධ ගැන මොලෝ පරීක්ෂණයක් කරලා නැති, මගුලක් රටේ අනාගත පරපුරට ගස්ස්ලා වනසන්න ද හදන්නෙ.

Main News