ඉන්දියා-ශ‍්‍රී ලංකා ඒකාබද්ද ආයෝජන ව්‍යාපෘති අරඹන්න සූදානම්…

June 4, 2020 at 8:02 am | lanka C news
ඉන්දියා-ශ‍්‍රී ලංකා ඒකාබද්ද ආයෝජන ව්‍යාපෘති අරඹන්න සූදානම්…

කොවිඩ් 19 හෙවත් කොරෝනා වසංගතය හේතුවෙන් බිද වැටී ඇති මෙරට ආයෝජන , සංචාරක ක්ෂේත්‍ර නංවාලීමට ඉන්දීය රජයේ පූර්ණ සහාය පළ වේ. ඒ අනුව ඒ සදහා අවශ්‍ය මූල්‍යමය, තාක්ෂණික හා වෙනත් අවශ්‍ය සහයෝගයන් ඉදිරියේ දී ලබා දෙන බවට ශ්‍රී ලංකාවේ ඉන්දීය මහකොමසාරිස් ගෝපාල් බග්ලේ මහතා සහතික වෙයි.

කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා සමග එම අමාත්‍යාංශයේ දී පැවති සාකච්ඡාවක දී ඉන්දීය මහකොමසාරිස් මේ බව සදහන් කළේය.

මෙරට ඉන්දීය මහකොමසාරිස් ගෝපාල් බග්ලේ මහතා පත්වීමෙන් පසු හමු වූ පළමු කැබිනට් ඇමතිවරයා වන්නේ ද ඇමති ප්‍රසන්න රණතුංග මහතායි.

කොවිඩ් 19 වසංගතය පාලනය කිරීම සදහා ජනාධිපති ගෝඨාභය රාජපක්ෂ මහතා ප්‍රමුඛ වත්මන් ආණ්ඩුව ගත් ක්‍රියාමාර්ග පිළිබද ව සිය ප්‍රසාදය පළ කළ ඉන්දීය මහකොමසාරිස්වරයා ලෝකයේ කොවිඩ් 19 වසංගත තත්ත්වය පාලනය වීමත් සමගම ශ්‍රී ලංකාවට ආයෝජන හා සංචාරක ක්ෂේත්‍ර සදහා අවශ්‍ය සහයෝගය ලබා දෙන බව කීවේය.

ඉන්දියානු ව්‍යාපාරිකයන් මෙරට නව ආයෝජන අවස්ථා ලබා ගැනීමට කැමැත්තෙන් සිටින බව පැවසූ ඉන්දීය මහා කොමසාරිස්වරයා ආහාර සුරක්ෂිතතාවය, ඖෂධ නිෂ්පාදනය, කෘෂිකාර්මික නිෂ්පාදනය හා ඉන්ධන පිරිපහදුව සදහා මෙරට ආයෝජනයන්ට ඔවුන් වැඩි කැමැත්තක් දක්වන බව ද කීවේය. කොවිඩ් 19 වසංගත තත්ත්වයෙන් පසු ව දෙරට අතර ඒකාබද්ධ ආයෝජන වැඩසටහනක් ක්‍රියාත්මක කිරීමට කොමසාරිස්වරයා  එකගතාවය පළ කළේය. උතුරේ අංකුර හා නව ව්‍යාවසායකයන් සවි බල ගැන්වීමට නව ව්‍යාපාරික මධ්‍යස්ථානයක් ඉදි කීරීමට ඉන්දියානු රජය රුපියල් මිලියන 250 ක ප්‍රදානයක් ලබා දී තිබේ. යාපනය සංස්කෘතික මධ්‍යස්ථානයේ ස්ථාපිත කිරීමට යෝජිත මෙම මධ්‍යස්ථානය පිළිබදව ද දෙපාර්ශවය අතර අදහස් හුවමාරු කර ගැණින. එහි කටයුතු කඩිනමින් අවසන් කරන බව ඇමති ප්‍රසන්න රණතුංග මහතා මෙහි දි කිවේය.

ඉන්දියානු ජාතිකයන් සිය විවාහ මංගල්‍යය උත්සව ශ්‍රී ලංකාවේ දී ගැනීමට කැමැත්තෙන් සිටින බව පැවසු ඉන්දීය මහකොමසාරිස්වරයා ශ්‍රි ලාංකිකයන් බෞද්ධ ආගමික සිද්ධස්ථාන නැරඹීමට ඉන්දියාවට යන්නාක් මෙන් ඉන්දියානුවන් රාමායණයට සම්බන්ධ ස්ථාන නැරඹීමට ශ්‍රී ලංකාවට පැමිණීමට  කැමැත්තෙන් සිටින බව ද කීවේය. ඇමති ප්‍රසන්න රණතුංග මහතා මෙහි දී කීවේ මේ සම්බන්ධයෙන් සංචාරක අධිකාරිය සිය අවධානය යොමු කර ඇති බවයි. මඩු වන්දනාවේ පැමිණෙන දෙස් විදෙස් සංචාරකයන් වෙනුවෙන් මඩු ප්‍රදේශයේ ඉදි කරන නව නිවාස ව්‍යාපෘතිය කඩිනමින් ආරම්භ කීරීම කෙරෙහි ද මෙහි දී අවධානය යොමු විය. ඒ සදහා ද ඉන්දියානු රජය රුපියල් මිලියන 300 ක ආධාරයක් ලබා දි තිබේ. නිවාස 144 ක් මේ අනුව ඉදිකිරීමට නියමිතයි.

යාපනය පළාලි ගුවන් තොටුපළේ සංවර්ධන කටයුතු සම්බන්ධයෙන් ද මෙහි දී දෙපාර්ශවයේ අවධානය යොමු කෙරිණ. පළාලි ගුවන් තොටුපළ සංවර්ධනය කිරීම සදහා ඉන්දියාව රුපියල් මිලියන 300 ක් ලබා දී තිබේ. ඊට අදාළ ගිවිසුම්වලට කඩිනමින් අත්සන් තැබිමට ද මෙම සාකච්ඡාවේ දී ඉන්දියානු මහකොමසාරිස්වරයා හා ඇමති ප්‍රසන්න රණතුංග මහතා එකගතාවය පළ කළහ.

ඉන්දීයානු මහකොමසාරිස්වරයාට මෙහි දී  කටුනායක ගුවන් තොටුපළ විවෘත කිරීම සහ සංචාරකයන්ගේ පැමීණීම සම්බන්ධයෙන් ද ඇමතිවරයාගෙන් විමසීමක් කළේය. අගෝස්තු 01 වෙනිදාට පෙර සංචාරකයන් සදහා විවෘත කිරීමට හැකිවනු ඇතැයි ඇමති ප්‍රසන්න රණතුංග මහතා මෙහි දී විශ්වාසය පළ කළේය. අගෝස්තු 01 වෙනිදා ගුවන් තොටුපළ සංචාරකයන් සදහා විවෘත කිරිමට සැලසුම් කර ඇතත් විදේශගත ශ්‍රී ලාංකිකයන් දිවයිනට ගෙන්වා  ගැනීමේ කටයුතු ඊට පෙර අවසන් වුවහොත් අගෝස්තු 01 වෙනිදාට පෙර කටුනායක ගුවන් තොටුපළ විවෘත කළ හැකි බව ද ඇමතිවරයා කීවේය.

මෙම සාකච්ඡාවට කාර්මික අපනයන හා ආයෝජන ප්‍රවර්ධන අමාත්‍යාංශයේ ලේකම් මාපා පතිරණ, සංචාරක හා ගුවන් සේවා අමාත්‍යාංශයේ ලේකම් එස්.හෙට්ටිආරච්චි යන මහත්වරුන් ද සහභාගී වූහ.

– ප්‍රදීප් අනුර කුමාර

66 views

7 Comments to “ඉන්දියා-ශ‍්‍රී ලංකා ඒකාබද්ද ආයෝජන ව්‍යාපෘති අරඹන්න සූදානම්…”

  1. හෙළයා says:

    මෙතෙක් අප විසින් එළබි ගිවිසුම් වලින් 90% වක්ම රටට හානිකර වූ නිසා මේවාට එලබිය යුත්තේ ගැබුරු අධ්‍යනයකින් පසුවයි. මේ පිළිබද අධ්‍යනයක් කල හැකි විශේෂඥ සහ අවංක පිරිස් ඇත්තේ ඉතාම සීමා සහිතවයි, ජනාධිපතිතුමනි, කෙටිකාලීන වාසි ලබාගැනීමට ගැබුරු අධ්‍යනයකින් තොරව මේ ගිවිසුම් වලට එලබීම ඉතාම භයානක විය හැක.

  2. Saman says:

    We need quality tourism not quantity tourism. Indians are not big spenders,people in industry know this very well.

  3. sunimal says:

    ඉන්දියාව සැමවිටම තමන්ගේ වැඩි ලාබය ගැන සිතන රටක් ප්‍රවේසමෙන්

  4. Roy says:

    ඉන්දියාවට පුදුම තදියමක් තියෙන්නේ ලංකාවත් එක්ක ගිව්සුම් ගහන්න. මේ ගිවිසුමුත් ව්‍යාවස්තාවේ 13වන ශන්ශෝදනය වගේ පිලිලයක් වෙනවා නිසැකයි. ඉන්දියාව ලංකාව ආක්‍රමනය කරන්න මාන බලමින් සිටින්නේ.

    ලංකාව කලයුත්තේ අප්‍රිකානු මහද්වීපය ඉල්ලක කරගෙන භාන්ඩ සහ ආහාර නිශ්පාදනය කිරීමයි.

    ඉන්දියාවේ නිශ්පාදනය කරන බාල , ප්‍රමිතියක් නැති වාහන ආනයනය වාහාම නතර කරන්න. ජපානයෙන් ඉසුසු Isuzu එන්ජිම ආනයනකර ලංකාවෙම ප්‍රමිතියෙන් යුත් අපනයනය කල හැකි බස් රථ නිශ්පාදනය කරන්න.

  5. ප්‍රසන්න says:

    ඉන්දියාව සැමවිටම ආධාර හෝ ආයෝජන කරන විට ඒවා කිරීමට උත්සහ කරන්නේ උතුර නැගෙනහිර හා වතුකරය මුල් කරගෙනයි. ඒ තුලින් එම ජනකොටස් වල ගැලවුම් කරුවා තමන් බව ඔවුන්ගේ මනසට ඇතුළු කිරීම මගින් රට තුළ භෞතික බෙදීම ඇති කිරීමට පෙර මානසික බෙදීම ඇති කරනවා. අපේ දේශපාලකයන්ද ඒවා පැනලා පිලි ගැනීම කනගාටුවට කරුණකි. හොඳම උදාහරණය පලාලි ගුවන්තොටුපල.

  6. ගමරාළ says:

    ඔකුන් හදන්නේ උන්ගේ විරැකියා ප්‍රශ්නයට විසදුම් හොයන්න දැනටමත් අතිවිශාල ඉන්දියන් කාරයො ප්‍රමාණයක් ලංකාවේ විවිධ තරාතිරමේ රැකියාවෙ නියුතුව සිටිති, මුන් කාලකණ්ණි බත්පැකට් එකටත් වැඩ කරන්න ගත්තාම ලාංකිකයන් ට රැකියා අහිමිවිමෙ දැඩි අවදානමක් ඇත, අනික ඉන්දියාව යනු ලංකාවෙ මිත්‍ර රටක් නොව උන්ගේ වාසියට ඉන්න රටකි එම නිසා මුන්ගේ ආයොජන ගැන දෙවරක් හිතන්න .

  7. ඉන්දියාවේ සි⁣ට මෙරටට හරියාකාරව ක්‍රියාත්මක වන ව්‍යාපෘති ලංකාවට ආවෙ නැත

Main News