උතුරේ ගංවතුරෙන් විපතට ලත් වැසියන් 4450ක් යුද හමුදාව විසින් බේරාගැනේ..

මුලතිව් දිස්ත්‍රීක්කයට ඇතිවූ ධාරානිපාත වර්ෂාව හේතුවෙන් පුදුකුඩඉරිප්පු මුත්තියන්කඩ්ඩු වැවේ වාන කැඩී යාම හේතුවෙන් ඇති වූ ගංවතුර තත්වයක් හේතුවෙන් මේ වන විට පවුල් 1414 කට අයත් පුද්ගලයින් 4450 දෙනෙකු විපතට පත්ව ඇති බවට මුලතිව් ආපදා කලමනාකරන ඒකකය කියා සිටියේය.

මුත්තියන්කඩ්ඩු වැව කැඩීයාම හේතුවෙන් පවුල් 440 කට අයත් පුද්ගලයින් 724 දෙනෙකු ගංවතුරට කොටු වී සිටි අතර එහිදී මුලතිව් ආරක්ෂක සේනා ආඥාපති මේජර් ජෙනරල් දුෂ්‍යන්ත රාජගුරු මහතාගේ උපදෙස් පරිදි 64 වන සේනාංකයේ යුද හමුදා සෙබලුන් විසින් ගංවතුරට කොටුවූ වැසයින් බෝට්ටු ආධාරයෙන් බෙරාගෙන ආරක්ෂිත ස්ථාන කරා යොමු කිරීමට පියවර ගෙන ඇත.

මේ අනුව මුලතිව්හි ආරක්ෂිත කඳවුරු 22 ක පවුල් 1215 කට අයත් පුද්ගලයින් 3656 දෙනෙකු රඳවා ඔවුන්ට අවශ්‍ය පිසූ ආහාර ඇතුලු අනෙකුත් පහසුකම් සැපයීමට මුලතිව් ආපදාකලමනා කරන ඒකකය ඇතුලු යුද හමුදාව විසින් පියවර ගෙන ඇත.

එහිදී වැඩිම පිරිසක් විපතට පත්ව ඇත්තේ මුත්තියන්කඩ්ඩු , කරවලකණ්ඩාල්, සුදන්දිරපුරම් , භාරතපුරම්, වල්ලවාපුරම් ඇතුලු ප්‍රදේශ වෙයි.

මේ අනුව මුලතිව්හි ඔඩ්ඩුසුඩාන්, පුදුකුඩිඉරිප්පු, තුනුක්කායි, මැරටියන්පත්තු, මාන්තෙයි නැගෙනහිර යන ප්‍රාදේශීය ලේකම් කොට්ඨාශයන්හි ජනතාව විපතට පත්ව ඇති බවට මුලතිව් ආපදාකලමනාකරන ඒකකය විසින් පෙන්වා දෙයි.

කෙසේ වෙතත් පවතින වර්ෂාව හේතුවෙන් විපතට පත් සඛ්‍යාව ඉහල යාමේ අවධානමක්ද පවතින අතර ජනතාවටද අවධානමෙන් සිටින ලෙසට දැනුම් දී ඇති බවටද මුලතිව් අපාදාකලමනාකරන ඒකකය විසින් වැඩි දුරටත් කයා සිටියේය.

– වන්නි රොමේෂ් මධුෂංඛ