එජාප රජයක් යටතේ ජනතාව අත මුදල් ගැවසෙනවා.. ව්‍යාපාරිකයින්ට ව්‍යාපාර පහසු වෙනවා..
January 27, 2017 at 7:06 am | lanka C news
ප්‍රාථමික කර්මාන්ත අමාත්‍යාංශය හා ලෝක බැංකුව එක්ව හඳුන්වාදෙන ව්‍යාපෘතිය තුළින් දේශීය ව්‍යවසායකයින් නඟා සිටුවීමට කටයුතු කරන බව ප්‍රාථමික කර්මාන්ත අමාත්‍ය දයා ගමගේ මහතා පවසයි. කුඩා හා මධ්‍ය පරිමාණ ව්‍යාපෘති 1470ක් ආරම්භ කොට ඒ තුළින් රැකියා විශාල ප්‍රමාණයක් බිහි කිරීමට සැළසුම් කර ඇති බව අමාත්‍යවරයා කීය.
අමාත්‍යවරයා මේ බව සඳහන් කළේ පිළිමතලාව ග්‍රාමීය සංවර්ධන පුහුණු හා පර්යේෂණ ආයතනයේ කෘෂිකාර්මික නවීකරණය කිරීමේ ලෝක බැංකු ව්‍යාපෘතියේ 03වන වැඩසටහන ආරම්භ කරමිනි. තමා ව්‍යාපාරිකයෙක් වශයෙන් දියුණු වූ ආකාරය විස්තර කරමින් එය ආදර්ශයට ගන්නා ලෙස ව්‍යවසායකයින්ගෙන් ඉල්ලා සිටියේය. එක්සත් ජාතික පක්ෂ රජයක් යටතේ ජනතාව අත මුදල් ගැවසෙන බවත්, ව්‍යාපාරිකයින්ට ව්‍යාපාර කර ගැනීමට පහසු වන බවත් සඳහන් කළ අමාත්‍යවරයා ඒ නිසා තමන් එක්සත් ජාතික පක්ෂයට ආදරය කරන බව පැවසීය. රනිල් වික්‍රමසිංහ මහතා ඇතුලු දේශපාලන නායකයින් රැසක් දේශපාලනයට පිවිසීමට ආරාධනා කළත් තමන් තෝරා ගත්තේ එක්සත් ජාතික පක්ෂය බව පැවසීය.
මිලියන 125ක් පාඩුවට තිබූ සෙවනගල සීනී කම්හල මිලියන 450ක ලාභයක් ලබන තත්ත්වයට ගෙන ආ හැටි අමාත්‍යවරයා පැවසීය. වැට් ඇතුලු බදු වලින් උපයාගන්නා ආදායම මහින්ද රාජපක්ෂ රජය ගත් ණය වල පොළිය 97% ගෙවීමට පමණක් ප්‍රමාණවත් බවත් ඉතිරි 3% ණය වාරික, ජනතාවට සහන ලබා දීමට තවත් ණය ගත යුතු බව පෙන්වා දීය.
කෙසේවෙතත් මේ වසර තුළ රටට දැනෙන වැඩ කොටසක් කිරීමට සියලු කටයුතු සැළසුම් කර ඇති බව අමාත්‍යවරයා තවදුරටත් සඳහන් කළේය. ජී.එස්.පී.පල්ස් ලබා ගන්න කිසිම රටට අහිතකර කොන්දේසියකට යටත් නොවී ඇති බව සඳහන් කළ අමාත්‍යවරයා මේ වන විට මත්ස්‍ය තහනම ඉවත් වී ඇති අන්දමට ජී.එස්.පී.පල්ස් බදු සහනය ලබා ගන්නට ගරු අග්‍රාමාත්‍යවරයා කටයුතු කර ඇති බව සඳහන් කළේය. තවදුරටත් අදහස් දක්වමින් සංචාරක කර්මාන්තය තුළින් වසර 2020 වන විට සංචාරකයින් ලක්ෂ 50ක් ශ්‍රී ලංකාවට ගෙන ඒමට සැළසුම් කර ඇති බව ප්‍රකාශ කළේය.
මෙම හඳුන්වා දෙන ලෝක බැංකු ව්‍යාපෘතිය තුළින් ලක්ෂ 10ක් ආයෝජනය කළ හැකි නම් ලක්ෂ 100ක ව්‍යාපෘතියක් ආරම්භ කළ හැකි බවත් ඒ සඳහා ප්‍රාථමික කර්මාන්ත අමාත්‍යාංශය සියලු සහය ලබා දෙන බව සඳහන් කළ අමාත්‍යවරයා සියලු දෙනා එක්ව වැඩකොට මේ රට දියුණු කරන්න සහයෝගය දෙන ලෙස ඉල්ලා සිටියේය.
– ජෝර්ජ් ද සිල්වා
