එජාප විශාල පිරිසක් පොහොට්ටුවට…

July 22, 2020 at 6:48 pm | lanka C news
එජාප විශාල පිරිසක් පොහොට්ටුවට…

සියලු ජාතීන්ට බියෙන් සැකෙන් තොරව ජීවත් වීමේ අයිතිය ලබාදීම වෙනුවෙන් තුනෙන් දෙකක බලයක් ලබා ගැනීම උදෙසා පොහොට්ටුවට ඡන්දය දෙන්නැයි ශ්‍රී ලංකා පොදුජන පෙරමුණේ නායක අග්‍රාමාත්‍ය මහින්ද රාජපක්ෂ මහතා පවසයි.

පස්වරුවේ මහනුවර පාතදුම්බර ප්‍රදේශයේ පැවති හමුවක් අමතමින් අග්‍රාමාත්‍යවරයා සඳහන් කළේ රටට ගැලපෙන විධිමත් ව්‍යවස්ථාවක් තුළින් සියලු ජාතීන්ට එකට ජීවත් විය හැකි රටක් නිර්මාණය කිරීමට හැකියාව ලැබෙන බවයි.

මෙවර මැතිවරණයේදී තුනෙන් දෙකක බලයක් ලබා ගැනීම සදහා ශක්තිය තිබෙන එකම පක්ෂයේ වන්නේ පොහොට්ටුව පක්ෂය බවත්,  මේ වන විට එක්සත් ජාතික පාක්ෂිකයින් විශාල පිරිසක් පොහොට්ටුව පක්ෂය වටා එක්රොක් වෙමින් සිටින බවත්, අග්‍රාමාත්‍යවරයා මෙහිදී අවධාරණය කළේය.

ආර්. ප්‍රේමදාස යුගයට නැවත ගමන් කිරීමට මෙරට ජනතාවට කිසිදු අවශ්‍යතාවයක් නොමැත. 88, 89 භීෂණ සමය වැනි යුගයක් මෙරට ජනතාවට නැවත අවශ්‍ය වන්නේ නැත.  කොවිඩ්- 19 වසංගත තත්ත්වය පරාජය කිරීම උදෙසා මුදල් පනතක් ගෙන ඒමට උත්සාහ කිරීමේදී සජිත් ප්‍රේමදාස මහතා එම මුදල් පනත පරාජය කරන බව ප්‍රකාශ කිරීමෙන් ම පෙනී යන්නේ ඒ මහතාගේ පරිණත නොවන දේශපාලන දැක්මයි.

එවැනි දැක්මක් සහිත පුද්ගලයෙකු රටක පාලනයට පත් කිරීමට වඩා රට ගොඩනංවන සැලැස්මක් සහිත ශ්‍රි ලංකා පොදුජන පෙරමුණට ඡන්දය දී සියලු ජාතීන්ට  රටක් වශයෙන් එකට නැගී සිටීමට හැකි රට නිර්මාණය කිරීම උදෙසා තම වටිනා ඡන්දය භාවිතා කරන්නැයි අග්‍රමාත්‍යවරයා  මෙහිදී ජනතාවගෙන් ඉල්ලා සිටියේය.

– සිසිර මුණසිංහ

183 views
Main News