ලසන්ත ඝාතන චෝදනාව කණපිට හැරේ.. ඒ නීතිය යටතේම ඇමති සරත් ෆොන්සේකා රිමාන්ඞ්..

March 29, 2017 at 12:13 am | lanka C news
ලසන්ත ඝාතන චෝදනාව කණපිට හැරේ.. ඒ නීතිය යටතේම ඇමති සරත් ෆොන්සේකා රිමාන්ඞ්..

හිටපු ජ්‍යෙෂ්ඨ නියෝජ්‍ය පොලිස්පති අනුර සේනානායක වසරක පමණ කාලයක් රක්‍ෂිත බන්ධනාගාරගත කර සිටින නීතිය යටතේම ඇමති සරත් ෆොන්සේකා මහතාද රිමාන්ඞ් කල යුතු බව පාර්ලිමේන්තු මන්ත‍්‍රී උදය ගම්මන්පිල මහතා පවසයි.

මාධ්‍ය අමතමින් මන්ත‍්‍රීවරයා මෙසේ අදහස් පල කලේය.

ෆොන්සේකා ඇමතිතුමා ලසන්ත වික්‍රමතුංග ඝාතනය පිලිබඳ ප්‍රකාශයක් දෙන්න අපරාධ පරීක්ෂණ දෙපාර්තමේන්තුවට ගියා. එතුමා පොලීසියට කියනවා ‘ලසන්ත ඝාතනය කලේ මම නොවේ ජනරාල් හෙන්දවිතාරණ යටතේ සිටිය සිටි කණ්ඩායමක්’ මේ ප්‍රකාශය හරහා එතුමා පිලි ගන්නවා ඝාතනයක් පිලිබඳව තොරතුරු දැන ගෙන දිගු කළක් තිස්සේ සඟවා ගෙන සිටියා.

දැන් හිටපු ජ්‍යෙෂ්ඨ නියෝජ්‍ය පොලිස්පති අනුර සේනානායක අත්අඩංගුවට අරගෙන වසරක් තිස්සේ රක්ෂිත බන්ධනාගාර ගත කර සිටින්නේ ඇයි? ඝාතනයක් පිලිබඳ තමන් දන්නා තොරතුරක් සඟවා ගෙන හිටියා කියලා. ඔහු ඒ චෝදනාව පිලි ගන්නේ නෑ. නමුත් රක්ෂිත බන්ධනාගාරයේ. ෆොන්සේකා ඇමතිතුමා තමන් තොරතුරු සඟවා ගෙන සිටි බව පිලි අරගෙන ඉවරයි. එසේ නම් අනුර සේනානායක මහතා රක්ෂිත බන්ධනාගාරයේ තබා ගෙන සිටින අයුරින්ම ෆොන්සේකා ඇමතිතුමාවත් රක්ෂිත බන්ධනාගාර ගත කළ යුතුයි.

තමන්ගේ විවේචකයින් නිහඬ කිරීමට ගෝඨාභය රාජපක්ෂ මහතා විසින් මිනීමරු කල්ලියක් පවත්වා ගෙන ගිය බවට පොලීසිය උසාවියට වාර්තා කළ බව අල් ජසීරා රූපවාහිනිය සහ ඒඑෆ්පි පුවත් සේවාව වාර්තා කර තිබුණා. නමුත් ලසන්ත ඝාතන නඩුවේ දී එවැනි දෙයක් පොලීසිය වාර්තා කලේ නෑ. පොලීසිය උසාවියට සිරිතක් වශයෙන් බොරු කියනවා. නමුත් ඒ බොරුව කිව්වේ නෑ. ඒ නිසා වහාම මේ බොරුව නිවැරදි කරන්න කියලා හිටපු ආරක්ෂක ලේකම් ගෝඨාභය මහතා සිය නිතිඥයින් හරහා අල් ජසීරා රූපවාහිනිය සහ ඒඑෆ්පි පුවත් සේවාවට දැනුම් දී තිබෙනවා.

– අරවින්ද අතුකෝරල

47 views
Main News