කවුද කියන්නේ රුපියල අවප්‍රමාණය වෙලා කියලා.. රුපියලට එදත් ශත 100යි.. අදත් ශත 100යි..- ආර්ථික ආචාරියා අපූරු පිලිතුරක් දෙයි…

May 18, 2018 at 11:20 am | lanka C news
කවුද කියන්නේ රුපියල අවප්‍රමාණය වෙලා කියලා.. රුපියලට එදත් ශත 100යි.. අදත් ශත 100යි..- ආර්ථික ආචාරියා අපූරු පිලිතුරක් දෙයි…

පිවිතුරු හෙල උරුමය පක්‍ෂ මූලස්ථානයේදී පැවති මාධ්‍ය හමුවක් අමතමින් එම පක්‍ෂ නායක උදය ගම්මන්පිල මහතා මෙම අදහස් පල කලේය.

2017 වසර සඳහා වූ වාර්ෂික මහ බැංකු වාර්තාව 2018 අප්‍රේල් 17 දින මේආණ්ඩුව වසින් පත්කරන ලද මහ බැංකු අධිපතිතුමා විසින් මුදල් ඇමතිතුමාට භාර දුන්නා. මේ ආණ්ඩුව රටේ ආර්ථිකය විනාශ කලා කියන එක ආණ්ඩුව පත් කරපු මහ බැංකු අධිපතිතුමා විසින්ම ලිඛිතවම මුදල් ඇමතිට දැනුම් දීලා තිබෙනවා. අපට දැන් තිබෙන්නේ උපුටා දක්වන්න විතරයි. ඒ අනුව බලන විට මහ බැංකු වාර්තාව එකම ඛේදවාචකයක්.

මේ ආණ්ඩුව ණය බරායි ණය බරායි කියලා කෑ ගැහුව්වාට ඇත්තෙන්ම ණය අර්බූදයක් හැදුවේ මේ ආණ්ඩුවමයි. රටක ණය බර මනින ලෝක සම්මත මිම්ම තමයි ආණ්ඩුවක සමස්ත ණය ප්‍රමාණය දළ දේශීය නිෂ්පාදිතයේ ප්‍රතිශතයක් ලෙස ප්‍රකාශ කිරීම. ඒ අනුව මහින්ද රාජපක්ෂ ආණ්ඩුව බලයට පත් වන විට ණය බර 102%යි. මහින්ද රාජපක්ෂ මැතිතුමන් ගෙදර යන විට ණය බර 71% දක්වා පහත දාලයි තිබුණේ. ආර්ථික මොල ඉන්න මේ ආණ්ඩුව දන්න ශිල්ප ඔක්කොම පෙන්වලා ණය බර 78% දක්වා ඉහළ නංවලා.

2014 අග දී රුපියල් ට්‍රිලියන 7.4ක් සමස්ත රාජ්‍ය ණය 2017 වසර අග දී රුපියල් ට්‍රිලියන 10.3ක් දක්වා 39%කින් ඉහළ නැගලා. මුකුත් නොකර නිකන් ඉන්න අතරේ රාජ්‍ය ණය 39%කින් වැඩි වෙලා නම් ඒ මුදලට කරපු දේ පිළිබඳ අපට සාධාරණ සැකයක් මතු වෙනවා.

අපි ආණ්ඩුව භාර දෙන විට ඩොලරයක අගය රුපියල් 131යි. දැන් ඒක රුපියල් 159 දක්වා ඉහළ නැගලා. ඒ කියන්නේ කිසිම ඩොලරයක් වැඩිපුර ණයට නොගත්තත් සෑම ණය ඩොලරයක් සඳහාම රුපියල් 28කින් ණය ප්‍රමාණය ඉහළ යනවා. පසුගිය මාස 40ට පමණක් රුපියල අවප්‍රමාණය වීම නිසා පමණක් අපි ගෙවිය යුතු ණය ප්‍රමාණය රුපියල් බිලියන 836ක් හෙවත් කෝටි 83,600ක් වැඩි වී තිබෙනවා. හම්බන්තොට වරාය වගේ හයක් හදන්න තරම් මේ මුදල දැවැන්තයි.

මේ අතරේ ආණ්ඩුවේ ආර්ථික විශේෂඥයෝ කියන්නේ ඩොලර් වලින් ගන්නා ණය ඩොලර් වලින්ම ගෙවනා නිසා රුපියල අවප්‍රමාණය වීමෙන් ණය ප්‍රමාණය වැඩි වෙන්නේ නැතිලු. නමුත් මේ අයට අමතක වුණු කාරණය තමයි ආණ්ඩුවට ඩොලර් ආදායමක් නොමැති බව. ආණ්ඩුව බදු අය කරන්නේ රුපියල් වලින්. ආණ්ඩුව බලපත්‍ර ගාස්තු අය කරන්නේ රුපියල් වලින්. නමුත් විදේශ ණය ගෙවන්නේ ඩොලර් වලින්. එදා ණය ආපසු ගෙවන්න ඩොලරයක් මිළ දී ගන්න ගෙව්වේ රුපියල් 131යි. දැන් ගෙවන්න ඕනෑ රුපියල් 159ක්. ඒ වැඩි වුණු රුපියල් 28 සොයා ගන්නේ ජනතාව මත බදු බර පටවලා. මේ ආණ්ඩුවට වැඩි වැඩියෙන් බදු පනවන්න සිදු වීමට රුපියල අව ප්‍රමාණය වීම ප්‍රභලම කාරණයක් ලෙස බලපා තියෙනවා.

පසුගිය කාලේ රුපියල අවප්‍රමාණය වීම වලකා ගන්න ඩොලර් මිලියන 136ක් මූල්‍ය වෙළඳපොලට මුදා හැරියා කියලා මහ බැංකු අධිපති මාධ්‍ය හමුවක දී පැවසුවා. රුපියල අවප්‍රමාණය වීම ප්‍රශ්නයක් නොවේ නම් රුපියල රැක ගන්න මෙතරම් විශාල ඩොලර් ප්‍රමාණයක් නාස්ති කලේ ඇයි කියන එකට මහ බැංකුව උත්තර දිය යුතුයි.

1980 දශකයේ සිටි එජාප ආර්ථික විශේෂඥයෙකු වන ආචාර්ය තිලක් රත්නකාර මාධ්‍ය සම්මුඛ සාකච්ඡාවක දී රුපියල අවප්‍රමාණය වීම ගැන අපූරු උත්තරයක් දුන්නා. “කවුද කියන්නේ රුපියල අවප්‍රමාණය වෙලා කියලා. රුපියලට එදත් ශත 100යි. අදත් ශත 100යි“. මේ ආණ්ඩුවේ ලොක්කන් දෙන්නේ අන්න ඒ වගේ උත්තර තමා.

– අරවින්ද අතුකෝරල

56 views

One Comment to “කවුද කියන්නේ රුපියල අවප්‍රමාණය වෙලා කියලා.. රුපියලට එදත් ශත 100යි.. අදත් ශත 100යි..- ආර්ථික ආචාරියා අපූරු පිලිතුරක් දෙයි…”

  1. padmasara says:

    deyyo sakki meka iskole gihin nehe wage,

    den petrol liter ekata rupiyal keeyak gewanawada? 2015 keeyada gewwe haraka
    aarthika widayaw anodanna me manussaya adama askaranna

Main News