කිරින්ද ඛණිජ වැලි නිධිය රජයට පවර ගන්නවා… සෞභාග්‍යයේ දැක්ම එයයි..- විමල්ගෙන් නිවේදනයක්

March 28, 2021 at 8:40 am | lanka C news
කිරින්ද ඛණිජ වැලි නිධිය රජයට පවර ගන්නවා… සෞභාග්‍යයේ දැක්ම එයයි..- විමල්ගෙන් නිවේදනයක්

කිරින්ද ඛණිජ වැලි නිධිය සම්බන්ධයෙන් ඊයේ දින ඇති වූ සාකච්චාව ගැන කර්මාන්ත අමාත්‍ය මාධ්‍ය ලේකම්වරයා නිකුත් කර ඇති නිවේදනය මෙසේය.

කිරින්ද ඛනිජ වැලි නිධියෙහි කැණීම් කටයුතු රාජ්‍ය සමාගමක් වන ලංකා මිනරල් සෑන්ඩ්ස් සමාගම මගින් සිදුකර එම ජාතික සම්පතෙහි ප්‍රතිලාභ ‘සෞභාග්‍යයේ දැක්ම’ අනුව යමින් ජාතියට දායාද කිරීමට අවශ්‍ය පියවර ගන්නා බව කර්මාන්ත අමාත්‍ය විමල් වීරවංශ මහතා පැවසීය.

හම්බන්තොට කිරින්ද වෙරළ තීරයේ පිහිටි එම ඛනිජ වැලි නිධිය අවට ප්‍රදේශවාසීන් සමඟ පැවති සාකච්ඡාවක දී ඒ මහතා මෙසේ පැවසීය.

අමාත්‍යංශයන්හි විෂය පථයන් වෙන් කර දෙමින් ජනාධිපතිතුමන් නිකුත් කළ අති විශේෂ ගැසට් නිවේදනය අනුව කර්මාන්ත කැබිනට් අමාත්‍යවරයාට ලබාදී ඇති සුවිශේෂී ප්‍රමුඛතා අතර මෙරට පවතින ඛනිජ සම්පත් සංවර්ධනය මෙන්ම නව ඛනිජ සම්පත් ගවේෂණය කරමින් ඒවායේ ඒවායින් දළ දේශීය නිෂ්පාදිතය ඉහළ නැංවීම ද වන අතර ඒ අනුව යමින් කිරින්ද ඛනිජ වැලි නිධිය ද ලංකා ඛනිජ වැලි සමාගම යටතේ ජාතියට තවත් ධන උල්පතක් ලෙස උරුමකර දීම තම අරමුණ බව ද අමාත්‍යවරයා මෙහිදී පෙන්වා දුන්නේය.

මෙහිදී ප්‍රදේශවාසීන් පිරිසක් පෙන්වා දුන්නේ ඉන්දීය සමාගමක් මෙම ඛනිජ වැලි නිධියෙහි කැණීම් කටයුතු සිදු කර ප්‍රදේශවාසීන්ට ප්‍රතිලාභ ලබාදීමට සූදානම් බව ය. එහිදී අමාත්‍යවරයා අවධාරණය කළේ ජාතික සම්පත් විදේශ සමාගම්වලට විකිණීම හෝ පවරා දීම තම ආණ්ඩුවේ ප්‍රතිපත්තිය නොවන බව ය. පරිසරයද සුරකිමින් ජනතාවට උපරිම ප්‍රතිලාභ ලැබෙන පරිදි රාජ්‍ය සමාගමක විශ්වාසය යටතේ කිරින්ද ඛනිජ වැලි නිධියෙහි කැණීම් කටයුතුවලට සහාය ලබාදෙන ලෙස අමාත්‍යවරයා එම පිරිසගෙන් ඉල්ලා සිටියේය.

මෙම අවස්ථාවට කිරින්ද ප්‍රදේශවාසීන්ට කරුණු දැක්වීමට හම්බන්තොට දිස්ත්‍රික් සම්බන්ධීකරණ කමිටුවේ සභාපති, පාර්ලිමේන්තු මන්ත්‍රී උපුල් ගලප්පත්ති, ලංකා මිනරල් සෑන්ඩ්ස් සමාගමේ සභාපති මුදිත විජේසිංහ, කර්මාන්ත අමාත්‍යාංශයේ අතිරේක ලේකම් ඇතුළු රාජ්‍ය නිලධාරීහු පිරිසක් ද එක්ව සිටියහ.

අනුරුද්ධ බණ්ඩාර රණවාරණ
මාධ්‍ය ලේකම්
කර්මාන්ත අමාත්‍යාංශය

14,020 views
Main News