කොකේන් කතාව රන්ජන්ගේ ලෝක කෙප්පයක්.. කොකේන් කමිටු වාර්තාව කියයි.. කෙලින්ම කුණු කූඩයට..

කොකේන් භාවිත කරන එ.ජා.ප. මන්ත්‍රිවරුන් කිසිවකුගේ නමක් රන්ජන් රාමනායක මහතා සඳහන් කර නොමැති නිසා ඊයේ (27දා) රැස්වූ එ.ජා.ප. කෘත්‍යාධිකාරි මණ්ඩල රැස්වීමේදී අදාළ කොකේන් කමිටු වාර්තාව කුණු බක්කියට දමා තිබේ.

‘සිරිකොත’ පක්‍ෂ මූලස්ථානයේදී ඊයේ (27දා) පෙරවරු 10.00ට පමණ එ.ජා.ප. කෘත්‍යාධිකාරි මණ්ඩලය රැස්වූයේ පක්‍ෂ නායක අග්‍රාමාත්‍ය රනිල් වික්‍රමසිංහ මහතාගේ ප්‍රධානත්වයෙනි.

එහිදී පක්‍ෂය ශක්තිමත් කිරීමට ගතයුතු ඉදිරි පියවර හා ගතයුතු ක්‍රියාමාර්ග පිළිබඳ දීර්ඝ වශයෙන් සාකච්ඡා කර ඇත.

මේ අතරතුර රන්ජන් රාමනායක මහතා හෙළි කළ කොකේන් භාවිත කරන මැති ඇමැති කතාවට අදාළව පත්කළ කමිටුවේ වාර්තාව පිළිබඳවද සාකච්ඡා වී තිබේ.

එම වාර්තාවට අනුව එ.ජා.ප. මන්ත්‍රිවරුන් කිසිවකුට හෝ අදාළව චෝදනා නැති නිසා එම කමිටු වාර්තාව පිළිබඳ තවදුරටත් සාකච්ඡාවට භාජන කර නැත.

රාජ්‍ය අමාත්‍ය රන්ජන් රාමනායක කොකේන් පාවිච්චි කරන මැති ඇමැති කතාව ගොනුකර ඇත්තේ වෙබ් අඩවි, පුවත්පත් වාර්තා ආදිය පදනම් කරගෙන යැයිද එහිදී හෙළිවී ඇත.

ජනතා ආකර්ෂණයට පාත්‍රව සිටින රන්ජන් රාමනායක මහතාට කිසිවකු දෝෂාරෝපණය නොකළද කොකේන් පාවිච්චි කරන මැති ඇමැති කතා මෙලෙස මාධ්‍ය හරහා ප්‍රසිද්ධ කිරීම රටේ මතු පරපුරට නරක පූර්වාදර්ශයක් වන්නේ යැයිද එහිදී ඇතැම් අය පෙන්වාදී ඇත.

ඒ අනුව කොකේන්වලට අදාළව පත් කළ සිවු පුද්ගල කමිටු වාර්තාව තවදුරටත් මාතෘකාවක් කරගත යුතු නැති බවද එහිදී ප්‍රකාශ වී තිබේ.

– mawbima