ගෝටාභය මහතා බෑ කියද්දී අපියි ඔහුව දේශපාලනයට ගෙන ආවේ.. ඒකාධිපති පාලනයට අපේ කිසිම සූදානමක් නෑ…

September 17, 2020 at 6:23 am | lanka C news
ගෝටාභය මහතා බෑ කියද්දී අපියි ඔහුව දේශපාලනයට ගෙන ආවේ.. ඒකාධිපති පාලනයට අපේ කිසිම සූදානමක් නෑ…

බලශක්ති අමාත්‍ය නීතිඥ උදය ගම්මන්පිල මහතා ඓතිහාසික මහනුවර දී ශ්‍රී දළදා වහන්සේ වැඳපුදා ගෙන ගෞරවනීය මල්වතු අස්ගිරි මහනායක ස්වාමීන් වහන්සේලා සහ ගැටඹේ රාජෝපවනාරාමාධිපති කැප්පෙටියාගොඩ සිරිවිමල නාහිමියන් බැහැ දැක ආශිර්වාද ලබාගැනීමට කටයුතු කලේය.

එමෙන්ම දියවඩන නිලමේ නිලංග දෑල බණ්ඩාර මැතිතුමන් සමග ද අමාත්‍ය උදය ගම්මන්පිල මහතා මෙහිදි පිළිසඳරකට එක් විය. එම අවස්ථාවේදී මාධ්‍යවේදීන් ගේ ප්‍රශ්ණ සදහා අමාත්‍යවරයා මෙසේ අදහස් දැක්වීය.

විශේෂයෙන් මල්වතු අස්ගිරි මහා නායක ස්වාමීන් වහන්සේලා බැහැ දැකීමට පැමිණියේ ඇයි කියලා අපි දැනගන්න කැමතියි ?

ජනාධිපතිතුමාත් අගමැතිතුමාත් මට ඉතාමත් භාරදූර වගකීම් ගණනාවක් පහුගිය කාලේ භාර දුන්නා. ඒ නිසා මටත් මගේ කාර්ය මණ්ඩලයටත් දළදා හාමුදුරුවන්ගෙන්, ඒ වගේම මල්වතු අස්ගිරි මහා නායක ස්වාමීන් වහන්සේලාගෙන් ආශිර්වාදය ලබා ගැනීමේ අරමුණෙන් ආවේ.

මොකද වසර පනහකට අධික කාලයක් ලංකාවේ තෙල් සහ ගෑස් ඇත යනුවෙන් බොහෝ නායකයින් පවසනවා. නමුත් ගොඩගත් කිසිවෙක් නැත, කතාව පමණක් ඇත. ජනාධිපතිතුමාත් අගමැතිතුමාත් මාව බලශක්ති අමාත්‍යවරයා බවට පත්කළේ ශ්‍රී ලංකාව සතු මේ මහා සම්පත ගොඩ අරගෙන රට ගොඩ දාන්න. අපේ රටේ ලක්ෂ පහළොවක් පමණ ජනතාව මැදපෙරදිග ගිහිල්ලා දුක් විඳින්නේ අපට නැති තෙල් සල්ලි ඒ අයට තියෙන නිසා. ශ්‍රී ලංකාව තෙල් සහ ගෑස් ‍නිපදවන රටක් බවට පත් කිරීම තමයි මට පැවරිලා තියෙන කාර්යභාරය. එය අතිශයින්ම භාරදූර වගකීමක්. දැවැන්ත තාක්ෂණයක් අවශ්‍යයි. මහා මුදල් සම්භාරයක් අවශ්‍යයි. ඒ සියල්ල කරන්න අපට හැකියාව තියෙනවා කියලා ජනාධිපතිතුමාත් අගමැතිතුමාත් විශ්වාස කරලා තියෙනවා. ඒකයි මට මෙය පැවරුවේ. ඒ නිසා මම ඒක අනිවාර්යෙන්ම ඉටු කරනවා. ඒ වගේම බෞද්ධයෙක් විදියට ත්‍රිවිධ රත්නයෙන් වගේම දේව ආශිර්වාදයත් මේ කාර්යයට බලාපොරොත්තු වෙනවා. ඒකයි දළදා හාමුදුරුවන්ගේ සහ මහා නායක ස්වාමීන්වහන්සේලාගේ ආශිර්වාදය ලබා ගැනීමට පැමිණියේ.

ප්‍රශ්නය

ඇමතිතුමනි, මේ වන විට රටේ බොහොමයක් කතාවෙන්නේ 20වන ව්‍යවස්ථා සංශෝධනය. මේ වන විට සංශෝධනයේම අඩුපාඩු විමර්ශනය සඳහා කමිටුවක් පත් කරලා තියෙනවා. මොනවද ගත්තු තීන්දු තීරණ ?

පිළිතුර

ඊයේ රාත්‍රියේ දීර්ඝ සාකච්ඡාවක් අපි යෙදුණා. එහිදී අපි ගත්ත තීන්දු තීරණය මේ මහනුවරට පැමිණෙන අතරවාරයේ මගේ පරිගණකයේ වාර්තාව සකස් කරලා අලි සබ්බි ඇමතිතුමාට විද්‍යුත් තැපෑලෙන් යැව්වා. මොකද අද 11ට මේ කමිටුව අගමැතිතුමාත් හමුවීමට නියමිතයි. මම ඊට කලින් මල්වතු අස්ගිරි නායක හාමුදුරුවන් බැහැ දැකීම සඳහා වෙලාවක් වෙන් කරගෙන සිටි නිසා ඒ හමුවට සහභාගි වුණේ නෑ. අද 11ට කමිටුව විසින් අපේ නිරීක්ෂණ සහ නිර්දේශ අගමැතිතුමන්ට භාරදීමට නියමිතයි. ඒ වගේම අපි ජනාධිපතිතුමාටත් බාර දෙනවා. ඉතිහාසයේ ප්‍රථම වතාවට තමයි ආණ්ඩුවක් ගැසට් මගින් ප්‍රසිද්ධ කරපු පණත් කෙටුම්පතක් නැවත සමාලෝචනයට ලක් කරන්නට කමිටුවක් පත්කරේ. ඒ කියන්නේ මේ ආණ්ඩුව ජනතාවට ඇහුම්කන් දෙන්න සූදානම්. අඩු පාඩු තියෙනවා නම් සකස්කර ගන්න සූදානම් කියන පණිවිඩය තමයි ඒ දුන්නේ. අපි දැක්ක අඩුපාඩු සහ අපේ නිරීක්ෂණ ජනාධිපතිතුමන්ට අගමැතිතුමාටත් අපි ඉදිරිපත් කළා. එතුමන්ලා අපෙ නිරීක්ෂණ වලට නිසි අවධානය යොමු කරාවි කියලා අපි බලාපොරොත්තු වෙනවා.

ප්‍රශ්නය

ඔබතුමන්ලා දළ වශයෙන් දැක්කා අඩුපාඩු මොනවාද?

පිළිතුර

අපි මේ අඩුපාඩු ජනාධිපතිතුමාටත් අගමැතිතුමාටත් ඉදිරිපත් කලාට පසු අමාත්‍ය මණ්ඩලයට යොමුකරලා එතනින් පස්සෙ තමයි අපිට ප්‍රසිද්ධියේ සාකච්ඡා කරන්න පුළුවන් වෙන්නේ. කමිටුවේ සාමාජිකයෙක් විදියට මට වගකීමක් තියනවා අපි ගත තීන්දු ප්‍රසිද්ධ නොකර සිටීමට. විශේෂයෙන්ම කියන්න ඕන සමහර සාධනීය ලක්ෂණ ලෙස අපි දුටු දේවල් ගැන සියලු දෙනාගේම එකගතාවයක් ඇති වුණා. ඒ නිසා ඒවා අනිවාර්යෙන්ම පවතින විසිවන සංශෝධනයෙන් නෙවෙයි අවසාන වශයෙන් සම්මත වෙන්නේ කියන එක මම විශ්වාසයෙන් කියනවා.

ප්‍රශ්නය

ජනතා විමුක්ති පෙරමුණත් සමගි ජන බලවේගය දැඩි විවේචනයක් එල්ල වෙනවා මේ 20වන ව්‍යවස්ථා සංශෝධනයෙන් රටේ ප්‍රජාත්‍රන්ත්‍රවාදය වලපල්ලට යවලා ඒකාධිපති පාලනයක් තමයි මේ සිද්ධ කරන්න යන්නේ කියලා.

පිළිතුර

ඒක පට්ටපල් බොරුවක්. අපි ඒකාධිපති පාලනයට කිසිසේත්ම සූදානමක් නෑ. මහින්ද රාජපක්ෂ මැතිතුමා කියන්නේ තමන්ගේ ජනපතිවරණ මැතිවරණ ප්‍රතිඵලය පරාදයි කියලා ප්‍රකාශ කරන්නත් කලින් තණතුර දාලා ගෙදර ගිය කෙනෙක්. ගෝඨාභය රාජපක්ෂ මැතිතුමා කියන්නේ අපි බලහත්කාරයෙන් මට බෑ කියද්දි දේශපාලනයට ගෙනාපු කෙනෙක්. බල තණ්හාව තියෙන කෙනෙක් මෙතන නෑ. ඒ නිසා නායක පුටු බදාගෙන ඉන්න සමහර පක්ෂවල නායකයන්ගේ මට්ටමෙන් මේ නායකයන් මනින්න එපා කියලා අපි ඉල්ලා සිටිනවා.

ප්‍රශ්නය

නමුත් අපි දැක්කා පහුගිය දා විපක්ෂයේ කණ්ඩායමක් සඳහන් කළා මේ ව්‍යවස්ථා සංශෝධනයට තුනෙන් දෙකේ බලය කවදාවත් ලැබෙන්නෙ නෑ. ඔබතුමාලගේ පක්ෂයේම මේකට අකමැති අය ඉන්නවා කියලා. ඒ සම්බන්ධව ඔබේ අදහස කුමක්ද ?

පිළිතුර

ලිහන්න තියෙන මල්ල ඔබා බලන්නේ කුමටදැයි කියලා පරණ කියමනක් තියෙනවා. තුනෙන් දෙක පෙන්නන්න ඕනෙ දැන් නෙවෙයි නේ. ඡන්දය විමසන දවසට. අපි එදාට බලාගමු.

– අරවින්ද අතුකෝරල

56,147 views

8 Comments to “ගෝටාභය මහතා බෑ කියද්දී අපියි ඔහුව දේශපාලනයට ගෙන ආවේ.. ඒකාධිපති පාලනයට අපේ කිසිම සූදානමක් නෑ…”

  1. ඇම්ඩා says:

    70වන ව්‍යවස්ථාව සංශෝධනය කරන්න ජනමතවිචාරණයක් තියන්න අවශ්‍ය බව ශ්‍රේෂ්ඨාධිකරණය 2002 දී විනිසුරුවරු 07ක් ඒකමතිකව තීරණය කරල තියෙන බව නීති විශාරදයන් ජනාධිපතිවරයාගෙන් සහ රටෙන් සගවන්නේ ඇයි?

    • සිරා says:

      මේ කතාව ඇත්ත. මේ ගේම ගැහැව්වෙ 2015දි මෛත්‍රීපාල සිරිසේන ජනාධිපතිවරයාගෙ කනෙන් රින්ගල. වැලිඅමුණ, ජයම්පති, පාක්‍යසෝති, රනිල්, යුවන්ජන් විජේතිලක, ඉන්දිකා දේමුණි, ෆයිසර් මුස්තාප, තිලක් මාරපන තමා මේ විදිහට 2015 ශ්‍රේෂ්ඨාධිකරණ තීරණ උල්ලංඝනය කරවන්න කටයුතු කළේ. ගෝඨාභය ජනාධිපතිට මේ කුමන්ත්‍රණය තේරුම් ගන්න කැපාසිටියක් නෑ. මොකද අලිස්බ්‍රි, ජී.ඇල්ල දප්පුල එකතුවෙලා මේ කුමන්ත්‍රණය යටගහන්න 20 ගෙනල්ල තියෙන්නෙ.

  2. රටවැසි says:

    ආඩම්බරයි ඇමති තුමනි . තවලමට අර කවුද බිරුවට ඒක නවතින්නැති බව අපි දන්නවා . හඳත් ඒවගේ .

  3. ගංගා says:

    ගෝඨාභය ඇයි? 2015 ව්‍යවස්ථා කුමන්ත්‍රණය යට ගහන්න 20 ගේන්න දගලන්නේ..

  4. ATHTHADA UDAYA MARAI NEDA.PALA PAHARAYA…..

  5. kamal says:

    පවු අනේ

  6. රට වෙනුවෙන් says:

    කැත වැඩ කරන්න එපා අයිෂේ.
    තවුසේටයි තවුසෙගේ කාර්ය මණ්ඩලයටත් දළදා හාමුදුරුවන්ගෙන්, ඒ වගේම මල්වතු අස්ගිරි මහා නායක ස්වාමීන් වහන්සේලාගෙන් ආශිර්වාදය ලබා ගත්තම ඇතිද. ඇයි අපි චීන්නුද? අපිට ආශිර්වාද කරන්න ඕනේ ලෙබ්බෙලාද?

Main News