ජනාධිපති තම්බින්ට-දෙමලූන්ට කත් අදිනවා.. හාමුදුරුවන් සමග නිල නිවස වටලනවා..- දුරකථනයෙන් තර්ජන

May 24, 2017 at 10:02 pm | lanka C news
ජනාධිපති තම්බින්ට-දෙමලූන්ට කත් අදිනවා.. හාමුදුරුවන් සමග නිල නිවස වටලනවා..- දුරකථනයෙන් තර්ජන

ජනාධිපති මෛතී‍්‍රපාල සිරිසේන මහතාගේ නිල නිවස වටලා කුඩු කරන බව පවසමින් පොලිස් හදිසි ඇමතුම් ඒකකය වෙත දුරකතනය මගින් තර්ජනය කිරීමේ සිද්ධියකට අදාළ එම ඇමතුම ලබාදුන් පුද්ගලයා සම්බන්ධයෙන් කඩිනම් පරීක්ෂණයක් ආරම්භ කර ඇතැයි කුරුදුවත්ත පොලිසිය කොළඹ ප‍්‍රධාන මහේස්ත‍්‍රාත් ලාල් රණසිංහ බණ්ඩාර මහතා වෙත අද (24) කරුණු වාර්තා කර ඇත.

භික්ෂූන් වහන්සේ නමක් වශයෙන් හදුන්වා දෙමින් ‘ජනාධිපතිතුමා තම්බින්ට හා දෙමලූන්ට කත් අදින පුද්ගලයකු බවත් අද දින රාතී‍්‍ර ජනාධිපති නිල නිවස හාමුදුරුවන් සමග වටලා කුඩු කරන’ බවට සදහන් කරමින් මෙම තර්ජනාත්මක දුරකතන ඇමතුම පොලිස් හදිසි ඇමතුම් ඒකකය වෙත ලබා දී තිබුණේ ඉකුත් 23 වැනිදා බවට එහි ස්ථානාධිපතිවරයා විසින් කුරුදුවත්ත පොලීසිය වෙත පැමිණිලි කර තිබිණ.

මෙම ලබාදී ඇති දුරකතන පණීවිඩය අනුව යම් සිදුවීමක් සිදුවුවහොත් ජාතික සංහිදියාවට බාධාවක් වීමට බොහෝ දුරට ඉඩ ඇති බැවින් මේ දුරකතන පණීවිඩය ලබා දී ඇත්තේ කවුරුන්ද යන්න සම්බන්ධයෙන් සහ ජාතිවාදය අවුස්සන කල්ලියක අයකු ද යන්න සම්බන්ධයෙන් විමර්ශනයක් ආරම්භ කර ඇතැයි මෙහිදී කුරුදුවත්ත පොලිසිය වැඩිදුරටත් අධිකරණයට කරුණු වාර්තා කර තිබිණ.

– Lankadeepa

117 views
Main News