ජාතිවාදය අවුස්සන හාමුදුරුවරුන්ට, පූජකයන්ට දැඩි දඩුවම් පැණවිය යුතුයි..-SB

June 5, 2017 at 8:40 am | lanka C news
ජාතිවාදය අවුස්සන හාමුදුරුවරුන්ට, පූජකයන්ට දැඩි දඩුවම් පැණවිය යුතුයි..-SB

ජාතිවාදය හා ආගම්වාදය යනු තිරිසන් ග්‍රෝත්‍රික ලක්ෂණ බවත්, ජාතිවාදය හා ආගම්වාදය අවුළුවන හාමුදුරු කෙනෙක් හෝ වෙනත් පූජකයෙක් වේනම්, එවැනි අයට දැඩි දඬුවම් පැණවිය යුතු බව සමාජ සවිබල ගැන්වීම්, සුභසාධන හා කන්ද උඩරට උරුමයන් පිළිබඳ අමාත්‍ය එස්.බී.දිසානායක මහතා පැවසීය.

ඇමැතිවරයා එසේ පැවසුවේ පොරමඩුල්ල මධ්‍ය මහ විද්‍යාලයේ නව තාක්ෂණ විද්‍යාගාරය විවෘත කිරීමේ උත්සවයේදීය.

එම උත්සවයේ දී ඇමැතිවරයා පොරමඩුල්ල මධ්‍ය මහ විද්‍යාල සිසුන්ගෙන් ඉල්ලා සිටියේ කිසි දිනෙක ජාතිවාදී හා ආගම්වාදී නොවී සියළු ජාතීන්ට හා ආගම් වලට ඉහලින් සළකන පුද්ගලයන් බවට පත්වන ලෙසයි.

ඇමැතිවරයා උත්සවයේදී මෙසේද කීවේය.

1994 දී අපි අසීරුවෙන් කඳුරට ජනතා පෙරමුණේ සහයෙන් තමයි දුරුලභ ආණ්ඩුවක් හැදුවේ. රාධක්‍රිෂ්ණ ඇමැතිතුමා දේශපාලනඥයන් අතර ඉතා දුරුලභ පිරිසිදු දේශපාලන චරිතයක්. දොස්තරවරු කොච්චර විරුද්ධ වුනත් මම පුද්ගලික වෛද්‍ය විද්‍යාලයක් අරින්න අවසර දුන්නා. නිදහස් අධ්‍යාපනය කනවා කියලා කොච්චර කෑගැහුවත් මම ඉන්ජිනේරු උපාධි ආයතන 17 ක් විවෘත කළා. ඒ කාළේ හිටපු උසස් අධ්‍යාපන ඇමැතිවරු අන්තරේ ශිෂ්‍යයන්ගේ කෑගැහීමට වෙනත් ආයතන වලට විශ්ව විද්‍යාලය යන නම පාවිච්චි කරන්නත් බැරිවෙන නීති හැදුවා. මම ඒ නීති කාණුවට දාලා නිදහස් අධ්‍යාපනයට වගේම අධ්‍යාපනයට ඇති නිදහසත් රැක ගත්තා.

අපේ රටේ පළමු රජතුමා හැටියට සළකන්නේ පණ්ඩුකාභය රජතුමා. විජය කුමාරයාට ඉන්දියාවෙන් ගෙනාපු බද්‍ර‍කච්ඡායනා කුමරිය සමඟ ආපු ඇයගේ සහෝදරයන් 06 දෙනෙකුගෙන් එක් සහෝදරයෙක් යක්ෂ ග්‍රෝතික කාන්තාවක් විවාහ කරගෙන ඉපදුනු දරුවා හැටියට තමයි පණ්ඩුකාභය රජතුමාගේ ඉතිහාස කථා වල සඳහන් වෙන්නේ.

මේ ලෝකේ හඳුනාගත් භාෂාවන් 7742 ක් තියෙනවා. මේ සියළු දෙනා එකිනෙකාට සම්බන්ධ කම් තියෙනවා. අපි වැඩියෙන්ම සම්බන්ධ ඉන්දියාවට. අපේ භාෂාවේ හුඟක් දෙමළ වචන, පාලි වචන, සංස්කෘතික වචන තියෙනවා. අච්චාරු-කොකිස් යන වචන ලන්දේසි පෘතුග්‍රීසී වචන. ඉංග්‍රීසී වචන අපේ භාෂාව වෙලාගෙන තියෙනවා.

ඒ නිසා දරුවනේ කවදාවත් ජාතිවාදී ආගම්වාදී වෙන්න එපා. එවැනි සිදුවීම් දැන් වෙනවා. ජාතිවාදය අවුස්සන හාමුදුරු කෙනෙකු හෝ වෙනත් පූජකයකු වුනත් දැඩි දඩුවම් පැණවිය යුතුයි. ආගම්වාදය,ජාතිවාදය තිරිසන් ගෝත්‍රික ලක්ෂණයි. මේ දරුවෝ කවුරුත් මේවා ඉගෙන ගන්න එපා.මගේ හොඳම මිත්‍ර‍යා පොරමඩුල්ල පාසලේ හිටපු රාමනාදන්.

– සංජය දසනායක

121 views
Main News