ට්‍රම්ප් මහතාගේ යථාවාදී තථාකාරී ගුණය ඉස්මතු වේවා…

January 21, 2017 at 10:00 am | lanka C news
ට්‍රම්ප් මහතාගේ යථාවාදී තථාකාරී ගුණය ඉස්මතු වේවා…

ඇමරිකා එක්සත් ජනපද අභිනව ජනාධිපති ලෙස ජන්දයෙන් තේරී පත් වූ ඩොනල්ඩ් ට්‍රුම්ප් මහතා ශ්‍රී ලංකාවේ වේලාවෙන් ඊයේ රාත්‍රී වොෂින්ටන් නගරයේ දී දිවුරුම් දෙන ලදි. අත් මේස් පැළද සිටි සිය සුරූපී බිරිද රැගෙන ආ බයිබල් දෙකක් මත සිය වම් අත තබා හෙතම දිවුරුම ලබා දෙන ලදි. ඉන් එක් බයිබලයක් ඒබ්‍රහම් ලින්කන් ජනාධිපති දිවුරුමට යොදා ගත් බයිබලයයි. අනෙක ට්‍රුම්ප් මහතා 1955 වසරේ දී ප්‍රේස්බෙටරියන් ඉරිදා පාසලින් සමත් වූ පසු සිය මව තෑගි කල බයිබලයයි. ඇමරිකා එක්සත් ජනපද නව ව්‍යවස්ථාව රැක ගනිමින් කටයුතු කිරීමට දෙවියන් වහන්සේගේ උදව්ව ඉල්ලීම මෙම දිවුරුමේ දී සිදු කෙරේ (help me god). මෙම දෙවියන් කවුද යන වග ගැන විවිධ අයට විවිධ අදහස් තිබිය හැකිය (මගේ විශ්වාසය නම් මේ මාර දිව්‍ය පුත්‍රයා නමින් බුදුදහමේ කියැවෙන අතිශය බලගතු ලෞකික දෙවියා බවයි).

දිවුරුමෙන් පසු නව ජනාධිපතිවරයා සිදු කළ කතාව ඉතා වැදගත් ය. එය ඇමරිකානු ජනාධිපතිවරයකු සිදු කල කෙටිම පදවි ප්‍රාප්ත කතාවක් බව ද මාධ්‍ය වාර්තා කර තිබිණ( මේ සමග මිනිත්තු 17ක එම කතාව දක්වා ඇත). ඉංග්‍රීසි තේරුම් ගත හැකි සියල්ලන් මෙය හොඳින් ශ්‍රවණය කල යුතුය.එම හැකියාව නැති අයගේ යහපතට කවුරුන් හෝ මුළු කතාවම සිංහලයට පරිවර්තනය කරන්නේනම් අගනේය. මෙහිදී ට්‍රුම්ප් ජනාධිපතිවරයා ඇමරිකානු ජාතිකත්වයට ආමන්ත්‍රණය කළ අතර වෙනත් ජනාධිපති පත්වීමකට වඩා මෙය වෙනස් වන්නේ ඇමරිකානු ජනතාවට බලය ලබා දෙන කාල පරිච්ජේදයකට මුල පුරන නිසා බව අවධාරණය කළේය. වියැකී යන “ඇමරිකානු අභිමානය” ඇමරිකානු ජාතියට යලි ලබා දෙන බව ඔහු සපථ කලේ ඔබාමා ඇතුළු පෙර ජනාධිපතිවරු කිහිප දෙනකු අසලින්ම සිටියදී ය. අපගේ ජීවන ක්‍රමය අන් ජාතීන් මත බලෙන් නොපටවන බවත් අන් ජාතීන්ට අප අනුකරණය කිරීමට සිතෙන මට්ටමට ඇමරිකානු ජීවන රටාව බැබලවීමට කටයුතු කරන බවත් හෙතෙම පැවසීය. ඇමරිකානු අභිමානය රැක ගැනීමට දෙවියන් වහන්සේගේ රැකවරණය ලැබෙන බව ට්‍රුම්ප් මහතාට දැඩි විශ්වාසයක් විය. ඔහු ඉතා අභිමානයෙන් ඒ බව පැවසීය ( most importantly we will be protected by god).

ට්‍රුම්ප් සිය මංගල කතාවෙන් කිවූ දේ සිදු කරතැයි අපට එතරම් විශ්වාසයක් නැත.ඔහු ඒ කියූ දේ කිරීමට ඇමරිකානු ඔත්තු සේවා සහ විදේශ කටයුතු දෙපාර්තමේන්තුව ඉඩ දේ දැයි සැක සහිතය. ඇතැම් විට ජෝන් එෆ් කෙනඩි ආකාරයේ ඉරණමකට ඔහුට මුහුණ දීමට සිදු වනු ඇත (කෙනඩිට එකී ඉරණමට මුහුණ දීමට හේතු වුයේ වෙනත් කරුණුය). කෙසේ වෙතත් ටුම්ප්ගේ කතාවෙන් අවධාරණය කල දේ මුළු ලෝකයටම වැදගත්ය. විශේෂයෙන් අනේක දුක් ගැහැටට තර්ජනයට ලක් වන සිංහල ජාතියට වැදගත්ය. ට්‍රුම්ප් මහතා ගේ යථාවාදී තථාකාරී ගුණය ඉස්මතු වේවා යැයි අපි ප්‍රර්ථනා කරමු.

fb චන්න ජයසුමන


380 views
Main News