දයාසිරි වරද පිලිගනී.. ජාතික කොඩිය විකෘතියට සමාව ඉල්ලයි..

November 2, 2020 at 12:40 pm | lanka C news
දයාසිරි වරද පිලිගනී.. ජාතික කොඩිය විකෘතියට සමාව ඉල්ලයි..

දේශීය නිෂ්පාදනයක් ලෙස ජාතික ධජය නිර්මාණය කිරීමේ දී යම් අඩුපාඩුවක් වූයේ නම් එම වගකීම රාජ්‍ය අමාත්‍යවරයා ලෙස තමන් භාර ගන්නා බව රාජ්‍ය ඇමැති දයාසිරි ජයසේකර මහතා සඳහන් කරයි.

දේශීය වශයෙන් නිෂ්පාදනය කිරීමේ දී එහි විකෘති වී ඇතැයි එල්ල වූ චෝදනා වලට ප‍්‍රතිචාර ලෙස ඔහු මේ බව සදහන් කරයි.

එම වරද නිවරද කරගෙන ඉදිරියේදී කටයුතු කරන බවද ඇමතිවරයා සදහන් කරයි.

මේ බව සදහන් කරමින් ඔහු තම සමාජ ජාල ගිණුමේ තබා ඇති සටහන මෙසේය.

” ආයුබෝවන්!
නිදහස ලබා දශක ගණනක් ගියත්, ලංකාවේ නිදහස් දාට ඔසවන ජාතික කොඩිය පවා විදේශයන්ගෙන් ආනයනය කරන රටක් තමයි, වර්ෂ 2020 පාර්ලිමේන්තු මැතිවරණයෙන් අප බාරගත්තේ. අප සමරන නිදහස සංකේතාත්මක ව හෝ අර්ථවත් කරනු පිණිස, අතිගරු ජනාධිපති ගෝඨාභය රාජපක්ෂ මැතිඳුන්ගේ සෞභාග්‍යයේ දැක්ම වැඩපිළිවෙල තවදුරටත් ඉදිරියට ගෙන යමින්, මෙතෙක් චීනයෙන් ආනයනය කරණු ලැබූ සිංහ කොඩිය වෙනුවට “ස්වදේශීය බතික් කර්මාන්ත කරුවන් ගේ නිර්මාණයක් වූ” ජාතික කොඩියක් හා බෞද්ධ කොඩියක් නිර්මාණය කිරීමට අප විසින් පසුගිය දා පියවර ගනු ලැබුවා.

එහිදී, නුදුරු අනාගතයේදී වෙළෙඳපොළට නිකුත් කිරීමට බලාපොරොත්තු වන, දේශීය නිර්මාණ කරුවන් විසින් අප වෙත ලබා දුන් ආකෘතීන් කිහිපයක් අතිගරු ජනාධිපති තුමන් වෙත සංකේතාත්මක ව ලබාදුන් අතර එය එතුමන්ගේ මහත් වූ පැසසුමට බඳුන් වුණා.

කෙසේ වෙතත්, මෙහිදී එළිදක්වනු ලැබුවේ ආකෘති කීපයක් මිස අවසාන නිමැවුම නොවෙයි. ඒවා තවමත් ඇත්තේ වැඩි දියුණු කෙරෙමින්. එහිදී අප වෙත ලැබෙන ප්‍රශංසා මෙන් ම විවේචනත් සැලකිල්ලට ගැනීමට අප උදක් ම අපේක්ෂා කරනවා. විශේෂයෙන් ම, සමාජ මාධ්‍යවල මේ පිළිබඳ කතාබහක් ඇති වී ඇති බව අප නිරීක්ෂණය කළා. ඒ සියලු විවේචන, සුහද හදින් යුතු ව අප බාරගන්නා බව මෙහිදී කිවයුතුයි.

ජාතික කොඩියේ සිංහයාගේ ලාංඡනයට සාධාරණයක් වීමට නම්, සිංහ කොඩියේ, සිංහයාගේ ඉදිරි බාහූන්ගෙන් සංඛේතවත් කරන “සම්පත් පරිහරණයේ ඇති නිර්වද්‍යතාවය” අනිවාර්යයෙන් ම තිබිය යුතුයි. එබැවින්, මෙරට මුදල් පිටරටට යෑම නැවැත්වීම උදෙසා, අපේ රටේ නිපදවිය හැකි සියලු දේ මෙරට තුළ ම නිෂ්පාදනය කිරීම සහ එමගින් මෙරට ස්වයංපෝෂිත කිරීම අපේ අරමුණයි. ඒ සඳහා බතික්, අත්යන්ත්‍ර රෙදි හා දේශීය ඇඟළුම් නිෂ්පාදන රාජ්‍ය අමත්‍යාංශයත්, සළුසල ආයතනයත් උපරීම ලෙස සහයෝගය දක්වනවා. එහි තවත් එක ව්‍යාපෘතියක් ලෙසයි, දේශීය ඇඟලුම් හා දේශීය අමුද්‍රව්‍ය වලින් ම නිෂ්පාදිත ජාතික සහ බෞද්ධ කොඩි ජනධිපතිතුමන් වෙත පිළිගන්වනු ලැබුවේ.

අපට ලැබෙන අදහස් උදහස් සහ අතිගරු ජනපතිතුමන්ගේ උපදෙස් මත එම ආකෘති වැඩි දියුණු කොට, ආර්ථිකමය නිදහසේ වසර ලෙස අප සලකන, ලබන වසරේ නිදහස් දිනය දා රටට ම හඳුන්වාදීමට අප අදහස් කරනවා. එමෙන් ම එම වසරේ වෙසක් පුන්පොහෝ දිනය නිමිති කරගෙන අපේ රටේ අපේ මිනිසුන්ගේ අතින් නිමැවෙන බෞද්ධ කොඩිය ද එලෙස ම හඳුන්වා දී, මෙරටේම නිෂ්පාදිත ජාතිත කොඩියක් සහ බෞද්ධ කොඩියක් රටට දායාද කිරීම අපේ පරම අභිලාෂය යි.

එපමණක් නොවෙයි. ඊයේ පෙරවරුවේ බිසෝපුර ගම්වැසියෝ, උදෑසන එළඹි සුබ මොහොතින් අත්යන්ත්‍ර භාවිත කරමින් කඨිනය ලෙස පිරිනැමීමට අවශ්‍යය සිවුර මැසීම ආරම්භ කළා. එතැන් පටන් පුරා සතියක් වියනු ලබන තනිපොට සිවුර හත් වෙනිදා, මහ පෙරහැරකින් සෝමාවතී පුද බිමට වැඩම කිරීමට නියමිතයි. එදින ම, එනම් නොවැම්බර් මස හත් වෙනිදා, රාජ්‍ය කඨිණ මහෝත්සවයේදී මෙම කඨීණ චීවරය සාංඝික කෙරෙනු ඇති. ඊට පසු දින, එනම් නොවැම්බර් අට වෙනිදා සංඝයා වහන්සේලා විසින් මසා නිමවන ලද කඨිණ චීවරය, ශාඛානුසාරයෙන් – දේශීය අමු ද්‍රව්‍ය යොදා පඬු පොවනු ලබනවා. ඊට සමගාමී ව, සෝමාවතී පුදබිමේදී, ස්වාමීන් වහන්සේලා පනස් නමකට සංඝගත දක්ෂිණාවක් ද පිරිනැමෙනවා. මේ මහානිසංස – මහත්ඵල පුණ්‍යකර්මය, මින්මතු සෑම වසරක ම, ශ්‍රී ලංකාව පුරා විසිරී ඇති සියලු විහාරස්ථාන ආශ්‍රිතව කපු වගා කරමින්, කපු නූල් කටිමින්, එම කපු නූලින් ම වියන ලද කපු රෙදි භාවිතා කර කඨිණ චීවරය මසා නිමවා, සාංඝික කර, ඉනික්බිති, දේශීය අමුද්‍රව්‍ය භාවිත කරමින් පඬු පොවීමටත්, එය රාජ්‍ය උත්සවයක් ලෙස පැවැත්වීමටත් අපේක්ෂිතයි.

ස්වයංපෝෂිත ආර්ථිකයක් කරා අප යාමට තැත්කරන මේ ගමන දුෂ්කරයි, කටුකයි. නමුත් ඒ ගමනේ අවසාන ප්‍රතිඵලය අපේ නිවහල් බව සහ ආර්ථික නිදහසයි. ඒ ගමනේදී අප කරන විවිධ දේවල කුඩා අඩුපාඩු තියෙන්න පුළුවනි. ඒ සියලු වැරදි අඩුපාඩුවල වගකීම, බතික්, අත්යන්ත්‍ර රෙදි හා දේශීය ඇඟළුම් නිෂ්පාදන රාජ්‍ය අමාත්‍යවරයා ලෙස මා පුද්ගලික ව බාරගන්නවා. නමුත් ඒ සමග ම, මේ මහා ක්‍රියාන්විතය පසුපස සිටින සිය දහස් ගණනක් වූ අපේ ම මිනිසුන්ගේ දහදිය මහන්සියට හිමි ගරුත්වය ඔවුන්ට දීමට අපි කාරුණික වෙමු. එදිනෙදා කතාබහේදී, සමාජ මාධ්‍යවලදී, අපේ මිනිසුන්ගේ මහන්සියෙන් නිපැයෙන අපේ දෙයට ගැරහීමෙන් තොර ව, අපේ දේ ගැන සාඩම්බර වෙන්නැයි මා ඔබෙන් ඉතා නිහතමානී ව ඉල්ලා සිටිනවා.

යළිත් මතක් කරන්නම්, වරදක් අඩුපාඩුවක් වේ නම්, එහි වගකීම මගේ. නමුත් මේ මහා ක්‍රියාන්විතයේ ගෞරවය, ඒ පසුපස සිටි සුවහසක් ශ්‍රී ලාංකිකයන්ගේ. වැරැදි අඩුපාඩු නිවැරැදි කරගනිමින්, වැටි වැටී හෝ අපි ඉදිරියට ම යා යුතුයි. අපේ ජාතික කොඩියේ සංකේතය අර්ථවත් වන්නේ එවිටයි. ඔබ සැමට සම්මා සම්බුදු සරණයි!”

– dayasiri jayasekara FB

66,846 views

23 Comments to “දයාසිරි වරද පිලිගනී.. ජාතික කොඩිය විකෘතියට සමාව ඉල්ලයි..”

  1. කවටයා says:

    ජාතික කොඩිය ගැන අවබෝදයක් නැති ministers ලද පාර්ලිමේන්තුවේ ඉන්නෙ

  2. Gamini says:

    No need too much of explanation. No need bring President , his vision and his programs here. If there is a mistake please accept it and correct it immediately. Thanks.

    • LION says:

      වැරදි කිරීම මිනිස් ගතියක් සමාව ගත්තා වගේම අපේ ජාතික කොඩිය වගකීමෙන් නිර්මාණය කරන්න ..ඔබතුමා ට හැකිනම් .සංහිදියා පටි 2 ඉවත් කර අපේ රටට ම ආවේනික වූ අපේ රටේ පැරණි සිංහල හෙළ කොඩිය නැවත ජාතික කොඩිය ලෙස නිර්මාණය කරන්න ..ජයවේවා

  3. ආමිස says:

    මේ වගේ අය නීතිඥයන් වුණේ කොහොමද? ජී. ඇල් ගෙ ගෝලයෙක් නෙ. මේව වැරදි නෙමේ හිතාමතා කරපුව. පස්සෙ නැට්ට පස්ස පැත්තෙ ගහ ගත්ත..

  4. Deviyo says:

    Making mistakes is human, accepting mistakes is noble and, forgiving mistakes is divine.

  5. S.Vitharana says:

    මෙය සමාව දිය හැකි වරදක් ද? පැහැදිලි නොසැලකිල්ල.

  6. prasa says:

    Agreed.But it was presented to president and it was expose to media.So as ministry it had to check and confirm accuracy before the functions.but accepting mistakes too good sign.But it wont cover the irresponsibility as ministry

  7. Super says:

    මේකේ පොස්ට් දාන සමහර මිනිස්සු මොනතරම් කුහකද කියලා හිතෙනවා. වැරද්දක් උනා, සමාව ඉල්ලුව එකවත් පිළිගන්න බැරි අධම මිනිස්සුත් ඉන්නවා. හැබැයි කියන්නේ නම් බුදුන් වැඩිය දේශය කියලා.

    • OLU says:

      ඕනෑම වරදක් කරලා සමාව ඉල්ලීම පහසු දෙයක් ..ඇමතිවරයෙක් වගකීමකින් කටයුතු කල යුතුයි .ශ්‍රී ලංකාවේ ජාතික කොඩිය සිංහ කොඩිය … එදා සිට සිංහයාගේ සංකේතය ඉතා වැදගත් සංකේතයක් බව තේරුම් ගතයුතුයි

    • Lakshman says:

      Well-said.

  8. පුියන්ත says:

    සිදුවී ඇති අතපසුවීම පෙන්වාදීමෙන් පසුව අදාල වරද නිවැරැදි කිරිමට සහ වරද පිලිගැනීමට කටයුතු කිරිම අගය කරනවා සියලු දේ විවෙිචනය නොකොට වැරදීමි අතරතුර උවද ගන්නා උත්සාහය අගය කලයුතුයි

  9. Alapaluwa says:

    පොහොට්ටුවටම ගැලපෙන හාදයා

  10. Saradiel says:

    Tell one deed Dayasiri did correctly so far in his life!

Main News