දළදා මාලිගය අභියස මාර්ගය විවෘත නොකරන බවට මහා සංඝරත්නයට සහතික වෙනවා..- කිරිඇල්ල

March 28, 2017 at 8:02 am | lanka C news
දළදා මාලිගය අභියස මාර්ගය විවෘත නොකරන බවට මහා සංඝරත්නයට සහතික වෙනවා..- කිරිඇල්ල

‘ශ‍්‍රී දළදා මාලිගය අභියස මාර්ගය විවෘත නොකරන බවට ගරුතර මහා සංඝරත්නයට සහතික වෙනවා’ යයි උසස් අධ්‍යාපන හා මහාමාර්ග අමාත්‍ය ලක්ෂ්මන් කිරිඇල්ල මහතා පවසයි

ඔහු මෙසේ කියා සිටියේ මහනුවර ගුරුදෙණිය ප‍්‍රදේශයේ ග‍්‍රාමීය මාර්ග කිහිපයක් ජනතා අයිතියට පත් කිරීමෙන් අනතුරුව එහි පැවති ජන හමුවක් අමතමිනි.

‘පසුගිය දා පුවත්පත් වල පලවී තිබුණා ශ‍්‍රී දළදා මාලිගාව අභියසින් දිවෙන මාර්ගය විවෘත කිරීමට ඇතැම් පාර්ශව කටයුතු කරන බවට . මම පැහැදිලිවම කියා සිටිනවා අපේ ගරුතර මහා සංඝරත්නයට , යහපාලන රජය තිබෙන තාක් ශ‍්‍රී දළදා මාලිගාව ඉදිරිපිට මාර්ගය නැවත විවෘත කරන්න දෙන්නේ නැති බව . මහනුවර නගරයේ දිගු කලක් තිස්සේ පවතින වාහන තදබදය ඉතා කඩිනමින් අවසන් කිරීමට අවශ්‍ය වැඩ පිළිවෙල රජය විසින් සකස් කර තිබෙනවා . තව වසර දෙකකින් තැන්නේකුඹුරේ සිට දිවෙන යෝජිත උමං මාර්ගයේ ඉදිකිරීම් අවසන් කර මහනුවර නගරයේ පවතින මාර්ග තදබදය අවම කිරීමට කටයුතු කරනවා. ඒ වගේම ජපන් රජයේ ආධාර ඇතිව මහනුවර නගරය පුළුල් කර නව නගර සංවර්ධන සැලැස්මක් ක‍්‍රියාත්මක කරනවා.

මහනුවර සෙංකඩගල මැතිවරණ කොට්ඨාශයේ දිගු කලක් කිසිදු සංවර්ධනයකට ලක් නොවූ මාර්ග 03 ක් සංවර්ධනය කර ජනතා අයිතියට පත්කිරීම අමාත්‍යවරයාගේ ප‍්‍රධානත්වයෙන් සිදු කෙරිණි. ගුරුදෙණිය මවුන්ට් පැරඩයිස් මාර්ගය , ගුරුදෙණිය උඩතැන්න මාර්ගය , ගුරුදෙණිය පැරණි හඟුරන්කෙත මාර්ගය කොන්ක‍්‍රීට් යොදා සංවර්ධනය කෙරිණි. ව්‍යාපෘතිය සඳහා වැය වූ මුදල රුපියල් ලක්ෂ 270 කි. උසස් අධ්‍යාපන හා මහාමාර්ග අමාත්‍යාංශයේ මෙහෙය වීම යටතේ මාර්ග සංවර්ධන අධිකාරිය මඟින් සංවර්ධන කටයුතු සිදු කර ඇත.

– රජිත සමරසූරිය

139 views
Main News