දෙරණ මාධ්‍ය නිදහස අවභාවිත කරලාලූ.. රජය තවත් විමර්ෂණයක් අරඹයි… ලිඛිතව දන්වයි..

November 20, 2016 at 1:25 pm | lanka C news
දෙරණ මාධ්‍ය නිදහස අවභාවිත කරලාලූ.. රජය තවත් විමර්ෂණයක් අරඹයි… ලිඛිතව දන්වයි..

දෙරණ රූපවාහිනී නාලිකාව විසින් ජනමාධ්‍ය අමාත්‍යංශයට එරෙහිව මාධ්‍ය නිදහස අවභාවිතා කර ද්වේශ සහගතව මාධ්‍ය මෙහෙයුමක් දියත් කලේ යයි එම අමාත්‍යංශ ලේකම් නිමල් බෝපගේ විසින් දෙරණ රූපවාහිනිය වෙත ලිඛිතව දන්වා ඇත.

ඒ සම්බන්ධයෙන්ද විශේෂ විමර්ශනයක් සිදුකරන්නේ යයි දැක්වෙන අදාල ලිපිය දෙරණ වෙබ් අඩවිය විසින් ප‍්‍රසිද්ධ කර තිබේ. මෙහි දැක්වෙන්නේ එම ලිපියයි.

මාධ්‍ය  නිදහස අවභාවිත කරමින් ජනමාධ්‍ය අමාත්‍යංශයට  එරෙහිව දෙරණ මාධ්‍ය ජාලය විසින් දියත් කරනු ලබන ද්වේශ සහගත මාධ්‍ය මෙහෙයුම පිළිබඳ සත්‍ය  කතාව

2016 ඔක්තෝබර් 12 දින ශ්‍රී ලංකා පදනම් ආයතනයේ පැවැති “සත්විරු සංහිඳ” උත්සවයේදී ගරු ජනාධිපතිතුමන් විසින් කරන ලද කතාව, එහි හරය විකෘති වන ආකාරයෙන් සංස්කරණය කොට එදින රාත්‍රී සිය ප්‍රවෘත්ති විකාශයන් ඔස්සේ දෙරණ රූපවාහිනී නාලිකාව විසින් ප්‍රචාරය කරන ලද බවට ලැබුණ පැමිණිල්ලකට අදාළව අප අමාත්‍යංශය විසින් ස්වාධීන විමර්ශනයක් පවත්වන ලදී.

එහිදී එකී විමර්ශන කමිටුව විසින් ගරු ජනාධිපතිතුමාගේ මුල් කතාවද දෙරණ රූපවාහිණිය විසින් සංස්කරණය කොට විකාශය කළ කොටසද සියුම්ව පරීක්ෂා කොට ඒකමතිකව තීරණය කර ඇත්තේ උක්ත පැමිණිල්ලෙන් පෙන්වා දුන් පරිදි දෙරණ රූපවාහිණිය විසින් එහි ප්රයධාන කොටස් කිහිපයක් හරය විකෘති වන ආකාරයෙන් සංස්කරණය කොට ප්‍රචාරය කර ඇති බවයි.

ඒ අනුව ඒ පිළිබඳව ඉදිරි ක්‍රියාමාර්ග ගැනීමට පෙර ස්වාභාවික යුක්තියේ මූලධර්ම ගරු කරමින් එකී කමිටු තීරණය දෙරණ රූපවාහිනී නාලිකාවට දන්වා ඒ පිළිබඳව ඔවුන්ගේ අදහස ප්‍රකාශ කිරීමට අවස්ථාව සලසා දෙන ලදී.එය මීට පෙරද විවිධ මාධ්‍ය  ආයතන වලට එරෙහිව ලැබුණු පැමිණිලි සම්බන්ධයෙන් අප අමාත්‍යංශය  අනුගමනය කළ සාමාන්‍ය ක්‍රියාමාර්ගය වූ අතර ඊට රාජකාරි මට්ටමින් ප්‍රතිචාර දක්වා අදාළ ගැටලු නිරාකරණය කර ගැනීමට එකී ආයතන කටයුතු කළා මිස ඒ පිළිබඳ “නීති විරෝධී මාධ්‍ය සංදර්ශන”පැවැත්වීමක් සිදු නොවීය.

එහෙත්උක්ත ලිපියට සිය ප්‍රතිචාර ඇතුළත්  පිළිතුරු ලිපියක් ඉදිරිපත් කරනවා වෙනුවට දෙරණ රූපවාහිනී අයතනය විසින් තම රූපවාහිනී නාලිකාවේද, ගුවන් විදුලි නාලිකාවේද, වෙබ් අඩවියේද, තම ෆේස්බුක් පිටු ඇතුළු සමාජ ජාල වලද එම ලිපිය ප්‍රසිද්ධියට පත් කරමින් අප අමාත්‍යංශයටද, රජයටද, පෞද්ගලිකව මා හටද අපහාසාත්මක ආකාරයේ දැවැන්ත ප්‍රචාරණ ව්‍යාපාරයක් ආරම්භ කොට එය මේ වන තුරුත් දියත් කරමින් සිටින ආකාරය නිල කටයුත්තක් සඳහා විදෙස්ගතව සිටින මා හට අන්තර්ජාලය ඔස්සේ දැකගන්නට ලැබුණි.

ඒ අනුව අධ්‍යාපනය, දැනුම, විනෝදාස්වාදය හා රසඥතාවය සිය ප්‍රේක්ෂකයාට සමබරව ලබාදෙමින් නිරවද්‍යතාවයෙන් හා සද්භාවයෙන් යුක්ත තොරතුරු සම්පාදනය ඔස්සේ වඩා විශ්වාසනීයත්වයක් සහිතව තම මාධ්‍ය මෙහෙවර ඉටුකළ යුතු බවට සියලු මාධ්‍ය ආචාරධර්ම වලින් තමන් බැඳී සිටියදී ඒ කිසිවක් කෙරෙහි සිය ගරුත්වය නොදක්වාතම මාධ්‍ය බලපත්‍රයේ අඩංගු කොන්දේසි වලටද පටහැනිව මාධ්‍ය නිදහස හාමහජන සංඛ්‍යාත අවභාවිත කරමින් සිදු කරනු ලබන මෙකී නීති විරෝධී හා අචාරධර්ම විරෝධී හැසිරීම සම්බන්ධයෙන් වහාම ක්‍රියාත්මක වන පරිදි දෙරණ මාධ්‍ය ජාලයට එරෙහිව විශේෂ විමර්ශනයක් ආරම්භ කිරීමට කටයුතු කරන බව මෙයින් දන්වා සිටින අතර මාධ්‍ය නිදහසට මුවා වී නීතිය ඉක්මවා කටයුතු කිරීමට කිසිසේත් ඉඩ නොදෙන බවද අවධාරණය කරමි.

කේ.පී. ජයන්ත/ලේ:නීතීඥ නිමල් බෝපගේ
අධ්‍යක්ෂ (මාධ්‍ය )ලේකම්
පාර්ලිමේන්තු ප්‍රතිසංස්කරණ හා ජනමාධ්‍ය අමාත්‍යංශය

218 views
Main News