නඩු තීන්දුව වැරදියි… සයිටම් නීති විරෝධියි…

February 7, 2017 at 12:00 pm | lanka C news
නඩු තීන්දුව වැරදියි… සයිටම් නීති විරෝධියි…

පිවිතුරු හෙළ උරුමයේ පක්ෂ මුලස්ථානයේ පැවැති මාධ්‍ය හමුවකදී එම පක්‍ෂ ප‍්‍රධාන ලේකම් පාර්ලිමේන්තු මන්ත‍්‍රී උදය ගම්මන්පිල මහතා මෙසේ අදහස් පල කලේය.

සරසවියක් ආරම්භ කරන විට උපාධි ප්‍රදානයට විශ්ව විද්‍යාල ප්‍රතිපාදන කොමිසමෙන් අවසර ගන්න ඕනෑ.  වෛද්‍ය පීඨයක් තිබෙනවා නම් ශ්‍රී ලංකා වෛද්‍ය සභාවේ අනුමැතිය ලබා ගන්න ඕනෑ.  ඉතාම හිතුවක්කාර විධියට මේ කිසිවක් නැතුව තමයි 2009 දී සයිටම් ආරම්භ කරන්නේ. හරියට අඹ ගහේ අඹ වැඩියි කියල දැක්කම අඹ ටික කඩාගෙන ගිහින් පාර අයිනේ අඹ අඹ කියමින් විකුණන ආකාරයට තමයි සයිටම් ආයතනය ආරම්භ කරල තියෙන්නේ.  උපාධි ප්‍රදානය සඳහා අයදුම් කරන විටත් අවශ්‍ය සුදුසුකම් සම්පූර්ණ කරලා තිබුණේ නෑ.  ඒ නිසා 2011 අගෝස්තු 30 උසස් අධ්‍යාපන ඇමති ගැසට් නිවේදනයකින් සයිටම් වෛද්‍ය උපාධි ප්‍රදානය කරන ආයතනයක් ලෙස පිලි ගන්නේ කොන්දේසි සහිතවයි.  එහෙම නම් ඒ කොන්දේසි ඒ දින වකවානු වල දී ඉටු කලොත් විතරයි ලබා දුන් අනුමැතිය වලංගු වන්නේ.  ඒවා ඉටු කරන්න අසමත් වුණොත් අනුමැතිය අවලංගුයි. අවාසනාවට මේ කාරණය අධිකරණයෙ අවධානයට යොමු වී නැහැ.  ඒ කොන්දේසි ඉටු කළ බවට ලිඛිත සාක්ෂි විමසා 2015 මාරතු මස වෛද්‍ය සභාව විසින් සයිටම් වලට යැවූ ලිපියට අද වන තුරු ප්‍රතිචාරයක් නෑ.  එසේ නම් උසස් අධ්‍යාපන ඇමතිවරයා 2011 දී ලබා දුන් අනුමැතිය දැන් අවලංගුයි. ඒ නිසා වෛද්‍ය සභාව විතරක් නෙමෙයි උසස් අධ්‍යාපන අමාත්‍යවරයා විසින් ලබාදුන්නු අනුමැතියත් නැතුවයි සියිටම් පවත්වාගෙන ගිහින් තියෙන්නේ.

ප්‍රතිපාදන කොමිසමේ අනුමැතිය තිබුණත් එයින් වෛද්‍යවරයෙකු වන්න බෑ.  වෛද්‍ය උපාධියක් ලැබුණාම වෛද්‍ය උපාධිධාරියෙකු වෙනවා මිස වෛද්‍යවරයෙකු වන්නේ නෑ.  වෛද්‍යවරයෙකු ලෙස ලංකාවේ කටයුතු කළ හැක්කේ වෛද්‍ය සභාව පිලි ගන්නා වෛද්‍ය උපාධියක් තිබෙන්නේ නම් පමණයි.  එය වෛද්‍යවරුන්ට පමණක් නොවේ අනෙකුත් වෘත්තීන්ටත් අදාළයි.  ලංකාවේ විශ්ව විද්‍යාල ගණනාවකින් නීති උපාධි ලබා දෙනවා.  නමුත් නීති අධ්‍යාපන සභාවේ අවශ්‍යතා සපුරන තෙක් නීතිඥයෙකු ලෙස කටයුතු කරන්න බෑ.  ලංකාවේ විශ්ව විද්‍යාල ගණනාවක ගණකාධිකරණ උපාධි ලබා දෙනවා.  නමුත් ගිණුම් විගණනය සඳහා වරලත් ගණකාධිකාරි ආයතනය නම් කරන සුදුසුකම් සපුරාලන්න ඕනෑ.  ලෝකය පුරාම තත්වයත් එයයි. සයිටම් ආයතනය ඒ වෛද්‍ය සභාව කියන කොන්දේසි සපුරා නැති නිසයි එහි උපාධිදාරීන් ලංකාවේ වෛද්‍ය වරයන් විදිහට කටයුතු කිරීමට ලියාපදිංචිය ලබා නොදේනනේ.

මේ රටේ පුදුම බයක් තිබෙන්නේ නඩු තීන්දු විවේචනය කරන්න.  ගුරුන්ටත් අකුරු වරදිනවා වගේ විනිසුරන්ටත් තීන්දු වරදිනවා.  ඒකනෙ අභියාචනා කරන්න ක්‍රම වේදයක් සකස් කර තිබෙන්නේ.  මෙම නඩු තීන්දුවේ අඩුපාඩු ගණනාවක් තිබෙනවා.

පලමුව නිසි අවසරයකින් තොරව වෛද්‍ය පීඨයක් ආරම්භ කර වරද කලේ සයිටම් කියන කාරණයත්  අයදුම්කරු නිසි සැලකිල්ලක් නොදක්වා අනවසර ආයතනයකට වෛද්‍යවරයෙකු වීමේ අපේක්ෂාවෙන් එකතු වී ඇති බවත් පිහාටුවක් ලබා ගැනීමට ඉබ්බෙක් පස්සෙන් යෑම පිලිබඳ අධිකරණයට කළ හැක්කක් නොමැති බවත් නොසලකා හැර තිබෙනවා.

දෙවනුව විශ්ව විද්‍යාල ප්‍රතිපාදන කොමිසමෙන් ලබා ගත් අනුමැතියත් දැන් අවලංගුයි කියන කාරණය අධිකරණය නොසලකා හැර තිබෙනවා.

තෙවනුව සයිටම් ආයතනය උපාධියක් ලබා දුන්නත් ඒ උපාධිධාරියාට වෛද්‍යවරයෙකු ලෙස කටයුතු කිරීමේ අවසරය ලබා දෙන්න වෛද්‍ය සභාව බැඳිලා නෑ.  ඒ වෛද්‍ය උපාධිය ප්‍රමිතියෙන් යුතු බවට සෑහීමකට පත් වෙනවා නම් පමණයි වෛද්‍යවරයෙකු ලෙස කටයුතු කරන්න අවසර දෙන්නේ.  නමුත් වෛද්‍ය උපාධියක් ලැබූ පමණින් ඒ උපාධිධාරියාට වෛද්‍යවරයෙකු ලෙස කටයුතු කිරීමට නීතිමය අයිතියක් ලැබෙන බවට අධිකරණය තීන්දු කරලා තිබෙනවා.

සිව් වෙනුව වෛද්‍ය උපාධියක් පිලි ගැනීම පිලිබඳ විශේෂඥ දැනුම තිබෙන එකම ආයතනය වන වෛද්‍ය සභාව “සයිටම් නිසි ප්‍රමිතියෙන් තොරයි“ කියන විට “නෑ සයිටම් පිලි ගන්න“ කියලා වෛද්‍ය සභාවට නියෝගයක් ලබා දෙන්න අධිකරණයට වෛද්‍ය විද්‍යාව පිලිබඳ වෛද්‍ය සභාවටත් වඩා දැනුමක් තිබිය යුතුයි.  එවැනි විශේෂඥ දැනුමක් අධිකරණයට නෑ.  මේ තීන්දුව වෛද්‍ය ආඥා පනත අමු අමුවේ උල්ලංඝණය කිරීමක්.

වෛද්‍ය සභාවට කළ හැක්කේ නිර්දේශයක් පමණයි.  අවසාන තීන්දුව ගත යුත්තේ සෞඛ්‍ය ඇමතිවරයායි කියලා නඩු තීන්දුව කියනවා.  නමුත් වෛද්‍ය සභාවේ නිර්දේශය නොසලකා ඉන්න ඇමතිට බෑ.  ඇමතිට වෛද්‍ය විද්‍යාව පිලිබඳ දැනුමක් නෑ.  දැන් ඉන්න ඇමතිතුමා වෛද්‍ය විද්‍යාව නොදැන සිටියත් දත් ගැන හරි දන්නවා.  නමුත් කලින් ඇමතිතුමා දැන් ජනපතිතුමා  වෛද්‍ය විද්‍යාව තබා ජීව විද්‍යාව වත් ඉගෙන ගෙන නෑ. ඒ නිසා විසේසඥ දැනුමක් නැති, තාක්ෂණික දැනුමක් නැති මහජන නියෝජිතයෙක් වන අමාත්‍යවරයාට මේ තීරනය ගත හැකියි කියල අධිකරණය තීරනය කිරීම බරපතල වරදක්.  අනිවාර්යෙන්ම වෛද්‍ය සභාව දෙනු ලබන නිර්දේෂ මත ක්‍රියා කරන්න වෛද්‍ය වරයා බැදිල ඉන්නවා.

මේ නිසා ජාතියේ නාමයෙන් වෛද්‍ය සභාව මෙම තීන්දුවට එරෙහිව ශ්‍රේෂ්ඨාධිකරණයට අභියාචනයක් යොමු කළ යුතුයි කියන ස්ථාවරයේ අපි ඉන්නවා.

සයිටම් විරෝධි සටනේ පාර්ශව තුනක් ඉන්නවා.  වාමාංශික පක්ෂ කියන්නේ කිසිම අයුරකින් සරසවි අධ්‍යාපනය මුදලට ලබා නොදිය යුතුයි කියලා.  පිවිතුරු හෙළ උරුමය විදිහට අපි කියන්නේ ලෝකයේ සාතිශය බහුතරයක් රටවල් වල වගේම සරසවි අධ්‍යාපනය මුදලට ලබා දිය යුත්තේ ආණ්ඩුව පමණයි කියලා. මුදලට උපාධියක් ලබාදෙනවානම් එය කළ යුත්තේ ආණ්ඩුව පමනමයි. එයට හේතුවක් තියෙනවා.  ලෝකයේ මොනයම් පෞද්ගලික විද්‍යාලයක්උනත් ලංකාවේ ආරම්භ කලාට කමක් නෑ. ඒ පාසැල්වල ඉගෙන ගන්න ලමයි වාඩි වෙන්නේ එක්කෝ ලංකාවේ ආණ්ඩුවේ විභාග වලට නැත්නම් එංගලන්ත ආණ්ඩුව තබන විභාගවලට. එවිට හැමෝම එක ප්‍රමිථියකට එනවා. පාසැලේ අධ්‍යපන මට්ටම නුසුදුසුනම් ප්‍රමිතියෙන් තොරනම් අනිවාර්යෙනම අර පොදු විභාගයේදී ඔවුන් අසමත් වෙනවා. මෙහිදී සිදු වෙන්නේ අධ්‍යපනය පෞද්ගලික පාසැලෙන් ලබාදුන්නත් විභාග පැවැත්වීම ආණ්ඩුවෙන් සිදු කිරීමයි. එවිට පිළිගත් විභාගයකට මහුන දීමට අනිවාර්යෙන් සිදුවෙනවා. නමුත් පෞද්ගලික විශ්ව විද්‍යාල වලදී අධ්‍යාපනයත් පෞද්ගලික අංශයෙන්.  ඒ වගේම විභාගය පවත්වන්නේත් පෞද්ගලික අංශයෙන්.  මෙයාලට ඔන හොදට ඉගෙන ගන්න නෙමෙයිනේ. උපාධි සහතිකය අරන් වෛද්‍ය වරයෙක් වෙන්න. ලේසියේනම විභාගය සමත්වෙලා උපාධිය ලබාගන්න පුළුවන් තැනට තමයි කවුරුත් යන්නේ.

මෙහිදී ඇතුමුන් අහනවා වෛද්‍ය වරුන්ට පෞද්ගලිකව බෙහෙත් දෙන්න පුළුවන් මුදල් අරන්. නමුත් වෛද්‍ය අද්‍යාපනයට විරුද්ධ ඇයි කියලා. අපි මුදල් ගෙවා වෛද්‍ය ප්‍රථිකාර ගනිද්දී යන්නේ අපිට ගෙවනන් පුළුවන් ඉහලම මිලට හොදම දොස්තර හොයාගෙන. නමුත් උපාධිය මිලට ගන්න ගියාම හොයන්නේ හොදම උපාධිය නෙමෙයි ලෙහෙසියෙන්ම සමත්විය හැකි උපාධිය. මේ විදිහට පෞද්ගලික ලාභ ලබන විශ්ව විධ්‍යාල තියෙන්නේ ලෝකයේම රවල් දහයක පමන. ඉන්දියාවත් ඉන් එකක්. අද එහි තතවය කුමක්ද? උපාධිය තුට්ටු දෙකට වැටිලා. ආචාර්ය උපාධි ධාරීන් ඉන්නවා පියුම් කමටවත් යන්න බැරුව. මැතකදී උත්තර් ප්‍රදේශයේ ආණ්ඩුව පණිවිඩ කරුවන් 350ක් බදවා ගන්න අයදුම් පත්‍ර කැදෙව්වම ආචාර්ය උපාධිය තියෙන අයත් ඉල්ළම් කරල තියෙනව ඒ තනතුරට. අද්‍යාපනයේ ප්‍රමිතිය වැටිල නිසයි ඉන්දියාවේ ඒ තත්වය උදා වුනේ. උපාධීයට කුවුරුවත් වටිනාකමක් දෙන්නේ නැති තත්වයක් උදා වෙලා.

ඒ වගේම වෛද්‍ය සංගමය ඇතුළු තවත් පිරිසක් සයිටම් වලට විරුද්ධ වන්නේ එය නිසි ප්‍රමිතියට නැති නිසා.

– අරවින්ද අතුකෝරල

283 views