නීතිය සිංහලයන් පෙලන්න පමණයි.. සුළු ජාතීන්ට නීතිය වලංගු නෑ..

හෙල බොදු සවිය සංවිධානය විසින් ජනාධිපති මෛත‍්‍රීපාල සිරිසේන මහතා වෙත යොමු කරන ලද ලිපියක් මෙහි දැක්වෙයි.

බලපවත්නා නීති හා චක්‍රලේඛන සුළු ජාතීන්ට වලංගු නොවේද?

ආණුඩුක්‍රම ව්‍යවස්ථාවේ 13 වන සංශෝධනය ප්‍රකාරව පළාත් සභාවලට ප්‍රධාන අමාත්‍ය සහ සෙසු අමාත්‍යධූර 4ක් ලබා දී ඇත. විග්නේෂ්වරන් මහතාගේ ප්‍රධාන අමාත්‍යධූරයෙන් යුත් උතුරු පළාත් සභාවට පමණක් අමාත්‍යධූර 6ක් ලැබී ඇත. නමුත් මෙය රටේ මූලික නීතිය වන ආණුඩුක්‍රම ව්‍යවස්ථාව උල්ලංඝනය කිරීමක් මෙන්ම රටේ ජනතාවගේ බදු මුදල් කරමින් වැඩිපුර අමාත්‍යධූරයක් සදහා වැය කිරීම පොදු දේපල අව භාවිතයක් නොවන්නේද?. අන් කිසිඳු පළාත් සභාවක දක්නට නොමැති විශේෂත්වයකි. කර්මාන්ත හා වාණිජ අමාත්‍ය රිෂාඩ් බදුර්දීන් අමාත්‍යවරයාට පුද්ගලික පරිහරණය සඳහා වාහන 10 ක්ද කාර්ය මණ්ඩලය සඳහා වාහන 16ක්ද ලබාදී ඇත. මෙය අමාත්‍යංශ චක්‍රලේඛණය උල්ලංඝනය කිරීමකි. අමාත්‍ය රවුෆ් හකීම් මහතා නැගෙනහිර පළාතේ වෙනමම මුස්ලිම් පරිපාලන දිස්ත්‍රික්කයක් ඉල්ලා සිටින්නේ බෝහෝ කාලය සිටය. බහුතරයක් මුස්ලිම් ජනතාව ජීවත්වන බොහෝ පළාත්වල මෙන්ම නැගෙනහිර පළාතේද මාර්ග නීති උල්ලංඝනය කරන  බවට මාධ්‍ය මගින් වාර්තා වූ අතර අපටද එහිගිය බොහෝ අවස්ථාවලදී දැකගන්නට ලැබී ඇත. එක් ජනවර්ගයකට පමණක් නීති ක්‍රියාත්මකවීම මූලික නීතිය උල්ලංඝනයවීමකි.

2015 ජනවාරි 8 වෙනිදා ඔබතුමා ජනාධිපතිවරයා ලෙස තෝරාගනු ලැබුවේ යහපාලනයක් ඇති කිරීමේ මුඛ්‍ය පරමාර්ථයෙනි. දැන් ඒ සඳහා පුරාවසර 03ක් ගතවී ඇත. ඔබතුමන් ප්‍රධාන රජය මෙරටට නව නීති හඳුන්වාදීමට ගන්නා උත්සාහය වෙනුවට පවතින නීතිරිති හා චක්‍රලේඛනයන් රටවැසියාට සමානත්වයෙන් අනුගමනය කරවීමට පියවර ගැනීම වටී. එය ජාති, ආගම්, කුලමල භේද සියල්ල ඉක්මවා සිටිය යුතුය. නීතියේ රැහැනට සිංහල සංවිධාන හා තම ජාතිය වෙනුවෙන් කටයුතු කරන ජාතිමාමකයින් පමණක් ඉලක්කවේ නම් එය කණාගාටුදායකය. හොඳම උදාහරණය නම් නීතියට අභියෝග කළ බොහෝ මැතිඇමතිවරැන් සිටියදී බොදුබල සේනා සංවිධානයේ මහලේකම් පූජ්‍ය ගලගොඩඅත්තේ ඥානසාර ස්වාමීන්වහන්සේට වහා නීතිය ක්‍රියාත්මක කිරීම දැක්විය හැකිය. එසේම ජනතා බදුමුදල් බොහො මැතිඇමතිරු අවභාවිතාවේ ‍යොදවන බවද ඔබතුමන් දන්නා කරුණකි.

ආගමික සංහිඳියාවත් ජාතික සමගියත් අගය කරන ඔබවැනි රජයකින් නීතිය සැමට සමානව ක්‍රියාත්මක නොවන්නේ මන්දැයි අප විමතියට පත්වී සිටිමු. සිංහල ජන සමාජය සංහිඳියා සහිත සමාජයකට කිසිසේත් අකමැති වන්නේ නැත. එසේ වුවද ඉතා සංවේදී ජනතාවක් වන ඔවුන් මේ ගත කරන ඉවසිලිවන්ත කාලය ප්‍රයෝජනයට ගෙන මේ කරුණු කෙරෙහි වැඩි අවධානයක් යොමු කරන ලෙස ශාසනාලයෙන් ඉල්ලා සිටිමි.

බුදුගල ජිනවංස හිමි
සභාපති