පච රණවක ඇත්තටම ඉංජිනේරුවෙක්ද.. මහා ප්‍රඥාවේ ආලෝකයෙන් බිඳක් යොදා උත්තර දෙන්න ප‍්‍රශ්න තුනක්..

June 6, 2017 at 3:50 pm | lanka C news
පච රණවක ඇත්තටම ඉංජිනේරුවෙක්ද.. මහා ප්‍රඥාවේ ආලෝකයෙන් බිඳක් යොදා උත්තර දෙන්න ප‍්‍රශ්න තුනක්..

පිවිතුරු හෙළ උරුමයේ නායක පාර්ලිමේන්තු මන්ත‍්‍රී උදය ගම්මන්පිල මහතා එම පක්‍ෂ මූලස්ථානයේ පැවති මාධ්‍ය හමුවකදී මෙසේ අදහස් පල කලේය.

ඉංජිනේරුවරයෙකු බව කියන පරිසරවේදියෙකු බව කියන ගරු පා ච රණවක ඇමතිතුමා දකුණු අධිවේගි මාර්ගය වේල්ලක් ලෙස ක්‍රියා කරපු නිසා දකුණේ ගං වතුර ඇති වුණු බවට අරුම පුදුම ප්‍රකාශයක් කළා. එතුමාගේ ඒ ප්‍රකාශයත් සමග එතුමා ඇත්තටම ඉංජිනේරුවෙකුදැයි ප්‍රශ්නයක් මතු වෙනවා. එතුමාගේ ප්‍රඥාවේ ආලෝකයෙන් බිඳක් අපි වැනි අඳුරේ සිටින ජනතාවට ලබා ගැනීමට එතුමාගෙන් ප්‍රශ්න කිහිපයක් අහනවා.

අධිවේගි මාර්ගය වේල්ලක් ලෙස වැසි දිය රඳවා ගත්තා නම් ජල ගැලීම් සිදු විය යුත්තේ අධිවේගි මාර්ගයට ඉහළින් ඇති ප්‍රදේශ වලටයි. නමුත් වැඩිම හානිය සිදු වුණේ අධිවේගි මාර්ගය සහ වෙරළ අතර තීරුවටයි. එසේ වුණේ කොහොම ද?

අධිවේගි මාර්ගය නොතිබෙන රත්නපුර අයගම සහ දෙනියාය වැනි ප්‍රදේශ වලට වැඩිම හානියක් සිදු වුණේ කොහොමද?

2003 අධිවේගි මාර්ගයක් නොතිබුණත් ජල ගැලීමේ දී මෙවැනිම හානියක් සිදු වුණේ කොහොමද?

ජල ගැලීමෙන් මෙතරම් හානියක් සිදු වුණේ අධිවේගි මාර්ගය නිසා කියලා අපි මොහොතකට සිතමු. කවුද ඒකට වග කියන්න ඕනෑ. පාරිසරික බලපෑම් ඇගයීම අනුමත කරලා අධිවේගි මාර්ගය හදන්න අවසර දුන්නු පරිසර ඇමතිවරු.

2006 අධිවේගි මාර්ගයේ ඉදි කිරීම් ආරම්භ වන විට පරිසර ඇමති මෛත්‍රිපාල සිරිසේන මැතිතුමා.

2007 – 2010 අධිවේගි මාර්ගයේ වැඩිම වැඩ කොටස ඉටු කලේ චෝදනා නගන පා ච රණවක මැතිතුමා පරිසර ඇමති කාලයේ.2011 දී අධිවේගි මාර්ගය සම්පූර්ණ කරන විට පරිසර ඇමති අනුර යාපා මැතිතුමා.

මේ නිසා අධිවේගි මාර්ගය ඉදි කිරීමෙන් පරිසරයට හානියක් සිදු වෙලා තිබෙනවා නම් ඒකට වග කියන්න ඕනෑ පරිසර ඇමතිවරු තුන් දෙනාම දැන් ඉන්නේ ආණ්ඩුවේ. අපේ පැත්තට දිගු කරන ඇගිල්ල තමන්ටම දිගුකරගන්න වෙනවා ඇමතිතුමෝ කියලයි අපිට කියන්න වෙන්නේ.

තමන්ගේ බැරි කම වසා ගන්න අධිවේගි මාර්ග හදනවා ද නැද්ද කියා යළි සලකා බැලිය යුතුයි කියා පා ච රණවක ඇමතිතුමා කියනවා. ජල ගැලීම් සහ නාය යෑම් වලට අධිවේගි මාර්ග බලපානවා නම් ඒකට උත්තරේ අධිවේගි මාර්ග නැවැත්වීම නොවේ. තෙත් කලාපය තුල දී කුළුණු මත අධිවේගි මාර්ග ඉදි කිරීමයි. වියදම 20%කින් පමණ ඉහළ ගියත් කුළුණු මත ඉදි කිරීමෙන් ජල ප්‍රවාහයට කිසිම බලපෑමක් එල්ල වෙන්නේ නෑ. ඒ නිසා කොළඹ – නුවර අධිවේගි මාර්ගය කුළුණු මත ඉදි කරන්න යැයි අපි ආණ්ඩුවෙන් ඉල්ලා සිටිනවා.

– අරවින්ද අතුකෝරල

74 views
Main News