පාරම්පරික ඉඩම් අහිමි වූ ගොවීනට විසඳුමක් දීම පරිසර විනාශයක් නොවේ..- ජනපති

March 19, 2021 at 8:40 am | lanka C news
පාරම්පරික ඉඩම් අහිමි වූ ගොවීනට විසඳුමක් දීම පරිසර විනාශයක් නොවේ..- ජනපති

“ජීවන වියදම පාලනයට ඇති ප්‍රධානම මග නිෂ්පාදනය සහ ආදායම් වැඩි කිරීම. ආනයනය කරන භාණ්ඩ මිල තීරණය වන්නේ ලෝක වෙළෙඳපොළ බලවේග අනුව. ඒවායේ මිල පාලනය කළ හැක්කේ බදු අඩු කිරීමෙන්. රට තුළ වගා කළහැකි භෝග ද්‍රව්‍ය 17ක් හඳුනාගෙන ඒවා ආනයනය සීමා කළා. දැන් මේ භෝග රට තුළ වගා කිරීම පටන් අරන්. ඉන් ලැබෙන ආදායම යන්නේ අපේ ගොවීනට : අපේ ගමට” ජනාධිපති ගෝඨාභය රාජපක්ෂ මැතිතුමා කියා සිටී.

කලින් රුපියල් 32ක් වූ වී කිලෝවකට ගෙවන මිල රුපියල් 50ට වැඩි කිරීමෙන් පසු නිෂ්පාදනය සේම ගොවීන්ගේ ආදායම ද ඉහළ ගිය බව එතුමා සඳහන් කරයි. වී මිල වැඩි කිරීමේ වාසිය එක් ප්‍රදේශයකට නොව මුලතිව්, කිලිනොච්චි, යාපනය දිස්ත්‍රික්කවල ජනතාවට ද හිමි වී ඇති බවත් මානව හිමිකම් ගැන කථා කරන පිරිස් මේ නිසා ජනතාවට ලැබී ඇති ප්‍රතිලාභ ගැන කිසිවක් නොකියන බවත් ජනාධිපතිතුමා පෙන්වා දෙයි.

ජනාධිපති රාජපක්ෂ මැතිතුමා මේ අදහස් පළ කළේ අද (18) සවස ජනාධිපති කාර්යාලීය සභා ශාලාවේ පැවති ශ්‍රී ලංකා පොදුජන පෙරමුණේ කාන්තා නියෝජිතවරියන් හා ක්‍රියාකාරිනියන්ගේ හමුව අමතමිනි. ශ්‍රී ලංකා පොදුජන පෙරමුණ නියෝජනය කරමින් සෑම දිස්ත්‍රික්කයකින්ම කාන්තා ක්‍රියාකාරිණිහූ සහ ප්‍රාදේශීය සභා මන්ත්‍රීනීහූ හමුවට එක්ව සිටියහ.

තමාගෙත්, තම රජයේත් ජයග්‍රහණය උදෙසා ශ්‍රි ලංකා පොදුජන පෙරමුණේ කාන්තා සංවිධානයෙන් ලැබුණු දායකත්වය අගයමින් අදහස් දැක්වීම ආරම්භ කළ ජනාධිපතිතුමා රජයේ ප්‍රගතිය මැන බැලීමේදී, රජය අනුගමනය කරන ප්‍රතිපත්ති සහ ඒවායේ ප්‍රතිලාභ සලකා බලන්නැයි ඉල්ලීමක් කළේය. “කෘෂිකර්මය පදනම් කරගත් ආර්ථික සංවර්ධනයේ ප්‍රතිලාභ සියලු ජනතාව අතර බෙදී යනවා. එමගින් නිෂ්පාදකයාට සේම පාරිභෝගිකයාටත් සාධාරණය ඉටුකරන්න පිළිවන්. අපි බලයට පැමිණීමෙන් පසු විශාල වැඩකොටසක් කළා. උපයන විට ගෙවීමේ බද්ද අහෝසි කිරීමෙන් රජයේ සේවකයන්ගේ ආදායම ඉහළ ගියා. මේ ප්‍රගතිය නොදකින පිරිස් දුර්මත සමාජගත කරමින් රට යළිත් විනාශයට ඇද දැමීමට උත්සාහ කරමින් සිටිනවා” ජනාධිපතිතුමා සඳහන් කළේය.

ජනතාවගේ ප්‍රශ්න හඳුනා ගත්විට රජයට නිහඬව සිටීමට නොහැකිය. දේශීය කිරි කර්මාන්තය දියුණු කිරීම සඳහා ගවයනට ආහාර පිණිස තෘණ බිම් ඇතිකළ යුතුය. පාරම්පරික ඉඩම් ගොවීනට අහිමි වී ඇත්නම් ඊට විසඳුමක් දීම පරිසර විනාශයක් නොවේ. රජය කිසිවිටෙකත් වනාන්තර කපා දමන්නට අනුබල දී නැත. 2030 වන විට බලශක්ති අවශ්‍යතාවෙන් 70%ක් පුනර්ජනනීය මූලාශ්‍ර මගින් සපුරා ගැනීමට සැලසුම් කර තිබේ. පරිසර සංරක්ෂණයට එය විශාල පිටිවහලක් වනු නිසැකය. කටු පොල් වගාව නතර කිරීමෙන් දිස්ත්‍රික්ක ගණනාවක සිදු වෙමින් තිබූ පරිසර හානියට තිත තැබිණි. පරිසරය නියාමනය කරනවා සේම සංවර්ධනය කිරීම ද අවශ්‍ය බව රාජපක්ෂ මැතිතුමා අවධාරණය කළේය.

රජය බලයට පැමිණීමෙන් පසු ජනතාවගේ යහපත පිණිස විශාල කාර්යභාරයක් ඉටුකර ඇති බව පෙන්වා දුන් එතුමා රටට සතුරු බලවේග මේ සත්‍යය යටපත් කිරීමට බොරු ගොතා ප්‍රචාරය කරන බව කීය. මහින්ද රාජපක්ෂ ජනාධිපතිතුමා තිස් අවුරුදු යුද්ධය අවසන් කොට පෙර නොවූ විරු ආර්ථික සංවර්ධනයක් ඇති කළේය. එහෙත් විරුද්ධවාදීන් ගෙන ගිය අසත්‍ය ප්‍රචාරයෙන් මුලා වූ ජනයා 2015 දී එතුමා පරාජය කළහ. ඉන්පසු සිදුවූයේ දැවැන්ත විනාශයකි. ජාතික ආරක්ෂාව බිඳ වැටිණ. ආර්ථිකය ද කඩා වැටිණ. රටේ ස්වාධීනත්වය පාවා දෙනු ලැබීය. දැන් නැවත වරක් අපි රට එදා තිබුණු තත්ත්වයට පත් කිරීමට වැඩකරමින් සිටින්නෙමු යයි ජනාධිපතිතුමා සඳහන් කළේය.

තමාගේ අවංක උත්සාහය රට ගොඩනැගීමෙන් ජනතාවට සමෘද්ධිය අත්කරදීම බව කී ජනාධිපති රාජපක්ෂ මැතිතුමා ඒ අරමුණ දිනාගැනීම සඳහා එක්ව වැඩකරමුයයි පොදුජන පෙරමුණු කාන්තා නියෝජිතවරියනට පැවසීය.

හමුවට සහභාගී වූ කාන්තා නියෝජිතවරියෝ පොදුවේ සමාජයටත්, තමන් අයත් දිස්ත්‍රික්කවලටත් අදාළ ප්‍රශ්න ගණනාවක් ජනාධිපතිතුමා හමුවේ විස්තර කළහ. ස්වයං රැකියා මාර්ග උදා කිරීම, බැංකු ණය ලබා ගැනීමේ අපහසුව, ක්ෂුද්‍ර ණය ගැටළුව, ගම්බද නිවාස ප්‍රශ්නය, ජීවන වියදම, මත්ද්‍රව්‍ය උවදුර, දරුවන්ගේ අධ්‍යාපන ප්‍රශ්න ඒ අතර විය. මත්ද්‍රව්‍ය පාලනය සඳහා දැන් විධිමත් වැඩපිළිවෙළක් ක්‍රියාත්මක කර ඇති බවත් උවදුර මුලිමනින් තුරන් කිරීමට යම් කලක් ගතවනු ඇති බවත් ජනාධිපතිතුමා කීය.

මේ වසර තුළ ස්ත්‍රීන් උදෙසා ස්වයං රැකියා දෙලක්ෂයක් උත්පාදනය කිරීමට නිශ්චිත පියවර ගෙන ඇතැයි ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ මහතා පැවසීය. “රජය කරවල සහ උම්බලකඩ ආනයනය සීමා කළා. කාන්තාවනට රැකියාවක් ලෙස දැන් මේ ද්‍රව්‍ය සැකසීමේ නිරතවන්න පිළිවන්. කෘෂිකාර්මික ක්ෂේත්‍රය තුළ ස්වයං රැකියා උත්පාදනයට පුළුල් ඉඩකඩක් තිබෙනවා” බැසිල් රාජපක්ෂ මහතා පැවසීය.

ශ්‍රී ලංකා පොදුජන කාන්තා පෙරමුණේ නායිකා අමාත්‍ය පවිත්‍රා වන්නිආරච්චි, රාජ්‍ය ඇමතිනි සීතා අරඹේපොළ, පාර්ලිමේන්තු මන්ත්‍රීවරියන් වන ගීතා කුමාරසිංහ, කෝකිලා ගුණවර්ධන, මංජුලා දිසානායක, රාජිකා වික්‍රමසිංහ, මුදිතා ප්‍රශාන්ති, ඩයනා ගමගේ යන මහත්මීහූ මේ අවස්ථාවට එක්ව සිටියහ.

– ජනාධිපති මාධ්ය අංශය

18,160 views

10 Comments to “පාරම්පරික ඉඩම් අහිමි වූ ගොවීනට විසඳුමක් දීම පරිසර විනාශයක් නොවේ..- ජනපති”

  1. SWRD says:

    🤣🤣🤣🤣🤣 seeni hora.

  2. Rajinda says:

    අයියෝ සල්ලි කිව්වලු, වියත් මග හරහා පරිසරය ගැන කතිකාවක් ඇති නොවූ නිසා වන සම්පතෙහි අගය ගැන ඔබට කිසිදු හැගීමක් නැති නොවීම මේ රට පාරිසරික ව්‍යසනයකට පාර කැපීමකි. අපි ජන්දය වැරදියට භාවිතා කලාදෝ කියලත් හිතෙනවා දැන්නම්.

    • Upali says:

      ඔහෙලා ඉන්න රටක් ඕන කිව්වට ඒකෙ ගස් තියෙන්න ඕන කියල කිව්වෙ නෑනෙ.

  3. Chamil Ananda says:

    ehema kiyla thiyana kala tika kapanna deela hariyanne nahane mahaththayoooo mokada me rate kala nathi than nadda wena…

  4. choon pan says:

    Meyawa porak kiyala genaapu ewunta deke deke polu walin gahanna ona.

  5. Theeraka says:

    This man doesn’t know What he is talking about. The point in question at the moment is deforestation but he he is talking about agricultural land. Know facts, study facts and see them wisely and the talk! Don’t act hit an hutan

  6. Kalana says:

    බයිලා කියවන්නේ නැතිව ඉන්න ලොක්ක, හැම දේටම ක්‍රමයක් තියෙනවා. කිසිම දෙයක් කරගන්න බැහැ, 2/3 තියාගෙන පොල් ගානවද? සින්හරාජයේත් ඉඩම් අහිමි වෙලා, විල්පත්තුව විනාශ කළා. තොපි ඔක්කොම එකයි.

  7. Darshana abayakoon says:

    පිස්සෙක්

  8. Upul Attanayake says:

    Madness or carelessness, or any other. please learn from Australia how to Build the nation. Australia population as same as in sri lanka. How Australia land management plan and Sri Lanka?
    What a Valuable Forrest In Sri Lanka Than Australia.
    But who is mostly Care About Planing .
    Stupidity is Over going

    ………….

  9. සමන්ත says:

    ඔබතුමා හැම ගහක්ම හැම වනාන්තරයක්ම කපන්න. ඒත් ලොව මිනිසුන් විසින් රෝපනය කරන ලද ලිඛිත සාක්ෂි ඇති ලොව පැරණි වෘක්ෂය වන ජය ශ්‍රී මහ බෝධිය ඉතුරු කරන්න. හිටන් හොදයි කියලා දැන් තේරෙනවා. ඒ වගේම අපේ පෙර පිනකට සජියා පරාජය වුනේ නැත්නම් ඔබ වැඩ්ඩෙක් කියා අපි හිතාගෙන ඉන්නවා තව දුරටත්. ඇත්තටම යුද්ධය මෙහෙය වුයේ සරත් ෆොන්සේකා කිය ලා දැන් හොදටම තේරෙනවා.

Main News