පුරන් කුඹුරු අස්වැද්දීමේ ජාතික ක්‍රියාන්විතය ඇරඹෙයි…..

March 26, 2021 at 2:09 am | lanka C news

පුරන් කුඹුරු අක්කර ලක්ෂයක් මෙරට තුළ පවතිනවා. ඉන් කුඹුරු අක්කර 28,000 ක් දිවයිනේ ගොවිජන සේවා බල ප්‍රදේශ 320 කදී, අස්වැද්දීම අද ආරම්භ වුණා. දිවයින පුරා ක්‍රියාත්මක පුරන් කුඹුරු අස්වැද්දීමේ වැඩසටහනේ ජාතික උත්සවය ගම්පහ දොම්පේ පහුරුඇළ ගල්වලගොඩ වෙල්යායේදී පැවැත්වුණා. ඒ කෘෂිකර්ම අමාත්‍ය මහින්දානන්ද අලුත්ගමගේ මහතාගේ ප්‍රධානත්වයෙන්. රාජ්‍ය අමාත්‍ය ශෂීන්ද්‍ර රාජපක්ෂ , පාර්ලිමේන්තු මන්ත්‍රී මිලාන් ජයතිලක මහතා ඇතුළු රාජ්‍ය නිලධාරීන් රැසක් ද ඊට එක්ව සිටියා. ආහාර සුරක්ෂිතතාවයෙන් පිරි ස්වයංපෝෂිත රටක්, නිෂ්පාදන ආර්ථිකයක් ගොඩනැගීමේ තවත් එක් පියවරක් ලෙසයි, පුරන් කුඹුරු අස්වැද්දීමේ ජාතික ක්‍රියාන්විතය, ප්‍රායෝගිකව පූර්ණ රාජ්‍ය අනුග්‍රහය යටතේ සිදු කෙරෙන්නේ.

පුරන් කුඹුරු අක්කරයක් අස්වැද්දීම වෙනුවෙන් රු.25000ක පොළී රහිත ණයක් සහ නව තාක්ෂණය, වල් වැදුණු ඉඩම හෙළිපෙහෙළි කරගෙන සකස් කිරීමට අවශ්‍ය යන්ත්‍ර සූත්‍ර සියල්ල ගොවිජන සේවා දෙපාර්තමේන්තුව හා කෘෂිකර්ම දෙපාර්තමේන්තුව හරහා ලබා දෙනවා. පොහොර නොමිලේ ලබා දෙන අතර, ඇළ වේළි, අමුණු හා ජල මාර්ග සකස් කරදීම ද මේ යටතේ ක්‍රියාත්මකයි. මෙරට පවතින පුරන් කුඹුරු ලක්ෂයක ප්‍රමාණය අදියර කිහිපයක් යටතේ සම්පූර්ණයෙන් අස්වැද්දීමට පියවර ගෙන තිබෙනවා. අක්කර 28000ක් වගා කිරීමෙන් අලුතින් මෙරට වී අස්වැන්නට මෙට්‍රික් ටොන් 35000ක වී එකතු කිරීමට අපෙක්ෂා කරනවා.

පුරන් කුඹුරු අස්වැද්දීමේ ජාතික උත්සවයේ අදහස් පළ කළ කෘෂිකර්ම අමාත්‍ය මහින්දානන්ද අලුත්ගමගේ මහතා

“ දිවයින පුරා පුරන් කුඹුරු අක්කර 28000ක් , අද අස්වද්දනවා. අපේ ඉලක්කය පුරන් කුඹුරු කියන වචනය කෘෂිකර්ම ශබ්දකෝෂයෙන් ඉවත් කිරීම. වසර 40 ක් වගා නොකළ පුරන් කුඹුරු අක්කර 140 ක්, අද ජාතික උත්සවයේදී අස්වද්දන්නේ. කෘෂිකර්ම අමාත්‍යාංශයේ ඉලක්කය, සියලු වගා කළ හැකි බිම් වගා කරන්න. නිෂ්පාදන ආර්ථිකයක් මේ රටේ හදන්න. සියලු ගොවිජන සේවා බල ප්‍රදේශ ආවරණය කරමින් අපි ප්‍රායෝගිකව මේ වැඩපිළිවෙල කරනවා. කථාවට නෙවෙයි මහ පොළොවේ යථාර්ථයක් කරනවා. අද පුරන් කුඹුරු අස්වැද්දීමේ ඡායාරූපයක් පෙන්නලා කැළෑ කපනවා කියලා පෙන්වයි ද දන්නේ නෑ. ඒ ඡායාරූප පෙන්වලා විහාරමහාදේවි උද්‍යානයේදී උද්ඝෝෂණය කරයිද දන්නෙත් නෑ. එවැනි බොරු මඩ යද්දී අපි මේ රටේ කෘෂිකර්මය නඟා සිටුවීමට වැඩ කරන්නේ. මම දැක්කා ගොවි, සංගම් කොළඹට ඇවිල්ලා , අභියෝග කරනවා කැළෑ කපන තැන් පෙන්වන්න කියලා.

ගමේ ඉන්න ඔවුන් නොදැන කැළෑ කපන්න බෑ. ඔවුන් කියනවා, මේ කරන්නේ බොරු ප්‍රචාර කියලා. මේ රට ආනයනය මත යැපෙන්නේ. කෑම ටික ගේනවා, බීජ ටික ගේනවා, පොහොර ටික ගේනවා. සියලු දේ ගේනවා. අපි තව වසර 3ක් තුළ මේ රටින් ගෙන්වලා යැපෙන ආර්ථිකය නිෂ්පාදන ආර්ථිකයක් දක්වා පරිවර්තනය කරනවා. මේ රටින් පිටරටට යන මහා ධනස් කන්දය අපි අපේ රටේ ගොවියාට ඉතුරු කරලා දෙනවා. 1970 වේ 34%ක් ජාතික ආර්ථිකයට කෘෂිකර්මය දායකත්වය දුන්නා. අද එය 7% අඩුවෙලා තියෙනවා. එදා කෘෂිකර්මයෙන් ජාතික ආර්ථිකයට දීපු හයිය නැවත අපි දෙනවා. ඉස්සර ගොවිජන සේවා දෙපාර්තමේන්තුව කළේ කුඹුරු ගොඩ කරන්න ලියුම් අත්සන් කරපු එක . අපි පොරොන්දු වෙනවා අපේ රජය යටතේ කුඹුරු ඉඩම් බිම් අඟලක් ගොඩ කරන්න ඉඩ නොදෙන බව.”

පුරන් කුඹුරු අස්වැද්දීමේ ජාතික උත්සවය ඇමතූ රාජ්‍ය අමාත්‍ය ශෂීන්ද්‍ර රාජපක්ෂ මහතා.

“රටින් ගෙනත් කන සම්ප්‍රදාය, වත්මන් ජනාධිපති හා අගමැති ප්‍රමුඛ රජයේ ප්‍රතිපත්තිය නෙවෙයි. මේ රටේ ගොවියන් නඟා සිටුවීමයි අපේ ප්‍රතිපත්තිය. ඉතිහාසයේ වැඩිම මුදල කෘෂිකර්මයට වෙන් කළේ ඒ නිසයි. එහි වගකීම මහින්දානන්ද අලුත්ගමගේ ඇමතිතුමත්, මමත්, නිලධාරීන් පිරිසත් රට පුරා සංචාරය කරලා නිරීක්ෂණය කරල, කෘෂිකර්මය නඟා සිටුවීමට අවශ්‍ය තින්දු තීරණ 90% ක් අරගෙන අවසන්. අද නිෂ්පාදනය ආරම්භ කරලා අවසන්. අද රටට අවශ්‍ය වී රටේ නිෂ්පාදනයට අපි සමත් වෙලා ඉවරයි. ඒ නිසා රටින් ගෙනත් කන, පිටරට මත යැපෙන, වහල් සම්ප්‍රදායෙන් අපි මිදෙන්න මේ රටේ ජනතාව මනස හදා ගන්න ඕන. ගොවියෝ වෙනුවෙන් කළ යුතු සියල්ල අපි රජයක් ලෙස ලබා දෙනවා. වවන්න, උනන්දු වෙන්න. ගැටළු අපිට කියන්න. නව තාක්ෂණය භාවිත කරන්න කියන එක ගොවීන්ගෙන් අද මම මේ ජාතික උත්සවයේදී ඉල්ලනවා. ”

පාර්ලිමේන්තු මන්ත්‍රී මිලාන් ජයතිලක මහතා ද මෙහිදී අදහස් පළ කළා.

“ කෘෂිකර්මය අද අලුත් ගමනක නව පිම්මක් ඉදිරියට තබමින් ඉන්නවා. තරුණ නායකයෝ දෙන්නෙකුට ජනාධිපතිතුමා කෘෂිකර්මය භාර දුන්නා. ඒකයි කෘෂිකර්මය අලුත්වෙලා තියෙන්නේ. ගොවි මැසිවිලි අඩු කරලා, රට පුරා කෘෂිකර්මාන්තය පිළිබඳ ප්‍රගතියක් ඇති වෙලා. අද වී සහ සහල් මාෆියාව එක්ක කෘෂිකර්ම ඇමති හැප්පෙනවා. ඊට අවශ්‍ය හයිය අපි එතුමාට දෙනවා. පුරන් කුඹුරු අස්වැද්දීමත් හාල් සහ වී මාෆියාවට හොඳ පිළිතුරක් ”

සුජිත් විතානපතිරණ
මාධ්‍ය ලේකම්

7,755 views

4 Comments to “පුරන් කුඹුරු අස්වැද්දීමේ ජාතික ක්‍රියාන්විතය ඇරඹෙයි…..”

  1. දිනේෂ් ගයාන් ඩුබායි says:

    තාප්ප පාට කෙරෙව්ව කාලයක් දැන් පාටත් නෑ තාප්පත් නෑ පුරන් කුඹුරු අස්වැද්දුව ආයි තව කාලයක් අන්තිමේ රටින් හාල් ගෙනල්ල අහවර උනේ දැන් චන්දයක් කට මුල තියන් ආයි ඇන්දිල්ලක් චතුරය හාන කුඹුරක් මැද්දෙ තියන් උදේ පත්තර කියවයි.ඇන්දිලි නාඩගම්වල කෙලවරක් නෑ

  2. ගන්ජ බන්ඩා says:

    පුරන් කුඹුරු අස්වැද්දීම පරිසරයට හානි දායකය්. – සජිත්

  3. Upali says:

    මාත් ගියා පුරන් කුඹුරක් අස්වද්දන්ට. අන්තිමේදි සින්නක්කරවම ලියා ගන්ට උනා කියමුකො.

  4. Piyadasa Yalagala says:

    New form and shape of Agriculture Revolution is gater role of Democratic revolution led by GR leadership of SLPP by majority of Lankan citizens mandate been given in 2019 November 16th election. An Agriculture is lifeline of our People’s economy since last 4000 to 5000 years in Island People. We have rely of that because 60% to 70% of our People are roots has to gone to that. Regain and reawakening rural poor are essential task by of that SLPP.

Main News