බලෙන් අපේක්‍ෂකත්වය ගන්න එන්න එපා.. මේක ගම්සභාවක් පාලනය කරන්න නොවෙයි.. සජිත් පිල පට්ටා ගසමින් රාජිත අරලිය මැදුරේ…

August 30, 2019 at 10:40 am | lanka C news
බලෙන් අපේක්‍ෂකත්වය ගන්න එන්න එපා.. මේක ගම්සභාවක් පාලනය කරන්න නොවෙයි.. සජිත් පිල පට්ටා ගසමින් රාජිත අරලිය මැදුරේ…

එක්සත් ජාතික පක්ෂයේ ප්‍රධානත්වයෙන් ගොඩනැගෙන ප්‍රජාතන්ත්‍රවාදී ජාතික සන්ධානය එළඹෙන සැප්තැම්බර් මාසයේදී ගොඩනගන බව ඇමැති රාජිත සේනාරත්න මහතා පවසයි.

එම සන්ධානය ගොඩනැඟීමෙන් පසු එහි ප්‍රතිපත්ති අනුව ජනාධිපති අපේක්ෂකයා නම් කරන බව ද ඔහු සඳහන් කළේ ය.

කොළඹ අරලියගහ මන්දිරයේදී පැවැති මාධ්‍ය හමුවකදී ඇමැතිවරයා මේ බව පැවසීය.

සජිත් ප්‍රේමදාස මහතාට ජනාධිපති අපේක්ෂකත්වය ඉල්ලමින් රට පුරා සිදුකරන විරෝධතා සම්බන්ධයෙන් දැඩි විවේචනාත්මක රාජිත සේනාරත්න මහතා එහිදී අදහස් පළ කළේය.

සජිත් ප්‍රේමදාස මහතාට ගම් මට්ටමේ බිම් මට්ටමේ බහුතරයක් කැමති වුවද එය රටේ බහුතරය නොවන බවද කී ඔහු නාගරික මට්ටම, මධ්‍යම පාන්තිකයන්, බුද්ධිමතුන්, උතුරු නැගෙනහිර පළාත්, සුළුජාතීන් යන සියළු සාධක සලකා බලා තීන්දුවක් ගත යුතු බවද පැවසීය.

සජිත් ප්‍රේමදාස මහතාට මන්ත‍්‍රී කණ්ඩායමෙන් තුනෙන් දෙකක් කැමති බවට මංගල සමරවීර මහතා කරන ලද ප්‍රකාශය ප්‍රතික්ෂේප කරමින් ඔහු කියා සිටියේ තමන්ද එම පාර්ලිමේන්තු කණ්ඩායමේ සිටින බවත් තමන් එවන් තත්ත්වයක් නොදන්නා බවත්ය.

පක්ෂ නායකත්වය හෝ ජනාධිපති අපේක්ෂකත්වය ලබා ගත යුත්තේ පක්ෂය තුළ සාකච්ඡා කරමින් මිස හන්දි ගානේ කෑකෝ ගසමින් නොවන බවද කී ඔහු පක්ෂ ඉතිහාසයේ කිසිදිනක පක්ෂ නායකත්වය බිත්තියට හේත්තු කර නායකත්වය ගැනීමේ ක්‍රමයක් නොතිබූ බවද සඳහන් කළේය.

මෙවර අපේක්ෂකයා ඉල්ලන්නේ ගම්සභාවක් පාලනය කිරීමට නොව වට ජනාධිපතිවරයා වීමට බවද ජනාධිපති අපේක්ෂකයන් හන්දි ගානේ හැඳීමට නොහැකි බවද සඳහන් කළේය.

48 views
Main News