බොරු ස්වාධීන කතා නිමයි.. සමන් රත්නප‍්‍රිය, ධර්මසිරි බණ්ඩාරනායක, ගාමිණී වියන්ගොඩ ජාතික ලයිස්තුවෙන් පාර්ලිමේන්තුවට..

December 18, 2016 at 1:05 am | lanka C news
බොරු ස්වාධීන කතා නිමයි.. සමන් රත්නප‍්‍රිය, ධර්මසිරි බණ්ඩාරනායක, ගාමිණී වියන්ගොඩ ජාතික ලයිස්තුවෙන් පාර්ලිමේන්තුවට..

ලබන වසරේ දී පාර්ලිමේන්තුවට අලුත් මුහුණු පහක් හඳුන්වා දීමට ජනාධිපතිවරයාගේ සහ අගමැතිවරයාගේ අවධානය යොමු වී ඇතැයි සිවිල් සංවිධාන නියෝජිතයෝ පෙන්වා දෙති.

දැනට පාර්ලිමේන්තුව නියෝජනය කරන ජාතික ලැයිස්තු මන්ත්‍රීවරුන් අතරින් ශ්‍රී ලංකා නිදහස් පක්ෂයේ මන්ත්‍රීවරුන් තිදෙනෙක් සහ එජාපයේ මන්ත්‍රීවරු දෙදෙනෙක් ඉවත් කර ඒ සඳහා සිවිල් සංවිධාන නියෝජිතයන් අතරින් විෂය දැනුමක් සහිත ප්‍රබල ක්‍රියාකාරිකයන් පස්දෙනකු ජාතික ලැයිස්තුවෙන් පාර්ලිමේන්තුවට පත් කිරීමට නියමිතය.

නව නියෝජිතයන් පත් කිරීමත් සමඟ ඉවත් කරන ජාතික ලැයිස්තු මන්ත්‍රීවරුන් සඳහා තානාපති ධුර හෝ රාජ්‍යතාන්ත්‍රික නියෝජිත තනතුරු ලබා දීමට ද සැලසුම් කර ඇතැයි දැනගන්නට ඇත.

ශ්‍රී ලංකා නිදහස් පක්ෂයෙන් පාර්ලිමේන්තුවට පත් කරන ජාතික ලැයිස්තු මන්ත්‍රී ධුරයක් සඳහා ධර්මසිරි බණ්ඩාරනායක මහතාගේ නම ද යෝජනා කෙරී ඇති අතර මන්ත්‍රී ධුරයේ දිවුරුම් දීමෙන් අනතුරුව ඔහුට සංස්කෘතික හා කලා කටයුතු පිළිබඳ අමාත්‍ය ධුරය පිරිනැමෙනු ඇතැයි ශ්‍රී ලංකා නිදහස් පක්ෂ නියෝජිතයකු පැවසීය. ජනාධිපතිවරයා යෝජනා කර ඇති සෙසු පුද්ගලයන් දෙදෙනා කවුරුන්ද යන්න පිළිබඳව මෙතෙක් හෙළිදරව් වී නැත.

එක්සත් ජාතික පක්ෂයෙන් පත් කරන ජාතික ලැයිස්තු මන්ත්‍රී ධුර සඳහා ප්‍රකට ලේඛකයකු වන ගාමිණී වියන්ගොඩ මහතාගේත් වෘත්තීය සමිති නියෝජිතයකු හා සිවිල් සමාජ ක්‍රියාකාරිකයකු වන සමන් රත්නප්‍රිය මහතාගේත් නම් යෝජනා කෙරී ඇත. ජාතික ලැයිස්තු නව නියෝජිතයන් පත් කිරීමත් සමඟ අමාත්‍ය ධුර කිහිපයක් ද සංශෝධනය කෙරෙනු ඇත.

ජාතික ලැයිස්තු නියෝජිතයකු ලෙස තමාට අමාත්‍ය ධුරයක් භාරගන්නැයි ජනාධිපතිවරයා යෝජනා කළේදැයි ධර්මසිරි බණ්ඩාරනායක මහතාගෙන් සත්හඬ කළ විමසීමක දී හෙතෙම කියා සිටියේ “අමාත්‍ය ධුරයක් පිරිනමන බවක් එතුමා කිව්වේ නැහැ. හැබැයි සංස්කෘතික හා කලා ක්ෂේත්‍රයේ දැනට පවතින අඩුපාඩු පිළිබඳ එතුමා එක්ක මම සාකච්ඡා කළා. ඒ වෙලාවේ කිව්වා ධර්මේ ප්‍රශ්න තියෙනවනම් කලාකරුවන් එක්ක සාකච්ඡා කරලා තියෙන ප්‍රශ්න නිරාකරණය කරගන්න මැදිහත් වෙන්න කියලා.

දැනට නාට්‍ය හා සිනමා ක්ෂේත්‍රයේ පවතින ගැටලුත් සංස්කෘතික ක්ෂේත්‍රයේ පවතින ගැටලුත් මම එතුමා එක්ක දීර්ඝ වශයෙන් සාකච්ඡා කළා. මේක මගේ විෂයනේ. ඉතින් එතුමා කිව්වේ මේ වැඩේට මැදිහත් වෙන්න කියලා. කොහොම වුණත් මගේ ක්ෂේත්‍රයේ වැඩක් කරන්න අවස්ථාව ලැබෙනව නම් මම ඒක භාරගන්නවා. ජනාධිපතිතුමා මා එක්ක මේ ගැන සාකච්ඡා කළේ එක්සත් ජාතීන්ගේ සමුළුවට යන වෙලාවේ. මමත් ඒ ගමනට නියෝජිතයෙක් විදිහට සහභාගි වුණා. කොහොම වුණත් එවැනි තනතුරක් ලැබුණොත් භාරගන්නවා. වැඩෙත් කරනවා” කියාය.

දයා නෙත්තසිංහ
– sathhanda.lk

327 views
Main News