මං කල වැඩ ඉදිරියත් චතුර පුතා කරාවි.. දිස්ත‍්‍රික්ක දෙකකින් ඉල්ලුවාම පවුල්වාදයක් නෑ.. මං කළුතරින් චතුර ගම්පහින් ඉල්ලුවේ ඒකයි..

April 3, 2019 at 3:50 pm | lanka C news
මං කල වැඩ ඉදිරියත් චතුර පුතා කරාවි.. දිස්ත‍්‍රික්ක දෙකකින් ඉල්ලුවාම පවුල්වාදයක් නෑ.. මං කළුතරින් චතුර ගම්පහින් ඉල්ලුවේ ඒකයි..

එක්සත් ජාතික පෙරමුණේ ජනාධිපතිධූර අපේක්ෂකයා ඉදිරියේ ප්‍රකාශයට පත් කරන බවත්, එම අපේක්ෂකයා ජනාධිපතිවරණය ජයගන්නා බවත් සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා පවසයි.

මිල්ලනිය, ගල්පාත මංසන්ධියේ පැවැති ජනහමුවකට එක්වෙමින් සෞඛ්‍ය අමාත්‍යවරයා මේ බව ප්‍රකාශ කළේය.

මෙහිදී වැඩිදුරටත් අදහස් දැක් වූ සෞඛ්‍ය අමාත්‍යවරයා –

මම 1994 සිට පාර්ලිමේන්තුව නියෝජනය කරනවා. මෙම වසරේ අගෝස්තු මාසයට වසර 25 ක් සපිරෙනවා. වසර 15 කට වැඩි කාලයක් අමාත්‍යවරයෙක් ලෙස සේවය කරමින් කළුතර දිස්ත්‍රික්කයට විශාල සේවාවක් ඉටු කර තිබෙනවා. තරුණ තරුණියන් 15,000 කට පමණ රැකියා ලබාදී තිබෙනවා. සෞඛ්‍ය අමාත්‍යාංශය තුලින් තවත් තරුණ තරුණියන් 4000 කට පමණ ඉදිරියේ දී රැකියා ලබාදීමට නියමිතයි. ජනතාව මට මන්ත්‍රීධූරයක් ලබාදුන්නේ ඉතා විශ්වාසයෙන්. මට ලබාදුන් අමාත්‍යධූරයෙන් ජනතාවට සේවය කළ යුතුයි. 2015 මහ මැතිවරණයේ දී රාජිතට ඡන්ද දෙන්න එපා කියලා කළුතර දිස්ත්‍රික්කය තුල මතයක් ගොඩනැගුවා. නමුත් මම ප්‍රථම ස්ථානය ලබාගත්තේ විශාල ඡන්ද සංඛ්‍යාවකින්. පසුගිය අර්බුද පැවැති සමයේ මම දැඩි සටනක නිරත වුනා. ජනාධිපතිවරයා මගේ මිතුරා වුනත් වැරදි කරන කොට මිතුරුකම පසෙක ලා මම සටන් කරනවා. මට අග්‍රාමාත්‍යධූරය බාරගන්න කියා ජනාධිපතිවරයා අවස්ථා දෙකක දී ආරාධනා කළා. මම කිවුවා පස්ස දොරෙන් කුමන්ත්‍රණය කරලා අග්‍රාමාත්‍යධූරය අරගන්නේ නැහැ කියලා. අර්බුද පරාජය කළ යුතුයි. එක්සත් ජාතික පෙරමුණ ජනාධිපතිවරණයත් ජය ගන්නවා. අපේක්ෂකයා ඉදිරියේ දී ප්‍රකාශයට පත් කිරීමට සුදානම්. එක්සත් ජාතික පෙරමුණ නිර්මාණය කර මැයි මස 01 දා දැවැන්ත ජන රැළියක් කොළඹ දී පවත්වනවා. මෙම පෙරමුණට ශ්‍රී ලංකා නිදහස් පක්ෂ මන්ත්‍රීවරුත් එකතු වෙනවා. රාජපක්ෂලාට විරුද්ධව කදවුරු බැදීමට සියලු දේශපාලන පක්ෂ එකතු කරනවා.

වත්මන් රජය ආරක්ෂා කළ යුතුයි. අඩුපාඩු තිබෙනවා. අඩුපාඩු නොමැති රජයක් ලොව කොතනකවත් නැහැ. අපි අඩුපාඩු මගහරවා ගනිමින් ඉදිරියට ගමන් කරනවා. ඒ ජනතා සේවාවන් වෙනුවෙන්. ජනතාවට අලාභයක් සිදු වෙනවා නම් මම ඒ වෙනුවෙන් පෙනී සිටිනවා. යුද්ධය අවසන් කිරීමටත් අපි දායක වුනා. නමුත් යුද්ධය අවසන් කිරීමෙන් පසු හිටපු ජනාධිපති මහින්ද රාජපක්ෂ මහතාගේ ක්‍රියාකාරකම් හේතුවෙන් කළ කිරීමෙන් රජයෙන් ඉවත් වුනා.

මම ආරම්භ කළ වැඩපිළිවෙල මට අවසන් කරන්න බැරි වුනත් මගේ පුතා චතුර සේනාරත්න මන්ත්‍රීවරයා එය ඉටු කරනවා. ඔහු කළුතරින් ඡන්දය ඉල්ලන්නේ නැතිව ගම්පහෙන් ස්වාධීනව ඡන්දය ඉල්ලුවේ පවුල්වාදයට තිත තැබිය යුතු නිසයි.

– ප්‍රසන්න අධිකාරී

64 views