මන්ත‍්‍රී ධුරය රැක දෙන්නැයි රතන හිමි අගමැතිට වැද වැටේ.. ජනපති පසු පස දුවයි..

February 22, 2017 at 12:25 am | lanka C news
මන්ත‍්‍රී ධුරය රැක දෙන්නැයි රතන හිමි අගමැතිට වැද වැටේ.. ජනපති පසු පස දුවයි..

සයිටම් පුද්ගලික විශ්ව විද්‍යාලය සම්බන්ධයෙන් අධිකරණය විසින් ලබාදුන් තීන්දුව සහ අතුරලියේ රතන හිමියන්ගේ මන්ත්‍රීධූරය සම්බන්ධයෙන් ජාතික හෙළ උරුමය අනුගමනය කරන ක්‍රියාමාර්ග පිළිබඳව කරුණු පැහැදිලි කිරීමේ මාධ්‍ය හමුවක් ජාතික හෙළ උරුමයේ ප්‍රධාන කාර්යාලයේදී පැවැත්විනි.

ජාතික හෙළ උරුමයේ නව මාධ්‍ය ප්‍රකාශක කථිකාචාර්ය අනුරුද්ධ ප්‍රදීප් මහතාගේ ප්‍රධානත්වයෙන් පැවති පළමු මාධ්‍ය හමුව වන මෙම අවස්ථාවට ජාතික හෙළ උරුමයේ සමසභාපති පූජ්‍ය හැඩිගල්ලේ විමලසාර හිමි, මධ්‍යම කාරක සභික පස්සරමුල්ලේ දයාවංස හිමි, පළාත් සභා මන්ත්‍රිනී නිරෝෂා අතුකෝරාළ යන අය සහභාගීවූහ.

නියෝජ්‍ය මහලේකම් අනුරුද්ධ ප්‍රදීප් මහතා –

සයිටම් ආයතනය සම්බන්ධයෙන් අධිකරණය විසින් මෑතකදි ලබාදුන් නඩු තීන්දුවෙන් පසුව ඒ සම්බන්ධයෙන් උනන්දුවක් දැක්වූ කණ්ඩායම් විසින් උද්ඝෝෂණ, වැඩවර්ජන ආදිය පැවත්වුවත් අපගේ අදහස මුලසිටම පැහැදිලිව ප්‍රකාශ කර තිබූ නිසා විශේෂ කරුණු දැක්වීමක් කරන්නට අප පසුබට වුවත් නව තත්වය පිළිබඳව අපේ අදහස අද දිනයේදී ඉදිරිපත් කරන්නට අප තීරණය කළා.

බොහෝ කාලයක සිට අප විසින් දැඩිව ප්‍රකාශ කළ පරිදී සයිටම් ආයතනය වහා අහෝසි කළ යුතුයි යන්න ජාතික හෙළ උරුමයේ ස්ථාවරයයි. අද වනවිට ලෝකය පුරාම ආරම්භ කර ඇති බොහෝ පෞද්ගලික විශ්ව විද්‍යාලයට වැසෙමින් පවතිනවා. විශේෂයෙන්ම මේ තත්වය ඉන්දියාව තුළ වැඩිවශයෙන් දැකිය හැකි සිදුවීමක් වෙලා තියෙනවා.

එමෙන්ම එම තීරණය ක්‍රියාත්මක කිරීමේදී ඊට සමගාමීව සයිටම් ආයතනයට දැනට බඳවාගෙන සිටින දරුවන්ගේ මූලික සුදුසුකම් පරීක්ෂා කර බැලීමෙන් පසුව ඔවුන්ගේ අඩුපාඩුකම් නිවැරදි කිරීමත් සුදුසුකම් සහිත අය වෛද්‍යවරු ලෙස බඳවා ගැනීමටත් එසේ බඳවාගත නොහැකි එහෙත් දක්ෂතා ඇති දෙවන කණ්ඩායමකට සුදුසු වෙනත් උපාධියක් හැදෑරීමටත් උක්ත කණ්ඩායම් වලට අයත් නොවන තුන්වන කණ්ඩායමට සයිටම් ආයතනය හරහා යම් වන්දි මුදලක් පිරිනැමීමටත් පියවර ගතයුතුය යන්න අප මෙහිදී වැඩිදුරටත් අවධාරණය කළයුතුයි.

ඒ වගේම සයිටම් අහෝසි කිරීම පිළිබඳව කිසිඳු දෙගිඩියාවක් නොපැවතිය යුතු අතර දැනට අධ්‍යාපනය ලබන දරුවන් පිළිබඳව පෙර සඳහන් කළපරිදී විධිමත් ක්‍රමවේදයක් අනුගමනය කිරීමෙන් පසුව අනිවාර්යෙන්ම සයිටම් ආයතනය වසා දැමීම හෝ එය රජයේ වෛද්‍ය පීඨයක් බවට පත්කිරීම සිදුකළ යුතුය යන්න අපගේ යෝජනාවයි.

එමෙන්ම ශ්‍රී ලංකා වෛද්‍ය සභාව විසින් පසුගිය වසර කිහිපය පුරා 18 වතාවක් පුවත්පත් දැනවීම් ඵලකරමින් සයිටම් ආයතනය පිළිගත නොහැකි බව ප්‍රකාශ කරද්දීත් එම ආයතනයට දරුවන් යොමුකිරීමට ගනු ලබන තීරණය පිළිබඳව නැවත සිතා බලන ලෙස දිගින් දිගටම අවවාද කරද්දීත් සයිටම් වෙත දරුවන් ඇතුලත් කළ නිසා මේ ආයතනයට දරුවන් යොමුකළ දෙමව්පියන් අසාධාරණයකට ලක්වූ අහිංසකයින් පිරිසක් නොවන බවත් මෙහිදී පෙන්වා දිය යුතුයි. පසුගිය කාලයේදී මහබැංකුවේ අදහස් නොවිමසා වැඩි ලාභ ලැබීමේ කපටි සිතුවිල්ලෙන් අයථා මූල්‍ය ආයතන වල මුදල් තැන්පත් කළ පුද්ගලයිනුත් මේ දෙමාපියනුත් අතර වැඩි වෙනසක් නොමැති බවත් අපට පෙනීයනවා.

වෛද්‍ය වෘත්තිය හා සෞඛ්‍ය සේවය සම්බන්ධයෙන් ස්ථාපිතව ඇති උපරිම හා උත්තරීතරම නියාමන අධිකාරිය වන්නේ ශ්‍රී ලංකා වෛද්‍ය සභාවයි. ඒ නිසා වෛද්‍ය වෘත්තියේ, සෞඛ්‍ය සේවයේ හා සෞඛ්‍ය අධ්‍යාපනයේ ඉහළ ගුණාත්මක භාවයක් අපේක්ෂා කරනවා නම් රජය, අධිකරණය, රේඛීය අමාත්‍යාංශ ඇතුළුව අප සියලු දෙනාම අණපනත් මඟින් නෛතික පිහිටුවා ඇති වෛද්‍ය සභාවේ තීරණය පිළිගත යුතුයි. යම් හෙයකින් වෛද්‍ය සභාවේ තීරණ ප්‍රතික්ෂේප කරනවා නම් එවැනි නියාමන ආයතනයක් තවදුරටත් පවත්වාගෙන යාමත් ඵලරහිත දෙයක් බවත් මෙහිදී අවධාරණය කළ යුතුයි.

අධිකරණය විසින් ලබාදුන් තීන්දුව පිළිබඳව අධ්‍යනය කිරීමේදී යම් යම් ඇමතිවරුන්ගේ නොසලකා හැරීම් හා වැඩ පැහැර හැරීම් මේ තීන්දුවට එළඹීමට මුල්වී තිබෙන බව ඉතා හොඳින් පැහැදිලි වෙනවා. එමෙන්ම මෙම තීරණය පිළීබඳව අදහස් ප්‍රකාශ කිරීමෙන් අධීකරණයට අපහාසයක් සිදුවන බවට යම් අදහසක් ඉදිරිපත් වනවා නම් එය ඉතා වැරදි අදහසක් වන බවත් පෙන්වා දිය යුතුයි. සයිටම් සම්බන්ධ අධිකරණ තීන්දුව ප්‍රකාශ වීමෙන් අනතුරුව අතිගරු ජනාධිපතිතුමා ප්‍රකාශ කරලා තියෙනවා මේ ප්‍රශ්නය පිළිබඳව සොයා බලන්න විශේෂ කමිටුවක් පත් කරනවා කියලා. ඒ ප්‍රකාශයෙන් අධිකරණය විසින් ලබාදුන් මේ තීන්දුව සයිටම් සම්බන්ධ අවසාන තීන්දුව නොවන බව විධායකයේ ප්‍රධානියා වන ජනාධිපතිතුමාත් පිළිගෙන තිබෙන බව තහවුරු වෙනවා. ඒ වගේම මේ අධිකරණ තීන්දුව මඟින් සයිටම් ආයතනය නිවැරදි බව කිසිවිටෙකත් කියවෙන්නේ නැති බවත් ප්‍රකාශ කළයුතුයි.

පූජ්‍ය හැඩිගල්ලේ විමලසාර හිමි –

අතුරලියේ රතන හිමියන් ස්වාධීන වීමට තීරණය කිරීම සම්බන්ධයෙන් අවධානය යොමුකළ අප පක්ෂයේ මධ්‍යම කාරක සභාව උන්වහන්සේ ස්වාධීනවීමට ගත් තීරණය වැරදිබව තීරණය කළා. ඉන් අනතුරුව අප විසින් ඒ බව උන්වහන්සේට ලිඛිතව දැනුම්දුන්නා. රතන හිමියන් ඒ සඳහා ප්‍රතිචාර නොදැක්වීම නිසා පසුගිය 17 වනදින රැස්වූ අප පක්ෂයේ මධ්‍යම කාරක සභාව විසින් රතන හිමියන් ස්වාධීන වීමට ගෙන ඇති තීරණය සම්බන්ධයෙන් පරික්ෂණයක් පැවැත්වීම සඳහා ත්‍රිපුද්ගල කමිටුවක් පත් කළා. ඒ අනුව එම කමිටුවේ මමත්, නීතිඥ එම්.සී.ජයරත්න මහතා සහ නීතිඥ ටියුඩර් පෙරේරා මහතාත් සාමාජිකයින් ලෙස කටයුතු කරනවා.

රතන හිමියන් නීත්‍යානුකූලව බැඳීසිටින්නේ අප සමඟයි. අප එ.ජා.ප.යත් සමඟ ගිවිසුම් ගතවූ අවස්ථාවේ ඇතිවූ එකඟතාවය පරිදී අපට ලැබුනු ජාතික ලැයිස්තු මන්ත්‍රීධූරයට පත්වූ රතන හිමියන් මහජන ඡන්දයෙන් තේරී පත්වී නැහැ. එම ගිවිසුමේ 09 වන වගන්තියට අනුව යම් මන්ත්‍රීවරයකු පිළිබඳව තීරණයක් ගැනීමේ බලය ඇත්තේ අදාල පක්ෂයටයි. ඒ අනුව රතන හිමියන් පිළිබඳව අවසන් තීරණය ගනු ලබන්නේ අප මිස එ.ජා.ප.ය නොවේ.

උන්වහන්සේ පසුගිය දිනක රනිල් වික්‍රමසිංහ අගමැතිතුමා හමුවී මන්ත්‍රීධූරය රැකදෙන ලෙස ඉල්ලා තිබෙනවා. මේ අතරතුර ජනාධිපතිතුමා සහභාගී වන උත්සව සඳහා අනාරාධිතව වැඩමකරන උන්වහන්සේ ජනපතිතුමාට පක්ෂපාතී බව පෙන්වන්න උත්සහ කරනවා. ඒ නිසා රතන හිමියන් ස්වාධීනවූබව ප්‍රකාශ කිරීම අද වනවිට ගැටලු සහගත වෙලා තියෙනවා.

ස්වාධීනවීමට ගනුලැබූ තීරණය වෙනස් කිරීමට රතන හිමියන් විශ්වාස කරනවා නම් උන්වහන්සේ ඒ බව ප්‍රකාශ කළ යුත්තේ ජාතික හෙළ උරුමයටයි.එල්ලවී ඇති චෝදනා වලින් නිදහස්වීමට රතන හිමියන්ට හැකිවන්නේ ඉන්පසුවයි. කෙසේවෙතත් තමන් ගනු ලැබු තීරණය වෙනස් කර නැවත වරක් ජාතික හෙළ උරුමය සමඟ දේශපාලනය කරන්නට අතුරලියේ රතන හිමියන්ට අවස්ථාව තිබෙන බවත් අප මෙහිදී වැඩිදුරටත් අවධාරණය කර සිටිනවා.

සටහන – මහේෂ් රංගන ජයරත්න
මාධ්‍ය ඒකකය

135 views
Main News