මාලදිවයිනේ පාර්ලිමේන්තු ප්‍රජාතන්ත්‍රවාදය රැකදෙන්නත් මා දායක වුණා..- කතානායක
February 7, 2019 at 8:02 am | lanka C news
ශ්‍රී ලංකාවට පැමිණි මාලදිවයින් ජනාධිපති රීබ්‍රහිම් මොහොමඩ් සොලිහ් මහතා ඇතුළු දූත පිරිස ශ්‍රී ලංකාවේ කථානායකවරයාට සිය විශේෂ ස්තූතිය පලකලේ සිය රට තුල පසුගිය වසරේ දී පාර්ලිමේන්තු ප්‍රජාතන්ත්‍රවාදය අභියෝගයකට ලක් වූ අවස්ථාවේ දී ඒ සඳහා මැදහත්ව ක්‍රියාකිරීම පිළිබඳවය.
ඔවුහු මෙම විශේෂ ඇගයීම සිදුකලේ දූත පිරිස වෙනුවෙන් ඊයේ ජනාධිපති මෛත්‍රීපාල සිරිසේන මහතා විසින් පවත්වන ලද විශේෂ භෝජන සංග්‍රහයේදීය.
දකුණු ආසියානු කථානායකවරුන්ගේ සම්මේලනයේ සභාපතිවරයා ලෙස සිය වගකීම ඉටු කරමින් මාලදිවයිනේ විපක්ෂ පාර්ලිමේන්තු නියෝජිතයන් බන්ධනාගාරගත කිරීම් වැනි විවිධ පීඩාවන්ට ලක් වූ විට ඔවුන්ගේ අයිතිවාසිකම් රැකදීම සඳහා රාජ්‍ය තාන්ත්‍රිකයෙකු ලෙස ජාත්‍යන්තර ප්‍රජාව තුළ ප්‍රබල මතයක් නිර්මාණය කිරීමට ශ්‍රී ලංකා කථානායකවරයා කටයුතු කළ බවද මාලදිවයින් විදේශ ඇමතිවරයා පැවසිය.
මෙහිදී ශ්‍රී ලංකාවේ කථානායක කරු ජයසුරිය මහතා සඳහන් කලේ “මාලදිවයිනේ ඇති වූ තත්වය පිළිබඳව තමා සාක් කලාපයේ සියළුම කථානායකවරුන් සමඟ සාකච්ඡා කර එම අයගේද අදහස් ලබාගනිමින් කටයුතු කළ බවයි. සාක් කලාපීය කථනායකවරුන්ගේ සම්මේලනය විසින් තමන්ට පැවරූ වගකීම උපරිමයෙන් ඉටු කිරීමට තමා උත්සාහ ගත් අතර මාලදිවයිනේ පාර්ලිමේන්තු ප්‍රජාතන්ත්‍රවාදය රැකදීමට එලෙස දායකවීමට හැකිවීම පිළිබඳව තමාද බෙහෙවින් සතුටු වන බවයි”.
– කථානායක මාධ්‍ය අංශය
