යහපාලනයට දැන් අවුරුදු දෙකයි.. මිනිස්සු හොද කියන්නේ තුන්වෙනි අවුරුද්දේ පටන්..

2017 වසර නීතිපති දෙපාර්තමේන්තුවේ ෆයිල් වල දූවිලි පිසදමා හොරුන්ට, දූෂිකයන්ට නිසැකවම නඩු පැවරිය යුතු යයි පාර්ලිමේන්තු මන්ත්‍රී එස්.එම්. මරික්කාර් මහතා පවසයි.

ඔහු මෙම අදහස් පළ කරන ලද්දේ 2017 නව වසරේදී ගොතටුව පාරමිතා බෞද්ධ විහාරයට රුපියල් ලක්ෂ දෙකක් පමණ වටිනා ශබ්ද විකාශන යන්ත්‍රයක් පරිත්‍යාග කිරීමේ උත්සවයකදීය.

2017 නව වසර මේ රටේ ජනතාවට විශාල බලාපොරොත්තු තියාගන්න පුළුවන් වන වසරක් කියලා විශ්වාස කරන්න පුළුවන්. යහපාලනය ගෙනල්ල අවුරුදු දෙකක් තව සතියකින් සම්පූර්ණ වෙනවා. සාමාන්‍යයෙන් වෙනසක් අපේක්ෂා කරන ආණ්ඩුවකින් බලාපොරොත්තු ඉතා විශාලයි.වෙනසක් ඔවුන් බලාපොරොත්තු වෙන්නේ විශාල පීඩනයකින් ලක්වෙලා හිටපු නිසයි. ජනතාව අපේක්ෂා කරන දේ ඉටු නොවුනාම ඔවුන් දැඩිලෙස රජයට චෝදනා කරන්න පටන් ගන්නවා. නමුත් ආණ්ඩුවක 3 වන වසර ගෙවෙන විට තමයි වැඩ ප්‍රතිඵල පේන්න ගන්නේ. එතකොට තමයි ජනතාව හොද කියන්න පටන් ගන්නේ.

ප්‍රජාත්‍රන්ත්‍රවාදය, නිදහස, මානව අයිතිවාසිකම් ලබා දීම පසුගිය අවුරුදු දෙකේදී සිදු වුනා. ඒකාධිපතිකමට ගිය රට ආපස්සට හැරවීම සිදු කෙරුනා නමුත් රැකියා දශලක්ෂයේ ව්‍යාපෘතිය, වේගවත් සංවර්ධනය කිරීම කියන එකේ ජනතාවටගේ පැත්තේන් විශාල චෝදනාවන් එල්ල වෙනවා. එමෙන්ම දූෂිතයන්ට දඩුවම් ලබා දීමේ සම්බන්ධවද විශාල චෝදනාවන් එල්ල වෙනවා. නමුත් ඒ දූෂිතයන් සම්බන්ධව යට ගහලා තියෙන පරීක්ෂණ ටික අඛණ්ඩවම පසුගිය වසර දෙක තුළ සිදු කලා. ඒ නිසා මේ අවුරුද්දේ අපිට ප්‍රාර්ථනා තියාගන්න පුළුවන් හොරුන්ට, මිනීමරුවන්ට, දූෂිකයින්ට නිසැකවම දඩුවම් ලැබෙන වසරක් කියලා. හැබැයි නීතිපති දෙපාර්තමේන්තුවේ ෆයිල් වල දූවිලි ටික පිහදාලා එලියට අරගෙන ඒකට අවශ්‍ය නිසි නීති ක්‍රියාමාර්ග කඩිනමින් ගැනීම තමයි මේ රටේ ජනතාවට සුභ අළුත් අවුරුද්දක් වේවායි කියනකොට දේශපාලනඥයෝත් රජයත් හිතේ තියා ගන්න ඕන දේ. මොකද හේතුව අපි ලබන අවුරුද්දෙත් දූෂිතයන්ට දඩුවම් දෙන්න කියනකොට ජනතාවට රජය කෙරෙහි විශ්වාසය සම්පූර්ණයෙන්ම නැතිවෙලා යාවී.

– මිනුර රෂාන්ත