රටේ ඒකීය බව නැති කරනවානම් අපේ අතපය ඇස් පෙනීම නැවත දෙන්න.. – ආබාධිත සෙබළු ඉල්ලති..

January 27, 2017 at 4:40 pm | lanka C news
රටේ ඒකීය බව නැති කරනවානම් අපේ අතපය ඇස් පෙනීම නැවත දෙන්න.. – ආබාධිත සෙබළු ඉල්ලති..

ජාතික සංවිධාන සම්මේලනය සංවිධානය කරන දීප ව්‍යාප්ත සම්මන්ත්‍රණ මාලාවේ අම්පාර දිස්ත්‍රික් සම්මන්ත්‍රණ පසුගිය දෙදින තුල දෙහිඅත්තකන්ඩිය, පදියතලාව, උහන සහ අම්පාර නගරය යන ස්ථාන වලදී පැවැත්විණි. “රට බෙදන ව්‍යවස්ථාව, රට විකුණන ETCA ගිවිසුම පරදවමු” යන තේමාවෙන් මෙම සම්මන්ත්‍රණ පැවැත්විණි.

ජාතික සංවිධාන සම්මේලනයේ සම්බන්ධීකාරක රියර් අද්මිරාල් සරත් වීරසේකර, දේශ හිතෛශී ජාතික ව්‍යාපාරයේ මහා ලේකම් වෛද්‍ය වසන්ත බණ්ඩාර, ගෝලීය ශ්‍රී ලංකා සංසදයේ සම්බන්ධීකාරක නීතීඥ නුවන් බෙල්ලන්තුඩාව සහ ජාතික විශ්ව විද්‍යාල ආචාර්ය සංගමයේ ලේකම් ආචාර්ය චන්න ජයසුමන යන මහත්වරු මෙහි දී දැක්වුහ. අම්පාර දිස්ත්‍රික්කය නියෝජනය කරන පළාත්සභා මන්ත්‍රීවරු, හිටපු ප්‍රාදේශීය සභා මන්ත්‍රීවරු සියලු දෙනාම පාහේ මෙන්ම අම්පාර දිස්ත්‍රික් පාර්ලිමේන්තු මන්ත්‍රීනි ශ්‍රියානි විජේවික්‍රම මහත්මිය ද මෙම රැස්වීමවල දක්නට ලැබීම විශේෂත්වයක් විය.

පදියතලාව ප්‍රදේශයේ පැවති රැස්වීමට දිගාමඩුල්ලේ ඈත දුෂ්කර ගම්මානවල සිට පැමිණි ආබාධිත රණ විරුවන් ගණනාවක් සහභාගී විය. ඒ අතර සිටි ආබාධිත නාවික හමුදා සෙබලු කලකට පසු සිය හමුදා නායකයකු වූ රියර් අද්මිරාල් සරත් වීරසේකර මහතා දැකීමෙන් පසු සංවේදීව අදහස් දක්වමින් “සර්, රටේ ඒකීය බව නැති කරනවානම් මහ එවුන්ට කියන්න අපේ නැතිවුන කකුල් අතපය පෙනීම දීල ඊට පස්සේ රට ෆෙඩරල් කරන්න” යැයි කියමින් කඳුළු සලන්නට විය. එය පැමිණි සිටි සියලු දෙනා දැඩි සංවේගයට පත් කල සිදුවීමක් විය.

– සේනානි

183 views
Main News