රටේ සියලූ මුස්ලිම්වරුන්ගේ බලාපොරොත්තුව ගෝඨාභය ජනාධිපති වීමයි.. අප අන්තවාදීන් නොවන බව ඔප්පු කල හැක්කේ ඔහුටයි…- පච්ච පල්ලියේ සභාපති

September 20, 2019 at 6:48 pm | lanka C news
රටේ සියලූ මුස්ලිම්වරුන්ගේ බලාපොරොත්තුව ගෝඨාභය ජනාධිපති වීමයි.. අප අන්තවාදීන් නොවන බව ඔප්පු කල හැක්කේ ඔහුටයි…- පච්ච පල්ලියේ සභාපති

ශ‍්‍රී ලංකා පොදුජන පෙරමුණේ ජනාධිපති අපේක්‍ෂක ගෝඨාභය රාජපක්‍ෂ මහතා වෙනුවෙන් කදුරුවෙල මුස්ලිම් කොළණිය පච්චපල්ලියේ පැවති ආගමික වැඩසටහනකදී අදහස් දැක්වූ කදුරුවෙල මුස්ලිම් පච්චපල්ලියේ සභාපති අල්හාජ් බසීර් අහමඞ් මහතා දැක්වූ අදහස් –

පල්ලියට පැමිණ ආගමික වැඩසටහනකට සහභාගි වූ අනාගත ජනාධිපති අපේක්‍ෂක ගෝඨාභය රාජපක්‍ෂ මහතාට ස්තුතිවන්ත වෙනවා. අද දවස ඉතා වැදගත්. ඔබතුමාට සමස්ත මුස්ලිම් ජනතාවගේ ප‍්‍රශංසාව හිමිවෙනවා. අපේ ජනතාව කිසිම දිනක වැරදි වැඩක් කරන්නෙ නැහැ. පල්ලිවලින් ආගමික දේවල් පමණයි කතා කරන්නේ. ජමියතුල් උලමා කොළඹ දිස්ත‍්‍රික් නායකයා ඇතුළු කවුරුත් දේශපාලනය සම්බන්ධයෙන් බලපෑම් කරන්නේ නැහැ.

රටේ සියලූම මුස්ලිම්වරුන්ගේ බලාපොරොත්තුව ගෝඨාභය රාජපක්‍ෂ මහතා ඊළඟ රටේ ජනාධිපති වීමයි. අපේ ජනතාවට ආරක්‍ෂාවක් අවශ්‍යයි. පසුගිය කාලයේ මුස්ලිම් ජනතාවට සිදුවූ දේවල් කවුරුත් දන්නවා. අපේ කවුරුත් මේ රටට විරුද්ධව කටයුතු කරන්නේ නැහැ. මේ රට විනාශ කරන්න අපට අවශ්‍ය නැහැ. අපේ මවුවරුන් අපට කවදාවත් වැරදි දෙයක් කරන්න කියලත් නැහැ. රටේ මුස්ලිම් ජනතාව සුළු ජාතියක් වුවත් අපට අවශ්‍ය රට දියුණු කරන්නයි. සිංහල, දෙමළ ජනතාව සමග එකට ජීවත් වීමට ලැබීම අප ලද මහත් භාග්‍යයක්.

සහරාන්ලා නිසා සමස්ත ජනතාවම අන්තවාදීන් වෙලා. අන්තවාදීන් ඉන්නේ ඉතා සුළු පිරිසක් පමණයි. නමුත් මාධ්‍ය මගින් සමස්ත මුස්ලිම් ජනතාව අන්තවාදීන් කරනවා. සමස්ත ජනතාවම අන්තවාදීන් නෙමෙයි. ඔබතුමා ජනාධිපති වෙලා අපි අන්තවාදීන් නැහැ කියලා පෙන්වන්න. අපේ බලාපොරොත්තුව ඔබතුමා පමණයි.

මෙම අවස්ථාවට ශ‍්‍රී ලංකා පොදුජන පෙරමුණේ පොළොන්නරුව සංවිධායක, පාර්ලිමේන්තු මන්ත‍්‍රී රොෂාන් රණසිංහ මහතා ඇතුළු මුස්ලිම් ජනතාව විශාල පිරිසක් එක්ව සිටියහ.

– GR media

347 views