විදේශගත ශ්‍රී ලාංකිකයන්ට ඡන්ද අයිතිය.. නීති සංශෝධනයට තේරීම් කාරක සභාවක්..

October 17, 2020 at 2:32 am | lanka C news
විදේශගත ශ්‍රී ලාංකිකයන්ට ඡන්ද අයිතිය.. නීති සංශෝධනයට තේරීම් කාරක සභාවක්..

විදේශගත ශ්‍රී ලාංකේයන්ට ඡන්ද අයිතිය ලබාදීම ඇතුළු මැතිවරණ නීති සංශෝධනයට අවශ්‍ය තේරීම් කාරක සභාවක් ඉදිරියේදී යෝජනා කරන බව ගරු අග්‍රාමාත්‍ය මහින්ද රාජපක්ෂ මැතිතුමා පැවැසීය.

මැතිවරණ කොමිෂන් සභාවේ උපාය මාර්ගික සැලසුම් පිළිබඳ සාකච්ඡාවක් අරලියගහ මන්දිරයේ පැවැති අවස්ථාවේ අග්‍රාමාත්‍ය මහින්ද රාජපක්ෂ මැතිතුමා මේ බව සඳහන් කළේය.

මෙම හමුවේදී කරුණු පැහැදිලි කළ මැතිවරණ කොමිෂන් සභාවේ සභාපති මහින්ද දේශප්‍රිය මහතා 2020-2024  මැතිවරණ කොමිෂන් සභාවේ උපාය මාර්ගික සැලසුමට අදාළව මැතිවරණ නීති සංශෝධනය වීම අත්‍යවශ්‍ය කරුණක් බව පෙන්වා දුන්නේය.

මැතිවරණයට අදාළ ඇප මුදල් සංශෝධනය කිරීම, මැතිවරණය පැවැත්වෙන දිනයේ ඡන්දය දැමීමට නොහැකි පුද්ගලයන් වෙනුවෙන් ඊට පෙර වෙනම දිනයක් ලබාදීම, වයස අවුරුදු 18 සම්පූර්ණ වූ විගස ඡන්ද අයිතිය ලැබෙන සේ ඡන්ද හිමි නාම ලේඛනය මාස තුනකට වතාවක් යාවත්කාලීන කිරීම, විදේශගත ශ්‍රී ලාංකිකයන්ට ඡන්ද අයිතිය ලබාදීම, මැතිවරණ වියදම් පාලනය, අබාධිත පුද්ගලයන්ට පහසුකම් සපිරි ඡන්ද මධ්‍යස්ථාන සකස්වීම සහ විශේෂ ව්‍යාපෘති යටතේ ඊ-ඡන්ද ක්‍රමය ඇතුළු කරුණු රැසක් පිළිබඳව මැතිවරණ කොමිෂන් සභාවේ නිලධාරීහු මෙහිදී අග්‍රාමාත්‍යතුමා දැනුවත් කළහ.

මෙම අවස්ථාවට ශ්‍රී ලංකා පොදුජන පෙරමුණේ ලේකම් පාර්ලිමේන්තු මන්ත්‍රී නීතිඥ සාගර කාරියවසම්, අග්‍රාමාත්‍ය අතිරේක ලේකම්වරුන් වන චමින්ද කුලරත්න, ගනේෂ් ධර්මවර්ධන (නීති), මැතිවරණ කොමිෂන් සභාවේ සභාපති මහින්ද දේශප්‍රිය, මැතිවරණ කොමසාරිස් ජනරාල් සමන් ශ්‍රී රත්නායක, කොමිෂන් සභාවේ ලේකම් එච්.එම්.ටී.ඩී. හේරත්, නියෝජ්‍ය මැතිවරණ කොමසාරිස් එස්.අච්චුදන්, පර්යේෂණ හා සැලසුම් අධ්‍යක්ෂ චන්න පී. ද සිල්වා, ශ්‍රි ලංකා පොදු ජන පෙරමුණේ පාලන ලේකම් හා ජාතික නිවාස සංවර්ධන අධිකාරියේ සභාපති  රේණුක පෙරේරා මහත්වරු එක්ව සිටියහ.

රොහාන් වැලිවිට
අග්‍රාමාත්‍ය මාධ්‍ය ලේකම්

11,724 views

3 Comments to “විදේශගත ශ්‍රී ලාංකිකයන්ට ඡන්ද අයිතිය.. නීති සංශෝධනයට තේරීම් කාරක සභාවක්..”

  1. Moulana says:

    එපා! ඒකෙන් වෙන්නේ දෙමළ ජන්ද වැඩිවෙන එක.

  2. Nuwan says:

    මෙහෙම ගියොත් විදේශිකයන්ට ශ්‍රිලංකාවේ අයිතියත් හිමිවේවි. කරුණා කර තමන්ගේ පටු අරමුණු හා ලාබ වෙනුවෙන් බහුතරය දුන් වරම බිලි නොදෙන්න . ද්විත්ව පුරවැසියන් පාර්ලිමේන්තුවට අවශ්‍ය නොවේ .බැසිල් වෙනුවෙන් ජාතිය බිලි නොදෙන්න

  3. කෝපි says:

    සිංහල බහුතරයෙන් ආපු ආණ්ඩුව සිංහලයන්ට අරින්න නේ හදන්නේ….මෙකෙන් වෙන්නේ දෙමල ඩයස්පෝරාවට සහ අන්තවාදි මුස්ලිම් ලට ජන්ද අයිතිය හිමි වෙන එක

Leave a Comment