විමල් යලි රිමාන්ඞ්.. කොටි රැදවියන්ගෙන් ජීවිත තර්ජන…

February 20, 2017 at 12:40 pm | lanka C news
විමල් යලි රිමාන්ඞ්.. කොටි රැදවියන්ගෙන් ජීවිත තර්ජන…

කිසිදු පහසුකමක් නොමැති ස්ථානයක දින 42ක් තිස්සේ රඳවා තැබීමෙන් විමල් වීරවංශ මන්ත්‍රීවරයාගේ මූලික අයිතිවාසිකම් පවා අහිමිවෙලා – විමල්ගේ නීතීඥයෝ පෙන්වාදෙති

දින 42ක කාලයක් තිස්සේ දිනකට පැය 13 බැගින් අඩි 8ක් දිග අඩි 4ක් පළල සිර මැදිරියක රඳවා තැබීමෙන්ද ප්‍රමාණවත් වැසිකිලි පහසුකම් නොමැති ස්ථානයක රඳවා තැබීමෙන්ද තම සේවාදායකයාගේ මූලික අයිතිවාසිකම් පවා අහිමි වී ඇති බව විමල් වීරවංශ මහතා වෙනුවෙන් පෙනී සිටි නීතීඥ කණ්ඩායම කොටුව මහේස්ත්‍රාත් ලංකා ජයරත්න මෙනෙවිය වෙත දැනුම් දුන්හ.

වාහන අවභාවිතයට අනුබල දීම යන චෝදනාවට සැකපිට අත්අඩංගුවට ගෙන මේ වන විට මැගසින් බන්ධනාගාරයේ රඳවා සිටින විමල් වීරවංශ මහතා අද(20) කොටුව මහේස්ත්‍රාත් අධිකරණය වෙත ඉදිරිපත් කරනු ලැබූ අවස්ථාවේ දී එම නීතීඥ පිරිස එසේ දැනුම් දුන්හ.

එසේම විමල් වීරවංශ මන්ත්‍රීවරයා එල්.ටී.ටී.ඊ ඝාතන ලයිස්තුවේ ඉහලින්ම සිටි අයකු බවත් අද ඔහු මැගසින් බන්ධනාගාරයේ එල්.ටී.ටී.ඊ සැකකරුවන් හා පාතාල සාමාජිකයන් සමඟ රඳවා තැබීමෙන් ඔහුගේ ජීවිතයට තර්ජනයක් එල්ල වී ඇති බවත් මෙම නීතීඥ කණ්ඩායම පෙන්වා දුන්හ.

එම කරුණු දැක්වීම අවසානයේ මේ සම්බන්ධයෙන් සොයා බලන ලෙස කොටුව මහේස්ත්‍රාත් ලංකා ජයරත්න මෙනෙවිය මැගසින් බන්ධනාගාරයේ අධිකාරිවරයාට දැනුම් දුන්නාය.

අද දින විමල් වීරවංශ මහතා අධිකරණයට ඉදිරිපත් වූ අවස්ථාවේ ඔහු වෙනුවෙන් නීතීඥ කපිල ගමගේ, නීතීඥ පාලිත ගමගේ, නීතීඥ ප්‍රේමනාත් දොලේවත්ත, නීතීඥ සම්පත් මෙන්ඩිස් , නීතීඥ අසිත් සිරිවර්ධන ඇතුළු නීතීඥ කණ්ඩායමක් සමග ජනාධිපති නීතීඥ ජයන්ත වීරසිංහ මහතා පෙනී සිටියහ.

අනුරුද්ධ බණ්ඩාර රණවාරණ
මාධ්‍ය ලේකම්
ජාතික නිදහස් පෙරමුණ

37 views
Main News