විමල් ‘ලංකාපැක්’ අරඹයි..

February 13, 2021 at 2:20 am | lanka C news
විමල් ‘ලංකාපැක්’ අරඹයි..

ඇසුරුම්කරණ කර්මාන්ත ක්ෂේත්‍රය ඉදිරියේ පවතින ප්‍රධානතම අභියෝගය වන්නේ පරිසර හිතකාමී ඇසුරුම්කරණයකට පරිවර්තනය වීම බවත් එම අභියෝගය ජය ගැනීමට ලොව පවතින දියුණුතම තාක්ෂණය සහ වෘත්තීයභාවයෙන් යුත් සම්පත්දායකයන් සහිත මෙරට ඇසුරුම්කරණ කර්මාන්ත ක්ෂේත්‍රය සමත් වනු ඇති බවත් ඒ සඳහා අවශ්‍ය උපරිම සහයෝගය ලබා දීමට කර්මාන්ත අමාත්‍යංශය සූදානම් බවත් කර්මාන්ත අමාත්‍ය විමල් වීරවංශ මහතා පවසයි.

කොළඹ බණ්ඩාරනායක ජාත්‍යන්තර අනුස්මරණ සම්මන්ත්‍රණ ශාලාවේ පැවැති ‘ලංකාපැක්’ ජාත්‍යන්තර ඇසුරුම් කරණ ප්‍රදර්ශනය විවෘත කරමින් ඒ මහතා මෙසේ පැවසීය.

එහිදී වැඩිදුරටත් අදහස් දැක්වූ වීරවංශ අමාත්‍යවරයා මෙසේද සඳහන් කළේය.

“නව සාමාන්‍ය තත්වය යටතේ අපට අලුත් ජීවිතයකට හැඩ ගැසීමට සිදුව තිබෙනවා. පසුගිය දිනක මම අමාත්‍ය මණ්ඩල රැස්වීම අවසන් වී විදුලි සෝපානයෙන් පහළට බසින විට ප්‍රසන්න රණතුංග අමාත්‍යතුමා ඇතුළු තවත් අමාත්‍යවරුන් පිරිසකට කීවා, ‘ විදේශ අමාත්‍යතුමකු අද සිටිනවා, කිසිදු විදේශ රටකට යාමට නොහැකිව. සංචාරක අමාත්‍යතුමකු සිටිනවා, කිසිදු රටකට සංචාරය කිරීමට නොහැකිව. ක්‍රීඩා අමාත්‍යතුමකු සිටිනවා කිසිදු ක්‍රීඩා තරඟයක් පැවැත්වීමට නොහැකිව ( ඒ කතාව සිදුවුණේ නාමල් රාජපක්ෂ මැතිතුමා සෞඛ්‍ය මාර්ගෝපදේශ අනුව ක්‍රිකට් තරඟ සංවිධානය කිරීමට පෙරයි) යනුවෙන්. එහෙම අභියෝගාත්මක වාතාවරණයකට තමයි අපට මුහුණ දීමට සිදුව ඇත්තේ. නමුත් ඊට හැඩගැසෙමින්, ඊට අනුකූලව නව සාමාන්‍ය තත්ත්වය යටතේ අපේ සමාජ, ආර්ථික හා දේශපාලන ක්‍රියාකාරකම් පවත්වාගෙන යාමට අපට සිදුව තිබෙනවා.

‘ පරිසර හිතකාමී ඇසුරුම්කරණයක් කරා…’

ඒ නිසා මෙවැනි ප්‍රදර්ශන කොවිඩ් වසංගතයට බියෙන් සම්පූර්ණයෙන් අතනොහැර සෞඛ්‍ය මාර්ගෝපදේශ අනුව පැවැත්වීම මේ රටේ ආර්ථික ප්‍රවර්ධනය සහ ජන ජීවිතයේ වැඩි දියුණුව වෙනුවෙන් සිදු කළ යුතු වැදගත් අත්‍යවශ්‍ය දෙයක්. ඇසුරුම්කරණ කර්මාන්තය අපේ රටේ අනෙකුත් කර්මාන්ත හා සසඳා බැලීමේදී සැලකිය යුතු දියුණුවක් ලබා ඇති කර්මාන්තයක්. ඒ වගේම ඒ ඇසුරුම්කරණ කර්මාන්තයට තිබෙන ප්‍රධානතම අභියෝගය තමයි හැකිතාක් පරිසර හිතකාමී ඇසුරුම්කරණයකට ගමන් කිරීම. අද ලෝකයේ, විශේෂයෙන් නව පරම්පරාවන් තුළ පරිසරය කෙරෙහි තිබෙන සංවේදීතාව සාපේක්ෂව වැඩි වී තිබෙනවා. ඔවුන් පරිසරය කෙරෙහි දක්වන ඇල්ම, ආදරය අතීත පරම්පරාවන්ටත් වඩා වැඩි වී තිබෙනවා. ඒක ඉතාම හොඳ ලක්ෂණයක්. ඒ නිසා ඉහත කී ප්‍රධාන අභියෝගය ජයගත හැකි, මේ මහපොළොවට දරාගත හැකි, අවශෝෂණය කරගත හැකි ඇසුරුම්කරණයකට පරිවර්තනය වීමට මේ රටේ ඇසුරුම්කරණ කර්මාන්තකරුවාට හැකි විය යුතුයි.

‘ උපදේශන කමිටු පිහිටුවීම’

අපේ රටේ ඇසුරුම්කරණ කර්මාන්ත ක්ෂේත්‍රයේ නියැලී සිටින්නන් ලෝකයේ පවතින දියුණුතම තාක්ෂණය යොදා ගනිමින් තිබෙන නිසාත් වෘත්තීයභාවයෙන් යුත් සම්පත්දායකයන් පිරිසක් ක්ෂේත්‍රය තුළ බිහිව සිටින නිසාත් මම විශ්වාස කරනවා, ‘ පරිසර හිතකාමී ඇසුරුම්කරණයකට ඔවුන් කඩිනමින් ගමන් කරාවි’ කියා. ඒ සඳහා කර්මාන්ත අමාත්‍යාංශය ලෙස අපට ලබාදිය හැකි සෑම සහයෝගයක්ම ඒ පිරිසට ලබා දීමට අපි සූදානම්. ඉතා දීර්ඝ කාලයක් තිස්සේ අකර්මණ්‍යව පැවති ඇසුරුම්කරණ කර්මාන්ත ක්ෂේත්‍රයට අදාළ උපදේශන කමිටුව සහ තවත් කර්මාන්ත ක්ෂේත්‍ර ගණනාවකට අදාළ උපදේශන කමිටු අපි යළි පිහිටුවනු ලැබුවා. එමගින් අපි බලාපොරොත්තු වන්නේ අදාළ කර්මාන්ත ක්ෂේත්‍රවල නියැලී සිටින්නන් මගින්ම එම කර්මාන්ත වැඩිදියුණු කිරීමට උපායමාර්ගික සැලැස්මක් සකස් කරවාගෙන ඒ සඳහා අවශ්‍ය රාජ්‍ය අනුග්‍රහය අපේ පැත්තෙන් ලබාදීම.

‘ දේශීය නිෂ්පාදන බලගැන්වීම’

ගෝඨාභය රාජපක්ෂ ජනාධිපතිතුමන්ගේ සහ මහින්ද රාජපක්ෂ අගමැතිතුමන්ගේ නායකත්වයෙන් යුත් අපේ රජයේ ප්‍රධාන ප්‍රතිපත්තිය වී ඇත්තේ දේශීය නිෂ්පාදන බලගැන්වීමයි. පසුගිය කාලයේ පිටරටින් කහ ගෙන්වීම නතර කළා. කහ හිඟයක් ඇති වුණා. ඊට විවේචන එල්ල වුණත් අද දේශීය වශයෙන් කහ නිෂ්පාදනය වැඩි වෙමින් තිබෙනවා. ක්‍රමානුකූලව අපි ඒ අභියෝගය ජය ගනිමින් තිබෙනවා. එසේ අපි මෙම නව සාමාන්‍ය තත්ව යටතේ කවර බාධා ඇති වුවත් දේශීය නිෂ්පාදනය බලගැන්වීම රජයක් ලෙස ඉදිරියට කරගෙන යනවා. මෙම ප්‍රදර්ශනය සංවිධානය කිරීමට මූලිකත්වය ගෙන ක්‍රියා කළ ශ්‍රී ලංකා ඇසුරුම්කරණ ආයතනයට සහ සීඩීසී ඉවෙන්ට්ස් ආයතනයට ද අපේ ස්තූතිය පුද කර සිටිනවා”

මෙම ප්‍රදර්ශනය හා සමගාමීව පැවැති දේශීය නිෂ්පාදන අලෙවි ප්‍රදර්ශනය සංචාරක අමාත්‍ය ප්‍රසන්න රණතුංග මහතා විසින් විවෘත කරන ලද අතර ප්‍රදර්ශන දෙකම එකම සමාරම්භක උත්සවයක් මගින් විවෘත කිරීම සුවිශේෂ අවස්ථාවක් ලෙස සනිටුහන් විය.

අනුරුද්ධ බණ්ඩාර රණවාරණ,
මාධ්‍ය ලේකම්,
කර්මාන්ත අමාත්‍යාංශය

85,586 views

12 Comments to “විමල් ‘ලංකාපැක්’ අරඹයි..”

  1. Rama says:

    Kauru monawa keewath wimalta man garu karanawa

  2. ගමේ මිනිහා says:

    රටවෙනුවෙන් කුමක්හෝ හොඳක්කරන්න හදන ඇමතිකෙනෙක්. ඒත් අපේ මිනිස්සුන්ගේ ආකල්ප දියුණුවුනේ නැත්තං ඔක්කොම වතුරේ… ගහක් කොලක් කැළයක් ආයි හොයාගන්න වෙන්නෙනෑ…

    • Anuradha says:

      දැම්ම දුදරුවන්ව එක්කගෙන යන්න රටවටේ ගිහින් ෆොටෝ ටිකක් ගන්න වැඩියෙන් මේ ගස් කොළ මොකද අනාගතයේදී එපමණයි බල බලා සිටින්න වෙන්නේ ගස් කියලා දෙයක් ලංකාවේ තිබුනා කියලා මතක්වෙන්න.

  3. Damian says:

    අලුතින් පාර්ලිමේන්තු ඇවිත් ඉන්නවා ජිවිතේ ට රටට සේවයක් නොකරපු , ගොන් කතා කියන මොන්ටිසෝරි ගිරව් කීප දෙනෙක්.

    අන්න උන් වත් පැක් කරලා මුදට වත් තල්ලු කරන්න පුළුවන් නම් රටට හොඳයි.

  4. ලංකා නිපැයුම් says:

    මේ දේශප්‍රේමීන්ට ලංකාපැක් හැර සිංහලෙන්
    දාන්න නමක් තිබිල නෑ. මේ ඉංග්‍රීසි මානසිකත්වය නිසා ප්‍රංශය, ජපානය, ජර්මනිය, ඉතාලිය රුසියාව වැනි රටවල බලවත් ව්‍යාපාරිකයන් ලංකාවට ගෙන්වා ගන්න බැරි වෙනව. “ලංකා නිපැයුම්” කියා නම දැම්ම නම් කොච්චර වටිනවද?

  5. LAKWESiYO says:

    The present generation must be taught to appreciate the Sri Lanka made products. The examples must set first by the Politicans and upper and middle class citizens.
    ” SIYA RATA DHE SIRI SAPA DHE”

  6. ජනහිත says:

    ඇසුරැම්කරනය සදහා අවශ්‍ය අමුද්‍රව්‍ය හැකිතරම් දේශීය ව්‍යාපාරිකයන්ගෙන් මිලදී ගැනීමට උනන්දු කල යුතුයි.
    ඉන්දියාවෙන් මුද්‍රණ තීන්ත ගෙන්වීම නවතා දේශීය ව්‍යාපාර වලට වැඩි ඉඩක් ලබා දෙන්න.

  7. Thusitha indika says:

    රටට ජාතියට ආදරේ කරන නියම මිනිහෙක් මෝඩ මොන්ගල් පිස්සු බලු ගොන් පීචන් මන්ත්‍රීවරුන් ඇමඇමතිවරුන්ට වඩා රටට මෙතුමා සම්පතක්

Main News