සිංහලයා මෝඩයා කියු යුගය නොවැම්බර් 16 අවසන් වුණා.. සෙසු ආගම්වල නිදහස රැකෙන්නේ සිංහල බෞද්ධයා රැකුණොත් පමණයි..

January 5, 2020 at 10:00 am | lanka C news
සිංහලයා මෝඩයා කියු යුගය නොවැම්බර් 16 අවසන් වුණා.. සෙසු ආගම්වල නිදහස රැකෙන්නේ සිංහල බෞද්ධයා රැකුණොත් පමණයි..

මේ රටේ වාසය කරන සියලුම ජාතීන්වල ජනතාවගේ හා සියලුම ආගම්වල නිදහස තහවුරු කරන්නෙ සිංහල බෞද්ධ ජනතාව බව  අග්‍රාමාත්‍ය මහින්ද රාජපක්ෂ මහතා ප්‍රකාශ කරයි.

සුගතදාස ගෘහස්ත ක්‍රීඩාංගනයේ පැවති ස්වාමීන් වහන්සේලා පන්දහසක් නමකට පාලි ත්‍රිපිටකය, සම්පූර්ණ අත්ත කතා, පාලි සිංහල ශබ්දකෝෂය ඇතුළු තවත් පොත්පත් විශාල ප්‍රමාණයක් අන්තර්ගත කරපු ටැබ් පරිගණක බෙදා දීමේ අවස්ථාවට එක්වෙමින් අග්‍රාමාත්‍යතුමා මේ බව අවධාරණය කළේය.

එහිදී වැඩිදුරටත් අදහස් දැක්වූ අග්‍රමාත්‍ය මහින්ද රාජපක්ෂ මහතා,

වැඩමවා වදාළ ත්‍රෛනිකායික මහානායක ස්වාමීන්වහන්සේලා, අනුනායක ස්වාමීන්වහන්සේලා ප්‍රමුඛ අතිපූජනීය මහා සංඝරත්නයෙන් අවසරයි. ගරු ඇමතිවරුණි, මන්ත්‍රීවරුණි, මන්ත්‍රීවරියණි, සම්භාවනීය අමුත්තණි,

අපි කවුරුත් අද දවසේ සහභාගී වෙලා ඉන්නෙ වචනයෙන් කියල නිම කරන්න බැරි තරම් වැදගත් උත්තුංග කාරණාවකට. ලබුනෝරුව කන්ද ආරණ්‍ය සේනාසනයේ අනුශාසක ගෞරවණීය මාන්කඩවල නන්දරතන ස්වාමීන් වහන්සේගේ මැදිහත් වීමෙන් සම්පූර්ණ පාලි ත්‍රිපිටකය, සම්පූර්ණ අත්ත කතා, පාලි සිංහල ශබ්දකෝෂය ඇතුළු තවත් පොත්පත් විශාල ප්‍රමාණයක් අන්තර්ගත කරපු ටැබ් පරිගණක ගරු ස්වාමීන්වහන්සේලා  පන්දහසක් නමකට පූජා කිරීම තමයි මෙතන සිද්ධ කෙරෙන්නෙ. නවීන තාක්‍ෂණයේ ආදිනව ගැන අපි ඕන තරම් කතා අහලා තියෙනවා. විශේෂයෙන්ම පරිගණක තාක්‍ෂණය හරහා බාල පරම්පරාව නොමග යවනසුලු බොහෝ දේවල් ඔවුන් වෙතට යන ආකාරය ගැන කතාබහ ඇතිවෙලා තියෙනවා.

නමුත් නවීන තාක්‍ෂණය කොයි තරම් ප්‍රයෝජනයි ද කියන කාරණය අපට වැටහෙන්නෙ මේ වගේ අවස්ථාවල. පාලි ත්‍රිපිටකය සහ අත්ත කතා අච්චු ගහලා පොත් හැටියට මේ ප්‍රමාණයෙන් බෙදා හරින එක ඇත්ත වශයෙන්ම ප්‍රායෝගික නෑ. නමුත් නවීන තාක්‍ෂණය ප්‍රයෝජනයට අරගෙන අපිට පුළුවන් සෑම භික්ෂූන් වහන්සේ නමක් සතුවම සම්පූර්ණ ත්‍රිපිටක හා සම්පූර්ණ අත්ත කතා තියෙන බවට වග බලාගන්න. බුදු දහම බිහිවුණේ ලංකාවේ නෙවෙයි. නමුත් නිර්මල ථේරවාද බුදුදහම රැකුණෙ ලංකාවෙයි. පාලි ත්‍රිපිටකය කියන්නෙ ලෝක බුද්ධිමය උරුමයේ වැදගත් කොටසක්. අපට තාක්‍ෂණය පාවිව්චි කරල සම්පූර්ණ පාලි ත්‍රිපිටකය සහ අත්ත කතා මේ විදියට බෙදල දෙන්න පුළුවන් වෙන එක නවීන තාක්‍ෂණයේ ආශ්චර්යක්. මේ තාක්‍ෂණය අපි බුදු දහමේ උන්නතිය සඳහා පාවිච්චි කරන්න ඕනෙ. ලබුනෝරුව කන්ද ආරණ්‍ය සේනාසනය ඇතුළු මහා සංඝරත්නය බුදු දහම විකෘති වීමට ඉඩ නොදීම සඳහා ගෙන යන මේ වැඩපිළිවෙළ සමස්ත ලෝකවාසී බෞද්ධ ජනතාවගේම ඇගයීමට ලක්වෙන්න ඕන.

මාන්කඩවල නන්ද රතන ස්වාමීන් වහනේසේ මේ සමරු කලාපයේ පෙන්නල දීල තියෙනව සම්බුද්ධ ශාසනය අභියෝගයට ලක් වූ අවස්ථාවල රාජ්‍ය පාලකයන්ටත් ගිහි ප්‍රජාවටත් ඒ අභියෝගය ජය ගන්න මහා සංඝරත්නය නායකත්වය දීපු ආකාරය ගැන. මේ මෑතකත් ඒ වගේ අවස්ථාවක් අපි පහු කෙරුවා. උන්වහන්සේ ඒ ගැනත් යම් සඳහනක් කරලා තියෙනවා. පසුගිය ජනාධිපතිවරණයේ ප්‍රතිඵල දිහා බැලුවම පේනවා බෞද්ධකමට හා පොදුවේ සිංහලකමට විරුද්ධ මෙහෙයුම් කොයිතරම් බලගතු විදියට ක්‍රියාත්මක වුණා ද කියල. රටට එරෙහි බලවේග ඒ දරපු උත්සහය සාර්ථක වුණානම් සිංහල ජාතියට අත්වන ඉරනම කුමක් ද කියන එක ගැන අපි සියලු දෙනාම හොඳින් කල්පනා කරලා බලන්න ඕන.

මේ අභියෝග වලින් අපි තවත් ශක්තිමත් වෙන්න ඕන. මහාවංශයේ සඳහන් වෙන විදියට වලගම්බා  රජ්ජුරුවන්ගෙ කාලෙ පාලි ත්‍රිපිටකය ලේඛනගත කෙරුවෙත් නිර්මල ථේරවාද බුදුදහමට එල්ල වුණු අභියෝගයක් නිසා. එදා ඒ සිදු වුණු ලේඛණගත කිරීම නිසා තමයි අද අපි මහ ලෝක උරුමයක ආරක්‍ෂකයන් බවට පත් වෙලා ඉන්නෙ. ඉතිං අභියෝග කියන්නෙ නරක දෙයක්මත් නොවෙයි. ඒකෙන් තමයි ජාතියක් පන්නරය ලබන්නෙ. අපි පහුගිය අවුරුදු පහේදි අත්දැකපු දේවල් නිසා, අපේ ජාතික හැඟීම් තවත් ශක්තිමත් වුණා.

සිංහලයා මෝඩයා කැවුම් කන්න යෝධයා කියපු ඒ යුගය පහුගිය නොවැම්බර් 16 වෙනිදා අවසන් වුණා. අතිපූජ්‍ය මහ සංඝරත්නය එහි දී මූලිකත්වය ගත්ත ආකාරය ගැන මම මෙතන අලුතින් කියන්න ඕන නැහැ. මහා සංඝරත්නයේ ඓතිහාසික කාර්යභාරය ඉහළින්ම සිදු වුණු බව විතරක් මම කියන්නම්. බෞද්ධ ශාසනය රැක ගැනීම සිංහල ජාතිය රැක ගැනීම, රටේ ඒකීයභාවය රැක ගැනීම කියන මේ සියල්ල එකට බැඳුණු දේවල්. අපේ ඉතිහාසය තුළ ඉතාමත්ම පැහැදිළිව පේන්න තියෙන කාරණය තමයි සිංහල බෞද්ධයා රැකුණොත් තමයි සෙසු ආගම්වලටත් මේ රටේ ආගමික නිදහස රැකෙන්නේ කියන එක. මේ රටේ වාසය කරන සියලුම ජාතීන්වල ජනතාවගේ හා සියලුම ආගම්වල නිදහස තහවුරු කරන්නෙ සිංහල බෞද්ධ ජනතාවයි.

බෞද්ධ ශාසනය මේ රට තුළ ශක්තිමත් කරන්න අති විශාල දැනුම් සම්භාරයක් අඩංගු ටැබ් පරිගණක බෙදා දීම සමස්ත ජාතියම නගා සිටුවීමේ මෙහෙවරක් ලෙස තමා සළකන බවත් මෙම මහා  ශාසනික මෙහෙවරට ලබා දිය හැකි සෑම සහයෝගයක්ම ලබාදෙන බවට තමන් ප්‍රතිඥා දෙන බවත් අග්‍රාමාත්‍ය මහින්ද රාජපක්ෂ මැතිතුමා වැඩිදුරටත් ප්‍රකාශ කළේය.

– විජයානන්ද හේරත්

15,099 Viewers

8 Comments to “සිංහලයා මෝඩයා කියු යුගය නොවැම්බර් 16 අවසන් වුණා.. සෙසු ආගම්වල නිදහස රැකෙන්නේ සිංහල බෞද්ධයා රැකුණොත් පමණයි..”

  1. ඇත්ත නැත්ත says:

    බුද්ධ ශාසනය, සිංහල භාෂාව සහ කෘෂිකර්මය යන පාද 3 මත රැදීම රට දියුණු කිරීමේ මාර්ගයයි…!

  2. Hari says:

    AGAMA PALIHAK KAGANA APPA MAHINDA

  3. Open mind says:

    සිංහල බෞද්ධයන් රැක ගත යුත්තේ ඔවුන් මෝඩයන්ට අන්දා පෝෂණය වන අයගෙන්. උගත් බුද්ධිමත් භික්ෂුන් වහන්සේලා විවිධ භාෂා වලට පරිවර්තනය කළ ධර්මය අවබෝධ කර ගෙන අනෙක් බොහෝ ජාතිකයන් තම දිවිය සකස් කර ගන්නවා. ධර්මය හැර අනෙක් සියලු දේ අල්ලාගත් පිරිසෙන් අප ඉවත් විය යුතුය.

  4. Love nature says:

    සිංහලයා මෝඩයා කැවුම් කන්න යෝධයා, යැයි කීවේ සිංහල ප්‍රතිරෝධි බටහිර ආක්‍රමිණිකයන්‍ය. නමුත් කිසිදින සිංහලයා මෝඩකමට කැවුම් කෑවේ නැත ආක්‍රමණික යුධයක පවා අවි ආයුධවලට අමතරව කැවුම් මල්ලක් රැගෙන ගියේය.ඒ සිංහලයාගේ බුද්ධිමත්කමට මිස මෝඩකමට නොවේ. දරුණු සටනකදි ඇතිවන ආහාර හිගයට කැවුම් මල්ල බොහෝ ප්‍රයොජනවත් විය . දින කිහිපයක් නිරාහාරව සිට ශක්තිය හීන වූ කෙනෙකුට කැවුමකින් ලැබෙන ශක්තිය අති මහත්ය .එසේම යුද්දයකදි ඇති වන තුවාලවලදී කැවුම් තබා එම තුවාල ක්ශණිකව එම තුවාලය සුව කරගැනීමට හැකිබව සිංහලයා මනාව දැන සිටියේ ය. දින කිහිපයක් ගත වූ කැවුම් ගෙඩියකට ඕනෑම තුවාලයක් සුව කිරීමේ දිව්‍යමය හැකියාවක් ඇත. සිරිපා කරුණාවේදි පවා රිටක ගැට ගැසූ කැවුම් මල්ලක් රැගෙන යාම සිංහලයාගේ සිරිත විය . නමුදු එය මෝඩකමට නොවේ.කඳු තරණයේදී අද මෙන් මාර්ග පහසුකම් නොතිබු හෙයින් අධික දුෂ්කර මාර්ග වලින් කඳු තරණය කිරීමේදි අවශ්‍ය තරම් ආහාර රැගෙන යාම පහසු නොවේ . පිසූ ආහාර රැගෙන ගියද ඒවා ඉතා ඉක්මනින් නරක් වේ. කැවුම් මල්ලෙන් මේ ගැටලු සියල්ලම විසදෙනවා සේම තවත් ඉතාම ප්‍රයොජනවත් කරුනක් විය .එය නම් රිටෙහී ගැට ගැසූ කැවුම් මල්ල කරේ තබාගෙන යාමේදී කඳු තරණයේදී ඇතිවන සිරුරෙහි ඇතිවන අධික නම්‍යශීලීභාවය අඩු කර සිරුර කෙලින් කරගෙන යාම කඳු තරණට බොහෝ පහසු විය .
    මේ කිසිවක සත්‍යතාවය නොදත් සුද්දා මෝඩකමට සිංහලයා කැවුම් කන බව කීවේය .අද මෙන් විද්‍ය්ව භෞතික උපකරණ වලින් කාළ ගුණ අනාවැකි නොකියු යුගයක අදට වඩා හොදින් ඔවුන් කාළ ගුණය ගැන දැනගත්තේ ඔවුන්ගේ හෙළ දැනුමෙන් ය.

  5. Parakum says:

    Buddhism has survived more than 2500 years without Political Patronage. Some Yellow Robed Cheewaradharees destroying the Buddhism, have a good look at what UMPITIYE Cheewaradhariyas action?

Main News