හමුදා කඳවුර ඉවත් කරනු.. සිලාවතුරේ විරෝධතා…

February 22, 2019 at 8:02 am | lanka C news
හමුදා කඳවුර ඉවත් කරනු.. සිලාවතුරේ විරෝධතා…

මන්නාරම,මුසලි ප්‍රාදේශීය ලේකම් කොට්ඨාශයේ සිලාවතුර ප්‍රදේශයේ මුල් පදිංචිකරුවන්ගේ ඉඩම් තුළ ස්ථාපිත කොට ඇති නාවික හමුදා කඳවුර ඉවත් කරන ලෙසට ඉල්ලා ප්‍රදේශවාසීන් විසින් විරෝධතාවයක් සංවිධානය කොට තිබුණි.

සිලාවතුර නාවික හමුදා කඳවුර ඉදිරිපිට පැවති මෙම විරෝධතාවයට සහභාගී වූවන් කියා සිටියේ යුදමය තත්ත්වය හේතුවෙන් 1990 වසරේ සිලාවතුර ප්‍රදේශයේ තම ඉඩම් අතහැර කල්පිටිය ප්‍රදේශයේ අවතැන් කඳවුරු වෙත ගොස් ජිවත්වු බවත් යුද සමයේදී තමන්ගේ ඉඩම්වල නාවික හමුදාව කඳවුරක් ඉදිකොට තිබුනද යුද්ධය නිමාවීමෙන් අනතුරුව තමනගේ මුල් ඉඩම් තමන්ට නැවත ලබා නොදීම හේතුවෙන් තමන් දැඩි සේ අසරණව සිටින බවටය.

මුල් ඉඩම් නොලැබීම හේතුවෙන් 2009 වසරේ සිට තමන් නැවත වතාවක් අවතැන්ව මුසලි ප්‍රාදේශීය ලේකම් කොට්ඨාශයේ වෙනත් ස්ථානයක තාවකාලිකව පදිංචිව සිටින බවත් වර්තමානයේ යුද්ධයක් නොමැති බැවින් නාවික හමුදාව සිය කඳවුරක් වෙනුවෙන් පවරාගෙන ඇති සිලාවතුර මුල් පදිංචිකරුවන්ගේ ඉඩම් අක්කර 35 ක භූමි ප්‍රමාණය නැවත ලබාදෙන ලෙසට විරෝධතා කරුවන් වැඩි දුරටත් පැවසූහ.

විරෝධතාවයෙන් අනතුරුව එහි වැසියන් පිරිසක් විසින් මුල් ඉඩම් ලබාදෙන ලෙසට ඉල්ලීම් කරමින් මන්නාරම දිස්ත්‍රික් ලේකම්,මුසලි ප්‍රාදේශීය ලේකම් ඇතුළු පිරිස් වෙත ලිඛිත ඉල්ලීම් ඉදිරිපත් කිරීමටද කටයුතු යොදන ලදි.

– වන්නි රොමේෂ් මධුෂංඛ

40 views