කොටි පිබිදීම ගැන විමර්ශන ජනපති අපේක්ෂකයකුට අවාසි වෙතැයි යටපත් ‌කෙරෙන හැඩ..

October 28, 2019 at 2:10 pm | lanka C news
කොටි පිබිදීම ගැන විමර්ශන ජනපති අපේක්ෂකයකුට අවාසි වෙතැයි යටපත් ‌කෙරෙන හැඩ..

රටේ ආරක්ෂාව අස්ථාවර බවට දකුණේ මතයක් පැතිරීම ජනාධිපති අපේක්ෂකයකුට අවාසියක් වන නිසා එල්.ටී.ටී.ඊ.ය. හිස එසවීම පිළිබඳව කෙරෙන විමර්ශන යටපත් කිරීමේ තත්ත්වයක් උද්ගතව ඇතැයි ආරක්ෂක අංශ පෙන්වා දෙයි.

මේ නිසා ‘තීබන්’ හෙවත් රොබින්සන් නමැති කොටි ප්‍රබලයා යටතේ ඇති බවට හෙළි වූ කණ්ඩායම් සම්බන්ධයෙන් කෙරෙන විමර්ශන යටපත් විය හැකි බවද එය ඉදිරියේදී තර්ජනයක් වනු ඇතැයිද ආරක්ෂක අංශ අනතුරු අඟවයි.

යුද හමුදා බුද්ධි අංශ මගින් ඉකුත් 11 දා සේරුනුවරදී තීබන් ගිනි අවියක්ද සමග අල්ලාදීමෙන් පසුව අවි ආයුධ තොගයක් කිලිනොච්චියේ නිවසින් හමුවිය. වැඩිදුර විමර්ශනවලදී යාපනයේ කොණ්ඩාවිල්වලින් කිලෝ පහළොව බැගින් වූ ක්ලේමෝ බෝම්බ දෙකක්ද හමුවිය.

නැගෙනහිර පළාතේදී කරුණා අම්මාන් ඇතුළු දේශපාලන ඉලක්ක ගැනීමට සූදානම් වූ බව කියන තීබන්ගේ හෙළිදරව්ව මත රාමයියා විවේකානන්දන් (දිනේෂ්) නමැති කොටි ප්‍රබලයාද අත්අඩංගුවට ගෙන තිබේ.

මෙම ත්‍රස්තයන්ගෙන් හෙළි වූ තොරතුරු මත අධිබල ‘සිෆෝ’ පුපුරණ ද්‍රව්‍ය තොගයක් ඇතුළු අවි ආයුධ සොයා මෙහෙයුම් අරඹා තිබුණත් ඉහළ බලපෑමකින් අවි ආයුධ සොයන මෙහෙයුම් අඩාළ වී ඇතැයි ආරක්ෂක අංශ පෙන්වා දෙයි.

සිව්වැනි ඊළාම් යුද්ධයෙන් පසුව එල්.ටී.ටී.ඊ. ජාත්‍යන්තර නායකයන් දෙමළ ඩයස් පෝරාවේ සහායද ඇතිව දසවතාවක් යළි හිසඔසවන්නට ගියද යුද හමුදා බුද්ධි අංශ අවදියෙන් සිටීම නිසා ඒවා අනාවරණය විය. ඉන්දියාවට පැමිණ ඇති ජාත්‍යන්තර නායකයන් තීබන් මෙහෙයවන බව අනාවරණය කරගනිමින් හමුදා බුද්ධි අංශය කළ මෙහෙයුමකින් මෙම කොටි ජාලය හෙළිවූවත් වැඩිදුර විමර්ශන ත්‍රස්ත විමර්ශන කොට්ඨාසයට පමණක් භාරදී තිබිණි.

කලින් අවස්ථා ගණනකදීම එල්.ටී.ටී.ඊ. යළි ​හිසඔසවන බවට සාක්ෂි සාධක සහිතව දුන් විමර්ශන ත්‍රස්ත විමර්ශන කොට්ඨාසය යටපත් කළ බව එම ඒකකය භාරව සිටි නියෝජ්‍ය පොලිස්පති නාලක සිල්වා අත්අඩංගුවට ගෙන කළ විමර්ශන අතරේ හෙළි විය.

– aruna.lk

334 views
Main News