ආර්ථිකය හදන හර්ෂ ද සිල්වාගේ සම්පූර්ණ වැඩපිලිවෙල මෙන්න…

August 14, 2022 at 3:50 pm | lanka C news
ආර්ථිකය හදන හර්ෂ ද සිල්වාගේ සම්පූර්ණ වැඩපිලිවෙල මෙන්න…

පවතින ආර්ථික අර්බුදයෙන් කෙටි කාලීනව සහ මධ්‍ය කාලීනව රට ගොඩගැනීම සඳහා පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා විසින් සම්පාදනය කළ “ණය උගුලෙන් මිදීම සහ අන්තර්ග්‍රාහී තිරසාර සංවර්ධනය වෙනුවෙන් වන සැලැස්ම“ යන ආර්ථික වැඩපිළිවෙල පසුගියදා ඔහු විසින් පාර්ලිමේන්තුවට ඉදිරිපත් කළ අතර අද (14) ඒ සම්බන්ධයෙන් ඔහු මාධ්‍ය දැනුවත් කළේය.

එහිදී, ඔහු සඳහන් කළේ මෙම ආර්ථික සැලැස්ම ප්‍රතිසංස්කරණය කළ යුතු ප්‍රධාන ක්ෂේත්‍ර 10 ක් හඳුනා ගනිමින් සකස් කර තිබෙන බවයි. ණය අර්බුදය කළමණාකරණය, මූල්‍ය සහ විනිමය අනුපාතික ප්‍රතිපත්තිය, ආදායම් ස්ථාවර කිරීම, වියදම් පාලනය, රාජ්‍ය අංශය කළමනාකරණය, බලශක්ති සහ මහජන උපයෝගීතා, වෙළෙඳාම, කර්මාන්ත, කාෂිකර්මය සහ සේවා ප්‍රවර්ධනය, නිෂ්පාදන සාධක වෙළෙඳපොළ ප්‍රතිසංස්කරණ, ශක්තිමත් සමාජ ආරක්ෂණ ජාලය, විනිවිදභාවය සහ වගවීම මෙම අංශ අතරට ඇතුළත් වේ.

ආචාර්ය හර්ෂ ද සිල්වා මහතා විසින් සම්පාදනය කර තිබෙන මෙම ආර්ථික සැලැස්ම ප්‍රධාන විපක්ෂය වන සමඟි ජන බලවේගයේ ආර්ථික ප්‍රතිපත්ති ඒකකය මඟින් අනුමත කර ඇත. මෙම ආර්ථික සැලැස්ම නිර්මාණය කිරීම සඳහා සමගි ජන බලවේගයේ ආර්ථික ප්‍රතිපත්ති ඒකකයේ පාර්ලිමේන්තු මන්ත්‍රී කබීර් හෂීම් මහතා සහ පාර්ලිමේන්තු මන්ත්‍රී ඉරාන් වික්‍රමරත්න මහතාද සහභාගී වී තිබෙන අතර මහාචාර්ය ප්‍රේමචන්ද්‍ර අතුකෝරාළ මහතාද මේ සඳහා උපදෙස් ලබාදී තිබේ.

එසේම, මෙය සමාජ සාධාරණත්වය සඳහා වන ජාතික ව්‍යාපාරය මඟින් කණ්ඩායම් 08 කගේ යෝජනා පාදක කර ගනිමින් (Advocata ආයතනය, ශ්‍රී ලංකා නීතිඥ සංගමය, ඇල්ලේ ගුණවංශ හිමියන්, ස්වාධීන ආර්ථික විද්‍යාඥයින්, සමාජ සාධාරණත්වය සඳහා වන ජාතික ව්‍යාපාරය, NPP, SJB , 43 කණ්ඩායම) හා ශ්‍රී ලංකා නිදහස් පක්ෂය හා ව්‍යාපාරික ප්‍රමුඛයන් ගේ අදහස්ද විමසා සම්පාදනය කර ඇත.

මෙම සැලසුම පිළිබඳව අදහස් දක්වමින් ආචාර්ය හර්ෂ ද සිල්වා මහතා මෙසේ පැවසීය.

“මෙය කෙටි කාලීන සහ මධ්‍ය කාලීන ආර්ථික සැලැස්මක්. ඩලස් අලහප්පෙරුම මහතා ජනාධිපති අපේක්ෂකයා විදිහට ඉදිරිපත් වන අවස්ථාවේ විපක්ෂයේ පක්ෂ සමග සාකච්ඡා කර මෙය ගොඩනැගීමේ වගකීම මට පැවරුණා. මේ සඳහා විපක්ෂයේ බොහෝ පක්ෂවල අනුමැතිය තිබෙනවා. මේ නිසා, මම ආණ්ඩුවට අවධාරණය කරන්නේ මේ වැඩපිළිවෙල වහාම ක්‍රියාත්මක කිරීමට කටයුතු කරන්න කියලයි. සාමාන්‍යයෙන් ආණ්ඩුව තමයි මෙවැනි වැඩපිළිවෙලක් ඉදිරිපත් කළ යුත්තේ. අපිට දැන් පක්ෂ, විපක්ෂ කිය කිය ඉන්න කාලයක් නෑ. මේ ආර්ථික සැලැස්ම විශේෂඥයින් විසින් සම්පාදනය කරපු එකක්. ඒක නිසා, වහාම මේක ක්‍රියාත්මක කරන්න. නැත්නම්, ආණ්ඩුව ඔවුන්ගේ ආර්ථික සැලැස්ම ඉදිරිපත් කරන්න. අපිට කල් මරන්න කාලයක් නෑ.“

මෙම ආර්ථික සැලසුමෙහි පාඩු ලබන රාජ්‍ය ආයතන ප්‍රතිසංස්කරණය කිරීමේ යෝජනාද ඇතුළත් වන අතර ඒ පිළිබඳව අදහස් දක්වමින් ආචාර්ය හර්ෂ ද සිල්වා මහතා පැවසුවේ මේ අවස්ථාවේ රට ගොඩගැනීම සඳහා අකමැත්තෙන් වුවද තිත්ත බෙහෙත් බීමට සිදුවන බවයි.

37,633 views

14 Comments to “ආර්ථිකය හදන හර්ෂ ද සිල්වාගේ සම්පූර්ණ වැඩපිලිවෙල මෙන්න…”

  1. හොඳම කෙනා says:

    හර්ෂ IMF එකෙන් 2019 වසරේදී දීපු රිපෝර්ට් එකේ සාරාංශය කාට හරි කියලා සිංහලට පරිවර්තනය කරලා එයාගේ වගේ දාලා. IMF එකෙන් දෙවනියට 2021 දීපු රිපෝර්ට් එකේ ඔයිට වැඩිය හොඳට සවිස්තරව ඕක කියලා තියනවා. මෙයා හැමදාම කලේ අනුන්ගේ වැඩ වලට උප්පැන ලියාගන්න එක. සුව සැරිය ගිලන්රථ සේවය රනිල් ආරම්භ කරලා මෙයාට කරගන්න යන්න දුන්නම මෙයා තනිකර මෙයාගේ වගේ රඟපෑවා. හැමතැනින්ම ගැලවිලා බොරු පුරසාරම් කතා කියා කියා ඉන්නවා කිසිම දෙයක් කරන්න බෑ.

  2. Srimal says:

    Mokaage වුණත් වැඩේ හොඳයි…කවදා kereida…IMF ඒකෙන් මෙහා සරණක් නැහැ එතකොට…අනේ Affooii…

Main News